(Traductions wallonnes)
Ce texte précieux et rare est l'oeuvre de "On P'tit Monne" ("Un Petit Moine"). Ce "monne" en question, un enfant spirituel du père Hubert, est un moine trappiste de pure souche wallonne. Comme exercice spirituel, le père Hubert lui avait demandé de s'atteler à cette longue et la délicate tâche de traduire tous les psaumes en wallon à partir de quatre traductions françaises différentes. Le "P'tit Monne", sur sa lancée, a aussi traduit l'Évangile de Marc (cf. infra) et les trois lettres de Jean.
Je présente ici une version bénévolement dactylographiée et corrigée selon les dernières conventions orthographiques par monsieur Jean Hamblenne à partir des photos prises aux archives de l'abbaye de Rochefort. Merci M. Hamblenne pour ce travail long et exigeant.
85-86-87-88-89-90-91-92-93-94-95-96-97-98-99-100-101-102-103-104-105-106-107-108-109-110
1à22 - 23à52 - 53à85 - 110à131 - 132à150
Psaume 85 (Vulgate 84) Priyîre po-z-avu l'påye.
1. A mêsse dè tchant - dès fis d'a Corah - tchant.
2. Signeûr,
vos ahågnîz vosse tére,
vos fez rim'ni ès leû bin
tos lès prîzonîrs d'a Djåcob.
3. Vos supwèrtez l'måle goviène di vosse peûpe,
èt vos r'covrez tos leûs pètchîs.
4. Di leû vôye vos r'sètchîz vosse colére,
vos lèyîz r'toumer l'feû d'vosse fureûr.
5. R'mètez nos d'vins nos dreûts,
vos, l'Diu d'nosse dilîvrance,
rèbalez l'måle oumeûr
qui v's avez so nos-ôtes!
6. Alez-v' èsse tot foû d'vos disconte nos
disqu'å coron dès siékes?
Alez-v' kihèrtchî vosse colére
d'on siéke a l'ôte?
7. N'èst-ce nin vos qui d'vreût m'ni
po nos fé raviker?
N'èst-ce nin vos qui d'veût m'ni
po qu'vosse peûpe si rafèye ès voste-amoûr?
8. Signeûr,
fez qu'nos polans' loukî voste-amoûr!
Dinez nos vosse dilîvrance!
9. Avez-v' oyou
çou qu'nos dit l'Signeûr?
Ca nosse Diu djåze di påye
a s'peûpe èt a sès sints,
po qu'ènnè ralèsse nin
a leûs bwègnès èspwérs!
10. Awè,
si d'lîvrance èst tot près d'sès fruzihants,
èt çoula,
po qu'si glwère dimone chal so l'tére.
11. L'Amoûr èt l'fidélité si rèscontrèt,
li djustice èt l'påye si rabrèssèt,
12. li vrêye florih so l'tére,
èt d'al copète dès cîrs,
li djustice louke tot çoula!
13. Li Signeûr,
Lu-minme done li bin,
èt adon,
nosse tére done si frût'.
14. Li djustice rote po d'vant Lu.
I mète sès pas so l'vôye.
85-86-87-88-89-90-91-92-93-94-95-96-97-98-99-100-101-102-103-104-105-106-107-108-109-110
1à22 - 23à52 - 53à85 - 110à131 - 132à150
Psaume 86 (Vulgate 85) Trois versions. Lès pôves èt lès målèreûs s'mètèt a houte ès nosse Diu.
1. Priyîre d'a Dåvid.
Droviez tot grand vos orèyes, Jahvé,
ca dji sos pôve èt mizèråbe!
2. Wårdez mi åme
ca dji sos plin d'feû por vos,
såvez vosse chèrviteû, Jahvé,
ca i s'abann'nèye ès vos.
3. Fez-m' gråce, Jahvé,
dji brê après vos tote li djoûrnêye.
4. Rafiyîz l'vèye di vosse chèrviteû
car vèr vos, dj'èlîve mi åme.
5. Jahvé, qui v's èstez bon!
Todi prèt a åhèy'mint pardoner,
ritche d'amoûr
po tos lès cis qui v'houkèt.
6. Jahvé, hoûtez m'priyîre,
fez atincion a mès suplicåcions!
7. Li djoû qu'dji so strindou,
dji brê après vos,
vos savez si bin m'rèsponde!
8. D'vins totes lès sôrs di dius
nouk n'èst parèy a vos, Jahvé;
Nouk ni såreût fé non pus
totes lès oûves qui v's avez fêtes!
9. Tos lès peûpes,
qui v's avez mètou sol tére
vinront ad'lé vos,
po s'mète a gngnos d'vant vos
èt rinde glwère a vosse nom.
10. Ca v's èstez grand èt vos fez dès mèrvèyes,
a vos tot seû, Jahvé!
11. Ac'sègnîz-m' li vôye a sûre, Jahvé,
insi dji rotrè ès vosse loumîre.
12. Unihez m'coûr po qui fruzih tot
rin qu'd'ètinde vosse vwès!
13. Di tot m'coûr dji v'lowe,
Signeûr nosse Diu,
dji glorifiyèye vosse nom a jamåy,
ca voste amoûr sor mi èst tél'mint grand!
Vos råyiz m'vèye dès parfondeûrs di l'infér!
14. Jahvé,
dès grandiveûs s'drèssèt conte di mi,
ine bande di calins ènnè vout a mi åme,
is n'polèt wåde d'èsse a vosse chèrvice!
15. Mins vos Jahvé,
Diu d'mizéricôr,
tinre po nos-ôtes
londjin al colére
ritche d'amoûr èt tofér vrêye,
16. toûrnez-v' vèr mi,
prindez-m' ès vosse chèrviteû,
såvez l'fi d'vosse chèrvante.
17. Fez por mi on sègne di vosse binvèliance,
lès cis qui n'savèt m'oder èl veûront!
Adon ènnè sèront tot maké!
Ca vos Jahvé, vos m'sout'nez
èt ossi vos m'rapåftez.
version2
Psaume 86 (Vulgate 85) Priyîre p o qwand on-z-èst mètou a l'èsproûve.
1. Priyîre d'a Dåvid.
tindez voste-orèye di m'costé, Jahvé,
ca dji sos pôve èt minåbe!
2. Wårdez mi åme
ca dji sos plin d'feû por vos!
Vos qu'èstez m'Diu,
såvez vosse chèrviteû,
qui ès vos s'abann'nèye!
3. Fez-m' gråce, Signeûr,
tote-djoû dji brê-st-après vos!
4. Signeûr,
rafiyîz l'åme di vosse chèrviteû,
ca c'èst-st-ad'lé vos qu' dj'èlîve mi åme!
5. Ca Vos Signeûr vos èstez bon,
vos pardonez åhèy'mint,
vos fez lårdjèsse di totes vos gråces
so tot qui v'houke a l'assistince!
6. Signeûr
prustez l'orèye a m'priyîre,
acontez m'vwès qui v'tem'têye!
7. Qwand dji so strindou,
dji brê-st- après vos,
ca v's èstez l'seûl
qui pouhe m'rèsponde!
8. Avå lès dius,
ènn'a nouk qu'èst parèy a Vos,
èt rin Signeûr
ni poreût ravizer totes vos oûves .
9. Tos lès peûpes qui v's avez fêt
vinront po si stårer d'vant Vos;
Signeûr,
is vinront po glôrifiyî vosse nom.
10. Ca v's èstez grand, vos l'feû d'miråkes,
Vos seûl, nosse Diu!
11. Signeûr, mostrez-m' vosse vôye
po qu'dji tchèrèye ès vosse vrêye,
rifez l'ûnité ès m'coûr,
po qu'i fruzihèye a l'îdèye di vosse nom.
12. Dji v'lowe, Signeûr,
vos qu'èstez m'Diu,
djèl fêt d'tot m'coûr,
dji glôrifiyèye vosse nom a jamåy.
13. Ca sor mi,
vosse gråce èst foû mèzeûre,
vos r'sètchîz mi-åme
dèl parfondeûr dèl mwért!
14. Signeûr,
dès grandiveûs m'cwèrèt mizére,
ine bande di brutes awète mi åme,
is n'vis ont nin mètou d'vant zèls.
15. Et Vos Signeûr,
li Diu dèl mizéricôr,
Vos qui pardone åhèy'mint
èt qu'a 'ne fameûse pacyince,
qu'èstez ritche di gråce,
Vos qu'èstez l'vrêye,
16. toûrnez-v' di m'costé,
ni m'chicanez nin so tot,
dinez vosse fwèce a vosse chèrviteû,
såvez l'fi d'vosse chèrvante.
17. Fez on djèsse qui mosteûre a turtos
l'amoûr qui v's avez por mi,
insi lès-cis qui m'hayèt èl veûront
èt ènnè sèront tot maké;
ca c'èst vos Signeûr
qui sètche foû di spèheûr,
c'èst Vos minme
qui m'rapåftêye tofér.
version3
Psaume 86 (Vulgate 85)
1. Oyez-v' nosse Diu!
Rèspondez-m':
dji n'so qu'on pôve diâle,
on pôve piti mimbe di Diu.
2. Loukîz a mi nosse Mêsse,
a mi qui såye dè t'ni parole.
Såvez vosse chèrviteû
qui s'ènnè r'mète a vos.
3. N'årez-v' nole pîtié nosse Mêsse,
vos qu'dji houke tot dè djoû?
4. Mètez-m' li coûr al djôye
ca dj'ènn'a qu'por vos.
5. Vos qu'a dè coûr
èt qu'pardonez todi,
qu'èstez broûlant d'amoûr
po lès cis qui v'houkèt,
6. hoûtez m'priyîre nosse Mêsse,
oyez m'vwès qui v's è prèye.
7. Qwand dj'so må pris,
abèye, dji v'houke:
èt vos nosse Mêsse
vos m'rèspondez todi.
8. Di tos lès dius nouk ni v'ravise,
nin onk po 'nnè fé ot'tant qu'vos.
9. Totes lès djins
qu'ont r'çû d'vos l'vicårèye
rivinront d'å lon
si mète a gngnos d'vant vos
po v's adôrer.
10. Ca v's èstez foû grand
èt vos fez dès mèrvèyes,
vos qu'èst Diu,
li seûl vrê Diu.
11. Nosse Mêsse,
mostrez-m' vosse vôye,
qui dj'î rote
tot sûvant vosse vrêye.
Fez qui m'coûr seûye lîbe
èt qu'i s'tinse tot t'tit d'vant vos.
12. Nosse Mêsse,
di tot coûr dji v'di mèrci,
dji frè tot po vosse glwère.
13. Voste-amoûr por mi èst foû mèzeûre:
ni m'av'nin r'sètchî
dè fî fond dèl mwért?
14. Nosse Diu,
dès grandiveûs si stampèt disconte mi,
ine clike d'arèdjîs vout m'fé mori:
is n'ont d'keûre di vos.
15. Mins vos nosse Mêsse,
vos qu'on lome li bon Diu
èt qui v's ènnè fez po nos-ôtes,
vos qu'èst londjin a v'måvler
èt qui d'hez todi l'vrêye,
vos qu'èst l'amoûr:
16. loukîz après chal,
lèyîz' djåzer vosse coûr,
dinez d'vosse fwèce a vosse chèrviteû,
såvez l'fi d'a vosse chèrvante.
17. Fez 'ne sacwè d'bin por mi;
adon mès innemis si såvront l'cowe è cou
qwand is veûront nosse Mêsse
qui c'èst vos qui m'dinez on côp d'min,
qui v's èstez là po m'rapåfter.
85-86-87-88-89-90-91-92-93-94-95-96-97-98-99-100-101-102-103-104-105-106-107-108-109-110
1à22 - 23à52 - 53à85 - 110à131 - 132à150
Psaume 87 (Vulgate 86) Sion èst l'mame di tos lès peûpes.
1. Dès fis d'a Corah, on tchant, ine îme.
So l'assîse dès sintès hôteûrs.
2. Li Signeûr inme lès pwètes d'a Sion,
èt bråh'mint pus
qui totes lès d'morances d'a Djåcob.
3. C'è-st-ès twè qu'on fêt sèpi lès glwères,
twè, li vêye d'å bon Diu.
4. Dji r'tûze a Rahab èt a Babel
qui sont d'mès camarådes;
vochal li Philistie, Tyr avou l'Ethiopie,
c'èst la qu'ci la a stu mètou å monde.
5. Mins po Sion il èst dit:
l'ome, l'ome î a stu mètou å monde,
èt c'èst l'Fwért-Hôt lu minme
qu'ènn'a mètou lès fond'mints.
6. Tot rassîhant lès peûpes å rèdjisse
li Signeûr compte 'ne miyète:
c'èst bin la
qu'ci-chal a stu mètou å monde.
7. Tchanteûs èt danseûs:
tos mès surdons sont-st-ès Vos!
85-86-87-88-89-90-91-92-93-94-95-96-97-98-99-100-101-102-103-104-105-106-107-108-109-110
1à22 - 23à52 - 53à85 - 110à131 - 132à150
Psaume 88 (Vulgate 87) Priyîre å Diu mêsse dèl vèye par ine ome qui s'sint 'nn'aller.
1. Ime, on tchant dès fis d'a Corah, å mêsse dè tchant,
so lès ponnes, qwand on-z-a dès mås -
Po-z-aprinde - d'Eyman l'Ezrahite.
2. Signeûr,
vos l'Diu di m'dilîvrance,
di djoû come di nut
dji brê chal po d'vant vos.
3. Qui m'priyîre arive disqu'a vosse vizèdje,
clintchîz voste-orèye dè costé di m'plinte!
4. Ca mi-åme èst r'pahowe di måleûrs,
mi vicårêye è-st-ine infér.
5. Dji so compté
come dèdja d'hindou ès trô,
dji so parèy å måye
qui n'a pus nole séve.
6. Mi d'morance è-st-avå lès mwérts
come lès cadåves coûkîs ès sårcô,
vos n'î tûzez minme pus
adon qu'vosse min élz'a r'côpé djus!
7. Vos m'avez r'tchoûkî ès trô sins fond,
èl neûristé dès parfondès abîmes.
8. Vosse colére peûze sor mi:
vos avez d'rôlé vos vågues
qui s'sont s'piyèyes sor mi,
9. åtou d'mi,
vos avez fêt l'vûde di tos lès-cis
po lès qués dj'aveûs d'l'atach'mint,
por zèls,
vos m'avez rindou tot disgostant;
prîzonîr,
dji n'sé m'ni foû!
10. Di mizére,
mi-oûy s'ènnè va tot,
Signeûr
dji v's è prèye,
djoû après djoû
dj'èlîve mès mins vèrs vos.
11 Fez-v' dès miråkes po lès mwért?
Lès pauvès-åmes si r'lèvèt-èles po v'louwer?
12. Vosse gråce è-st-èle publiyèye ès sårcô?
Fêt-on sèpi vosse fidélité å payîs dès pièrdoux?
13. Vosse miråke è-st-i k'nohou èl neûristé.
A-t-on oyou djåzer d'vosse djustice
èl tére dèl roûviance?
14. Adon Signeûr,
mi dji v's è prèye,
å pikèt dè djoû
dèdja m'priyîre s'èlîve po d'vant vos.
15. Poqwè Signeûr ribouter mi-åme?
Poqwè Signeûr mi catchî vosse vizèdje?
16. Mi l'minåbe,
dji so èl langonèye dispôy mi djonne tins,
dj'a dès tèribès sognes di vos
qui dj'so tot seû po pwerter,
17. vos fureûrs tchèrèt sor mi,
dji so tél'mint strindou
qui çoula m'casse brès èt djambes.
18. Eles m'èwalpèt tote djoû come di l'êwe,
èles m'assådèt totes èssonne!
19. Erî d'mi,
vos avez r'sètchî camarådes èt galant,
Zèls qui m'kinohît come mi-minme,
ni sont pus qu'neûristé.
85-86-87-88-89-90-91-92-93-94-95-96-97-98-99-100-101-102-103-104-105-106-107-108-109-110
1à22 - 23à52 - 53à85 - 110à131 - 132à150
Psaume 89 (Vulgate 88) Ime èt priyîre å Diu todi fidéle.
1. Po-z-aprinde, d'a Eythan l'Ezrahite.
2. Po tofér,
dji tchante lès gråces d'å Signeûr,
d'ine adje a l'ôte,
mi boke fêt k'nohe vosse fidélité.
3. Ca dji d'ha:
"L'étèrnité s'batih par li gråce;
èt d'vins lès cîrs,
vosse fidélité èst mètowe so pîd.
4. Avou l'ci qu'dj'a tchûzî
dj'a-st-arindjî 'ne aliyance,
dji m'a-st-ègadjî
ad'lé m'chèrviteû Dåvid:
5. po tofér,
dji mintinrè ti s'mince d'aplon,
sièke après sièke,
dji batirè t'trône.
6. Signeûr,
lès cîrs fièstèt vosse miråke,
is fièstèt vosse fidélité
disqu'a ès l'assimblêye dès sints.
7. Quî ès steûlî poreût s'mèz'rer å Signeûr?
Quî èst parèy a Lu avå lès fis dès dius?
8. Nosse Diu èst r'crindou ès consèy dès sints,
si fwèce èst foû mèzeûre,
Il èst tèribe po tos lès cis
qu'sont-st-åtou d'Lu.
9. Signeûr Diu dès årmêyes,
quî èst parèy a vos?
Vos l'pwissant, Vos l'Diu,
vosse fidélité èst tot åtou d'vos.
10. Vos mêstrihez lès sotès-fîves di l'ôcèyan
vos rapåftez lès aussôts s'sès vågues;
11. vos blèssîz a mwért li "roufe-tot-djus";
dèl pwissance di vosse brès'
vos d'hotez tos vos innemis.
12. Lès cîrs sont d'a vosse,
èt l'tére ossi!
Vos mètez è plèce lès fond'mints dè monde ètîr
avou tot çou qu'i-n-a d'vins.
13. Vos avez crèyé l'nôrd èt l'sûd,
rin qu'd'ôre vosse nom
li Thabor èt l'Hermon sont-st-èl fièsse!
14. Ci brès' qui n'fêt qu'dès mèrvèyes,
c'èst d'a vosse,
vosse min èst plinte di fwèce
vos avez 'ne fîre dreûte.
15. Vosse trône è-st-assiou so l'djustice èt l'djudj'mint,
li gråce èt l'vrêye m'net po d'vant vosse vizèdje.
16. Ureûs è-st-i l'peûpe qu'èst plin d'feû
po v'rinde lès oneûrs,
ca adon Signeûr
i fêt s'vôye èl loumîre di vosse vizèdje.
17. Tote oute dè djoû,
is s'rafiyèt ès vosse nom,
is s'èlèvèt ès vosse djustice,
18. ca v's èstez l'glwère di leû fwèce;
nosse cwène s'èblame ès vosse tinre-amoûr.
19. Al vrêye,
li Signeûr èst nosse prôtècsion,
Lu l'sint d'a Israël
c'èst Lu qu'èst nosse rwè.
20. D'vins l'tins vos d'hîz,
tot v'mostrant a vosse fruzihant:
"Dji mète mi sécoûrs d'vins lès mins d'on fwért,
dj'ènn'èlîve onk qui dj'tchûzih ès peûpe".
21. Dj'a rèscontré Dåvid mi chèrviteû,
dji l'a sacré avou l'ôle di m'sint'té.
22. Mi min èl tint solid'mint,
minme mi brès quèl rafèrmih!
23. Disconte lu,
sès innemis n'åront måy li d'z'eûr,
li fi dè må n'porè l'acåbler.
24. Po d'vant s'vizèdje,
dji språtch'rè l'ci qu'èst conte di lu,
dji bouh'rè djus l'ci qu'èl hét.
25. Mi fidélité èt m'gråce sont-st-avou lu,
par mi nom si cwène sèrè-st-a l'oneûr.
26. Dji stindrè s'min so l'mér,
dji stindrè s'min so lès fleûves.
27. Lu m'houk'rè tot d'hant:
"C'èst Vos qu'èst m'Pére,
c'èst Vos qu'èst m'Diu,
c'èst Vos l'rotche di m'dilîvrance".
28. Adon,
dji f'rè d'lu l'prumîr èfant,
dji f'rè d'lu on grand mêsse
so tos lès rwès dèl tére.
29. Po tofér dji lî wård'rè m'gråce,
i pout-z-èsse sûr di mi-aliyance.
30. A jamåy si s'mince pwèt'rè s'frût,
èt s'trône dûr'rè tot-ottant
qui lès djoûs dès cîrs dûr'ront!
31. Mins si sès fis abann'nèt mi lwè,
s'is tchèrèt foû d'mès djudj'mints,
32. s'is wèzèt prôfaner mès lwès,
s'is n'tûzèt pus a mès ôrdes,
33. adon a côp d'vèdjes
dji vinrè 'lzès pûni d'leûs pètchîs,
par totès-sôrs di målès-aweûrs
dj'èlzès pûnirè di m'tini tièsse!
34. Mins mågré çoula,
dji n'rindrè nin gråce sins èfèts,
por lu,
dji n'f'rè nin mintî m'fidélité.
35. Dji n'louk'rè nin d'hôt so mi-aliyance,
dji n'rimagn'rè nin l'parole di m'boke.
36. Es m'sint'té dji n'fêt qu'on seûl sèrmint!
Po Dåvid, va-dju mintî?
37. Si lignèdje dûr'rè a jamåy,
ad'lé mi, s'trône èst parèy å solo!
38. Come li leune i s'èlîve po tofér,
il èst l'fidèle tèmon dès cîrs.
39. Mins portant
vos v's avez rèbèlé,
tot r'drèssant vosse tièsse
vos v's avez èmonté disconte li Mèssîye.
40. Vos avez distrût l'aliyance di vosse chèrviteû,
vos avez hèrtchî èl poûssîre si rwèyål bindè.
41. V's avez abatou totes sès fôrtificåcions,
mètant a rin totes sès fôrterèsses.
42. Tos lès-cis qu'passît so l'vôye èl ravadjît,
il a dim'nou l'rîrèye di sès vwèzins.
43. C'èst l'dreûte dès-cis qu'l'acåblît
qui v's avez mètou a l'oneûr,
Vos 'lzî avez tél'mint lèyî fé
qui sès innemis s'ènnè rafiyèt tot!
44. V's avez distoûrné l'vigreûsté di si-èpèye,
vos l'avez lèyî flåwi å mitan dèl bataye!
45. Si glwére a pièrdou tote si loumîre,
v's avez r'vièrsé s'trône al tére!
46. V's avez racoûrci lès djoûs di s'vigreûsté
èt v'l'avez rafûlé d'honte!
47. Disqu'a qwand Signeûr,
alez-v' porsûre a v'catchî?
Disqu'a qwand vosse fureûr
va-t-èle blamer tot parèy qu'on fouwå?
48. Sov'nez-v' di mi:
qu'èst l'durêye dèl vèye?
Es qué vûde av don crèyé
tos lès fis d'l'ome?
49. Wice è-st-i l'ome
qui poreût viker sins måy mori?
Lisqué poreût såver si-åme
dèl min d'l'infér?
50. Wice don sont vos gråces,
vos anchinnès gråces?
Signeûr, ès vosse fidélité,
vos l'avîz portant promètou a Dåvid!
51. Djan Signeûr,
sov'nez-v' dèl manîre qui n's èstans rabahî,
dj'a l'pwès so lès rins
di tos lès peûpes dèl tére,
52. èt par zèls,
Signeûr vos innemis insultèt,
par zèls,is insultèt lès traces di vosse Mèssîye.
53. Nosse Diu èst bèni a jamåy,
åmen, åmen.
85-86-87-88-89-90-91-92-93-94-95-96-97-98-99-100-101-102-103-104-105-106-107-108-109-110
1à22 - 23à52 - 53à85 - 110à131 - 132à150
Psaume 90 (Vulgate 89) Po d'vant Diu l'ome ni fêt nin l'pwès!
1 Priyîre d'a Moïse, l'ome d'å bon Diu:
Signeûr,
ås difèrints adjes dès adjes,
po nos-ôtes
vos avez todi stu on rèfûdje.
2. Bin d'vant qui lès hôteûrs ni crèhèsse,
qui l't'tére èt l'monde n'èstasse mètou so pîd,
d'étèrnité an étèrnité
vos èstîz Diu.
3. Tot d'hant : "Alez-r'-z-è fi d'ome"
vos fez 'nnè raler l'ome èl poûssîre.
4. Ca ès vosse manîre dè veûy:
dès mèyes d'annêyes ni sont nin pus por vos
qui l'djoû d'îr qui passa,
èles sont tot fî parèy
a 'ne vidjîle di nut'.
5. Vos 'lz' èpwèrtez:
èles sont come on somèy,
èles sont tot fî parèy åx jèbes
qui morèt so l'å matin,
6. tot timpe èles florihèt pwis passèt,
l'al nut, on mète li få d'vins
adon èles souwèt totes.
7. Ca èl fåt bin dire:
vosse colére nos lêt vûde di tote fwèce,
vosse fureûr nos fêt piède li tièsse.
8. Vos mètez tos nos fôrfêts po d'vant vos,
vous loukîz nos s'crèts
èl loumîre di vosse vizèdje,
9. ca d'zos vosse colére
nos djoûs passèt reût-a-bale,
tot parèy å mûzèdje
nos annêyes si ravalèt 'ne après l'ôte.
10. Li tins d'nosse vicårèye èst d'sep'tante ans,
lès pus vigreûs arivèt kék'fèyes a catrè-vint.
Voleûr ènn'aveûr dèl fîr'té, ènn'èsse grandiveûs,
c'èst s'diner bêcôp d'ponnes al vûde,
ca nos èstans rad'mint bouhîs djus,
adon nos nos ènèrans!
11. Quî k'nohe li rudeûr di vosse colére?
Nosse sogne di vos è-st-ossi fwète
qui l'fwèce di vosse fureûr!
12. Aprindez nos a bin compter nos djoûs,
nos ariv'rans-st-insi å coûr dèl sûtisté!
13. Riv'nez, Signeûr, disk'a qwand?
pardonez åhèy'mint a vos chèrviteûs!
14. Dês l'å matin
qui vosse gråce nos lêt tot r'pahou,
chaskeun' dès djoûs nos f'rans fièsse
ca nos k'noh'rans l'djôye!
15. Fes nos rafiyî ès vosse djôye:
ot'tant d'joûs qui vos nos avez pûni,
ot'tant d'annêyes qui n's avans stu ravadjîs.
16. Qui vos chèrviteûs vèyèsse finål'mint voste-ovrèdje,
qui leûs èfants vèyèsse li sclat d'vosse loumîre!
17. Qui l'doûceûr d'å Signeûr nosse Diu rispwèze sor nos!
Por nos, volez-v' bin afèrmî l'ovrèdje di nos mins!
Awè, l'ovrèdje di nos mins... rafèrmihez-l'!
85-86-87-88-89-90-91-92-93-94-95-96-97-98-99-100-101-102-103-104-105-106-107-108-109-110
1à22 - 23à52 - 53à85 - 110à131 - 132à150
Psaume 91 (Vulgate 90) Deux versions . Li fwèce di Diu disfind sès binamés.
1. Li ci qui va lodjî èl catche
di "Ci qu'èst l'pus hôt",
li ci qui passe li nut ès l'ombe
di "Ci qu'èst l'pus fwêrt",
2. ci-la pou dire:
"Oh Diu mi rèfûdje èt m'abri,
mi Signeûr, ès qui dji m'lèye alet!"
3. Lu seûl ti råye å cèp dè trakeûx,
ti sètche èrî dèl trape di mwért.
4. Es s'ploumèdje i t'a tèhou on rèfûdje:
po d'zos sès éles ti trouves n'cwène a houte;
Si brès èst årmeûre èt muraye.
5. N'åye nole sogne:
dèl hiède di tchins groûlant tote nute,,
dèl flèche qui vole dè djoû,
6. dèl pèsse qui toûrnikêye èl neûristé,
dèl pufkène si stårant so l'cop d'doze eûres.
7. Qu'ènnè tome mèye a t'costé,
dès dihin.nes di mèyes a t'dreûte,
di twè, rin n'wèz'rè s'aprocher.
8. T'årès trop pô d'tès deûs-oûys
po loukî tote cisse poûriteûre;
c'èst çoula l'salêre dès rèsprovés!
9. Come ti fês dè Signeûr ti ratrèt,
dè fwért-Hôt lu-minme ti fôrteresse,
10. li ravadje ni sèrè nin stindou disqu'a twè
èt d'vins t'tente, li côp ni t'ac'surè nin.
11. Ca il a d'né ôrde a sès andjes,
di v'ni ad'lé twè èt d'aveûr l'oûy
po t'wårder so totes tès vôyes:
12. avou leûs mins is vont t'èlèver
tot prindant po d'zos lès brès,
di sogne qui so lès pîres
t'pîd ni s'fêsse acrotchî;
13. so l'liyon èt so l'vipére ti porès roter,
ti tripèlerès li p'tit dè liyon èt l' dragon.
14. Pwicequ'i s'atèle a mi
djèl sètche foû di spèheûr,
a l'bone plèce djèl monte a reû brès,
pace qu'i k'noh mi nom.
15. Après mi, i brê on côp:
al vole dji lî rèspond;
avou lu, Mi, dji sos!
Djèl risètche di d'vins sès transes
èt dji li fê ôneûr d'ine cråsse eûrêye.
16. I sèrè r'pahou di saqwantès djoûs
èt di m'boneûr djèl fê sô.
version2
Psaume 91 (Vulgate 90) Li pwissance dè bon Diu ahouwe li-ci qu'lî èst fidèle.
1. Li ci qui d'meûre ès s'crèt dè bon Diu
s'mète a houte ès l'ombe dè grand Mêsse.
2. Dji djåze å Signeûr:
c'èst Lu m'rèfûdje, mi ç'tadèle,
c'èst Lu qu'èst m'Diu,
c'èst-st-ès Lu qu'dji m'abann'nèye.
3. Ca Lu seûl
ti råye foû dè cèp dè trak'neû,
Lu seûl
t'èspètche di t'fé distrûre.
4. I t'coûve di sès grandès plomes,
èt t'ès a houte po d'zos sès éles;
por twè s'brès' è-st-ine prôtècsion,
i t'chèrvirè po t'disfinde.
5. Ti n'ricrindrè nin:
lès målès sognes di dèl nut',
li flèche qui vole dè djoû,
6. li pèsse qui tchèrèye ès l'ombe,
li pufkène ravadjant å grand djoû.
7. Qu'ad'lé twè,
ènnè tome on mèye,
qu'a t'dreûte,
ènnè tome minme saqwante mèyes,
por twè,
rin n'sårè f'ac'sûre.
8. Tot seû,
èt d'tos tès oûys,
louke la d'vant twè,
veûs l'salêre dès rèsprovés!
9. Come por twè,
li Signeûr lu-minme èst-st-on rèfûdje,
qu'ès grand Mêsse,
t'as fêt ti d'morance,
10. li ravadje ni såreût m'ni disk'a twè,
nou måleûr ni pout t'toumer so lès rins.
11. Ca por twè Il a-st-èvoyî sès andjes,
po m'ni t'wårder so totes tès vôyes.
12. C'è-st-a deûs mins qu'is vont t'supwèrter
di sogne qui t'pîd ni si stoke so lès pîres.
13. Ti rot'rès so l'liyon èt so l'vipére
ti språtch'rès li p'tit dè liyon
èt min.me li dragon.
14. Pace qu'i m'veût voltî,
dji m'va l'disgadjî,
pace qu'i k'nohe mi nom,
dji sårè l'èlèver!
15. I m'houke èt dj'lî rèspond so l'côp:
Mi, dji so-st-avou lu!
Djèl risètche foû d'sès transes
èt djèl glôrifiyèye!
16. Al longue dès djoûs
dji f'rè qu'sèrè r'pahou,
Di tos sès oûys ,
dji lî f'rè loukî m'dilîvrance!
85-86-87-88-89-90-91-92-93-94-95-96-97-98-99-100-101-102-103-104-105-106-107-108-109-110
1à22 - 23à52 - 53à85 - 110à131 - 132à150
Psaume 92 (Vulgate 91) Tchant dè djusse.
1. Tchant, îme, po l'djoû dè Sabat.
2. Il èst bon di louwer l'Signeûr,
di tchanter vosse nom, grand Mêsse,
3. di fé sèpi vosse gråce,
dês l'å matin,
di fé k'nohe vosse fidélité
al dilongue dès nuts',
4. tot djouwant so lès instrumints a cwèdes,
avou-st-on mûzèdje di guitåre.
5. Ca par voste-oûve, Signeûr,
vos m'avez d'né l'djôye;
dji tchant'rè lès mèrvèyes
qu'ont stu fêtes par vos mins.
6. Qui v's avez fêt dès grandès oûves, Signeûr!
Qu'i fêt målåhèye di moussî d'vins vos pinsêyes!
7. L'ome qu'èst bièsse ni pout saveûr,
li sot ni veût nin clér ès tot çoula!
8. Lès rèprovés s'drovièt come lès fleûrs,
lès ovrîs dè må crèhèt come lès jèbes,
mins onk come l'ôte
is sèront rabatous a jamåy!
9. Mins Vos Signeûr,
Vos èstez grand, nôbe,
èlèvé a jamåy!
10. Ca Signeûr,
vochal vos innemis,
vochal qui vos innemis pèrihèt,
tos lès ovrîs dè må sèront d'hotés.
11. Vos èlèvez m'cwène
come li-cisse d'on bufe,
dji d'bèrdêye d'on fris' ôl'mint.
12. Mi-oûy a d'hoviért tos lès catchîs
qui m'tinît a l'oûy,
mi-orèye a-st-oyou mès atakants
qui sont-st-è rèvole sor mi!
13. Li djusse florih come lès pus bês åbes,
i crèh come li cêde dè Liban.
14. Qwand is sont r'piqués èl mohone d'å Signeûr
is florihèt so lès parvis d'a nosse Diu.
15. Is d'nèt todi dès frûts
minme ès leû viyèsse,
ca is d'monèt plin d'feû
adon is sont co bin vért
16 po fé sèpi l'dreûteûr d'å Signeûr,
ca c'èst Lu qu'èst m'rotche:
ca ès Lu
i-n-a rin d'indjusse!
85-86-87-88-89-90-91-92-93-94-95-96-97-98-99-100-101-102-103-104-105-106-107-108-109-110
1à22 - 23à52 - 53à85 - 110à131 - 132à150
Psaume 93 (Vulgate 92) Nosse Diu èst li Rwè dèl tére ètîre.
1. Li Signeûr ringne,
li grandeûr èl drapêye,
awè, èle drapêye li Signeûr,
èt l'fwèce èl cinglêye:
li tére ètîre si batih, s'èlîve,
sins po tot ot'tant halcoter!
2. Dês li k'minc'mint
vosse trône a stu drèssî,
ca dispôy tofér,
c'èst Vos!
3. Signeûr,
lès fleûves fêt ôre,
lès fleûves fêt ôre leû vwès,
is f'ront ôre leû fracas,
4. Pus qu'l'arèdje dès grantès-êwes,
pus qu'lès pwissants côps dès vågues dèl mér,
li Signeûr èst plin d'fwèce
èl vôsseûre dès cîrs.
5. Al vrêye, ci n'èst nin on sondje,
nos polans vor'mint compter sor Vos,
Signeûr,
li sint'té va bin a vosse mohone,
al dilongue dès djoûs.
85-86-87-88-89-90-91-92-93-94-95-96-97-98-99-100-101-102-103-104-105-106-107-108-109-110
1à22 - 23à52 - 53à85 - 110à131 - 132à150
Psaume 94 (Vulgate 93) Li bon Diu èst l'Diu dèl djustice.
1 Diu dès vindjinces,
Signeûr,
Diu dès vindjinces,
lûhez don d'cint mèye feûs!
2. Aspitez,
vos l'djudje dèl tére,
po m'ni payî å grandiveûs
li salêre qu'èlzî r'vint!
3. Signeûr,
disqu'a qwand don lès måvas?
Disqu'a qwand lès måvas
åront-is co li d'zeûr?
4. Is n'savèt pus çou qu'is d'hèt,
is djåzèt come dès afrontés,
is s'rècrèstèt tos
zèls qui fôrdjèt l'må.
5. Is broyèt vosse peûpe, Signeûr,
is språtchèt voste-èritèdje,
6. is touwèt l'vève èt l'ètrindjîr,
is marcåssèt lès ôrfulins.
7. Is d'hèt:
Diu nèl veûrè nin,
li Diu d'a Djåcob
ni veût nin clér assé!"
8. Peûpe di d'mèy-doûs,
sayîz don vos-minme d'î vèyî clér!
Sot-bwègnes,
qwand don alez-v' comprinde?
9. Est-ce qui l'planteû d'l'orèye
n'ôreût nin?
Est-ce qi l'fôrdjeû d'l'oûy
sèreût l'seûl a n'nin veûy?
10. Li r'drèsseû dès peûpes
ni pûnireût-i nin,
Lu qui droûve l'ome
a li k'nohance?
11. Diu k'nohe tot çou qu'l'ome vout fé,
èt tout çoula èst glôriyole!
12 Ureûs èst l'ome qui v'corèdjîz, Signeûr,
vos l'aminez a inmer vosse lwè!
13. Vos l'rapåftez å djoû dè måleûr,
so l'tins qui l'trô dè mavå s'fêt.
14. Ca l'Signeûr ni lêt nin la s'peûpe,
Is n'abann'nêye nin si-èritèdje.
15. Li djudj'mint r'vint vè l'djustice,
tos lès dreûts coûrs li fêt côrtèje.
16. Quî, por mi,
va si stamper disconte lès canayes?
Quî, por mi,
wèz'rè s'mèz'rer avou lès fôrdjeûs d'må?
17. Si l'bon Diu
n'aveût nin m'nou a m'sécoûrs,
i-n-a on bê vî tins
qui mi-åme håbit'reût l'silince.
18. Qwand dji d'héve:
"Mi pîd halcotêye."
Signeûr,
vosse gråce mi rapåftéve.
19. Es plin mitan d'mès cas'mints d'tièsse,
vos rapåftèdjes fêt djouwî mi-åme.
20. Avez-v' dès acwintances
avou l'trône dèl pufkène,
lu qui s'chèv dèl lwè
po fôrdjî l'mih-mah?
21. Is s'ècorèdjèt turtos
a-z-aller disconte l'åme dès djusses,
is tchèrdjèt d'fåtes
li song' di l'inocint.
22. Awè, por mi,
li bon Diu è-st-ine vrêye ç'tadèle,
nosse Diu èst l'rotche wice qui dj'a m'rèfûdje.
23. I r'toûne disconte zèls
leû prôpe rudeûr,
Elz'a rabatou ès leû må,
Li Signeûr nosse Diu
va 'lzès rèzoûde a rin!
85-86-87-88-89-90-91-92-93-94-95-96-97-98-99-100-101-102-103-104-105-106-107-108-109-110
1à22 - 23à52 - 53à85 - 110à131 - 132à150
Psaume 95 (Vulgate 94) Invitåcion al priyîre.
1. Alans tchanter l'Signeûr!
Ni rat'nans nin nos cris d'djôye
po-z-adègnî l'rotche di nosse dilîvrance!
2. Par lès gråces acontans s'vizèdje,
adègnans-l' avou dès tchants!
3. Ca l'Signeûr èst l'grand Mêsse,
li Rwè pus grand qu'tos lès dius.
4. I tint ès s'min tos lès mistéres dèl tére,
totes lès copètes dès hôteûrs sont d'a Lu.
5. Li mér èst d'a sonk,
ca èl fat lu-minme,
c'èst-st-ossi d'sès propès mins
qu'I prustihat 'ne tére bin spèsse.
6. Alans nos clintchî,
alans nos mète a gngnos,
alans nos stårer po d'vant l'Signeûr,
ca noste-ôteûr c'èst Lu!
7. Il èst nosse Diu,
nos èstans l'peûpe di s'pahis',
li tropê qu'è-st-a s'min!
8. Si po l'djoû d'oûy
vos polîz ôre si vwès.
Ni r'ssèrez nin vosse coûr come a Mériba,
come ès dèzêrt å djoû d'a Massa,
9. La wice qui vos péres mi tem'tît,
la wice qu'is m'ont sayî,
èt portant turtos avît vèyou
tot çou qu'dj'aveûs fêt por zèls.
10. Carantès annêyes dj'èlz'a-st-abôminé,
èt sor zèls dj'a minme dit:
"Is ont l'coûr qui n'sé t'ni è plèce,
is n'kinohèt nin mès vôyes."
11. Adon ès m'colére dj'èlzî a djuré
qui jamåy is n'parvinrît ès m'påhûl'té!
85-86-87-88-89-90-91-92-93-94-95-96-97-98-99-100-101-102-103-104-105-106-107-108-109-110
1à22 - 23à52 - 53à85 - 110à131 - 132à150
Psaume 96 (Vulgate 95) Deux versions. Rik'noh nosse Diu!
1. Tchantez po Jahvé on noû tchant!
Tchantez po Jahvé tote li tére!
2. Tchantez po Jahvé,
bènihez s'nom;
djoû après djoû,
fez sèpi s'salut!
3. D'hez s'glwère a tos lès peûpes,
fez k'noh sès mèrvèyes åx nåcions!
4. Ca Jahvé èst grand,
èt deût èsse fwért fièstî:
il èst l'pus tèribe
di tos lès ôtès dius!
5. Les dius dès nåcions
sont turtos dès îdoles;
Jahvé, Lu, a fêt lès cîrs!
6. Lès bonnès manîres èl grandeûr
riluhèt so s'vizèdje,
li fwèce èl glwère
sont-st-ès s'mohone!
7. Rindez a Jahvé,
famile dès peûpes,
rindez a Jahvé
li glwére èl fwèce!
8. Rindez a Jahvé
li glwére di s'nom:
vèrs Lu, èlèvez on prézint,
vinez d'vins sès parvis.
9. Mètez-v' a gngnos po Jahvé
ès s'sinte mèrvèye!
Fruzihez d'vant s'vizèdje
vos, l'tére ètîre!
10. Fez sèpi a tos lès peûpes:
"Jahvé èst li rwè:
i batih li monde,
èl monde ni halcotèye nin!
I djudj'rè l'monde èl dreûteûr!
11 Qui lès cîrs si rèdjouwihèsse,
qui l'tére potche di djôye!
Qui l'mér rudjih
ès tote si ètîrté!
12. Qui lès tchamps tronnèsse di djôye
avou tot çou qu'î tchoûke,
adon lès åbes dès bwès
f'ront fièsse tot tchantant,
13. d'vant l'vizèdje d'a Jahvé:
ca i vinrè,
i vinrè po djudjer l'tére!
I djudj'rè l'monde ès s'djustice,
èt tos lès peûpes ès s'vrêye.
version2
Psaume 96 (Vulgate 95) Li bon Diu èst rwè èt Djudje.
1. Tchantez on noû tchant po l'Signeûr!
Tchantez po l'Signeûr, vos l'tére ètîre!
2. Tchantez po l'Signeûr,
bènihez s'Nom!
Djoû après djoû,
fez k'nohe si d'lîvrance!
3. Dihez s'glwère avå lès peûpes,
dihez sès hôts fêts avå lès nåcions.
4. Ca l'Signeûr èst grand,
il èst fièstî avou rèspèt,
il èst pus tèribe qui tos lès dius,
5. les dius dès nåcions sont turtos dès îdoles,
li Signeûr a fêt lès cîrs.
6. Li grandeûr èt l'oneûr
luhèt so s'vizèdje,
tot fant qu'ès s'palå
li glwère èt l'pwissance sont-st-avou Lu.
7. Rik'nohez a Signeûr,
vos totes lès familes dès peûpes,
rik'nohez å Signeûr
li glwére èt l'pwissance!
8. Rindez å Signeûr li glwére di s'nom!
Apwèrtez vos ofrandes,
moussîz d'vins sès parvis!
9. Adorez l'Signeûr èl sinte'té di s'glwére,
fruzihez d'vant s'vizèdje
vos, l'tére tote ètîre!
10. Brêyez a tos lès peûpes:
"Li Signeûr ringne:
li monde si batih sins halcoter!
I djudje lès peûpes avou dreûteûr!
11 Qui lès cîrs si potchèsse di djôye,
èt qu'li tére fêsse fièsse!
Qui l'mér rudjih,
èt qu'rudjih avou lèye
tot çou qui vike divins!
12. Qui lès tchamps fruzihèsse,
èt qu'fruzih ossi
tot çou qui crèh dissus!
Adon lès åbes dès grands bwès
si mèt'ront-st-a tchanter.
13. Et tot çoula s'f'rèt
po d'vant l'vizèdje d'å Signeûr:
ca i vint,
ca i vint djudjî l'tére,
I djudje li monde ès s'djustice,
I djudje lès nåcions sorlon s'vrêye!
85-86-87-88-89-90-91-92-93-94-95-96-97-98-99-100-101-102-103-104-105-106-107-108-109-110
1à22 - 23à52 - 53à85 - 110à131 - 132à150
Psaume 97 (Vulgate 96) Deux versions. Djôye èt k'mahèdje!
1. Jahvé èst rwè!
Qui l'tére potche di djôye!
Qui totes lès îles s'ènnè rafiyèsse!
2. Li nulèye èt neûristé
sont-st-ès s'vwèzinèdje,
li djustice èt l' dreût
sont lès fonn'mints di s'sîdje.
3. On feû coûrt po d'vant Lu:
i blame èt èclawe sès innemis!
4. Di sès côps d'aloumîre
li monde ènnè tot èspris:
li tére èl veût,
èt so l'côp ènnè tron.ne tote!
5. Po d'vant Jahvé,
lès hôteûrs fondèt come dèl cîre,
po d'vant Jahvé,
li mêsse dèl tére.
6. Lès cîrs fêt sèpi
qui s'djustice arive
èt qu'totes lès nåcions
poront loukî s'glwère!
7. Qui lès èsclåves dès îdoles
rodjihèsse divant turtos!
Qu'is sèyèsse djinné
lès cis qui s'glorifiyèt d'vins dès rins!
Ployîz-v' è deûs d'vant Lu
vos turtos lès dius dès peûpes!
8. Sion l'ètind,
èle potche di djôye!
Lès crapôdes di Djudas s'rafiyèt
a cåse dès djudj'mints d'a Jahvé.
9. Ca Vos Jahvé,
v's èstez l'pus hôt
al copète di tote li tére!
Vos èstez louwanjé sins mèzeûre,
Vos, pus grand qui tos lès dius!
10. Binamés d'a Jahvé,
hayez l'må!
Jahvé wåde l'åme di sès sints,
i lès sètche foû dès mins dès rèprovés.
11. Li loumîre djèrmêye po l'djusse,
li fièsse, lèye, djèrmêye
po lès dreûts coûrs.
12. Vos lès djusses,
rafiyîz-v' ès Jahvé!
Louwanjez l'mémwère di s'sint'té!
version2
Psaume 97 (Vulgate 96) Nosse Diu èlz'a turtos batou!
1. Li Signeûr ringne:
li tére è-st-è fièsse,
saqwantès îles brêyèt leû djôye!
2. Li nulèye èt neûristé sont-st-åtou d'Lu,
si trône èst bati so l' djustice èt dreûteûr.
3. On feû coûrt po d'vant Lu:
èt tot blamant,
i toûne åtou d' sès innemis!
4. Di sès côps d'aloumîre
tote li crèyåcion è-st-illuminêye,
li tére èl veût,
li tére ènnè tronne tote!
5. Come dèl cîre mètowe so l'feû
lès hôteûrs fondèt po d'vant l'Signeûr,
po d'vant l'Signeûr di tote li tére!
6. Lès cîrs fêt sèpi s'djustice,
totes lès nåcions polèt veûy si glwère.
7. Tos lès èsclåves d'a l'îdole,
lès cis qui s'glorifiyèt d'vins lès fås dius,
turtos sèront rimplis d'honte.
Qui tos lès dius s'mètèsse a gngnos d'vant Lu!
8. Sion l'a-st-oyou,
èt èle fêt fièsse,
Signeûr, a cåse di vos djudj'mints
lès crapôdes d'a Djuda brêyèt leû djôye.
9. Ca Vos Signeûr,,
vos èstez l'grand mêsse di tote li tére,
vos èstez louwanjé sins mèzeûre,
Vos èstez pus fîr qui tos lès ôtès dius.
10. Fruzihants po l'Signeûr,
hèyez l'må!
Ci qui wårdèye l'åme di sès sints
èlzès sètche foû dès mins dès måvas.
11. Li loumîre djèrmêye po l'djusse,
ine grande djôye èst l'pårt dès coûrs dreûts.
12. Vos lès djusses,
rafiyîz-v' ès vosse Signeûr!
Vos lès djusses,
Louwez l'sov'nance di s'sint'té!
85-86-87-88-89-90-91-92-93-94-95-96-97-98-99-100-101-102-103-104-105-106-107-108-109-110
1à22 - 23à52 - 53à85 - 110à131 - 132à150
Psaume 98 (Vulgate 97) Deux versions. Li djudje dèl tére!
1. Tchantez po Jahvé on noû tchant:
ca il a fêt dès mèrvèyes!
Si dreûte, li brès' di s'sint'té,
por lu, rind lîbe!
2. Jahvé a fêt k'noh si salut,
d'zos lès oûys dès peûpes
i d'vwèle si djustice.
3. I s'sovin di s'amoûr,
di s'fidélité po l'mohone d'Israël:
minme lès corons dèl tére
ont vèyou l'salut d'nosse Diu!
4. Brêyez po Jahvé so tote li tére,
sclatez d'vins dès cris d'djôye,
tchantez èt djouwez!
5. Tchantez Jahvé so l'guitåre,
so l'guitåre å son dèl vwès,
avou dès trompètes,
èt å son dè cor.
6. Brêyez d'djôye po d'vant Jahvé!
7. Qui l'mér rudjih ès tote si ètîr'té,
li monde ètîr èt lès cis qu'î d'monèt!
8. Qui lès fleûves batèsse dès mins,
qui lès hôteûrs tchantèsse èssonne!
9. Po d'vant l'vizèdje d'a Jahvé,
ca i vint po djudjî l'tére.
I djudj'rè l'monde ès s'djustice,
èt lès peûpes ès s'dreûteûr!
version2
Psaume 98 (Vulgate 97) Li bon Diu èst l'djudje dèl tére.
1. Tchantez on noû tchant po l'Signeûr:
Il a fêt dès mèrvèyes;
si dreûte, li brès di s'sint'té,
rind lîbe ci qu'èst por Lu.
2. Li Signeûr fêt k'nohe si d'lîvrance,
d'zos lès oûys di tos lès peûpes
i d'vwèle si djustice.
3. Po l'mohone d'Israël,
I s'sovint di s'gråce èt di s'fidélité:
d'ine cwène a l'ôte dèl tére,
is contimplèt li d'lîvrance d'a nosse Diu.
4. Brêyez vosse djôye å Signeûr,
vos, tote li tére,
Rèsdondihez, sèyîz ès fièsse,
tchantez!
5. Awè, tchantez po l'Signeûr
tot djouwant dèl l'guitåre!
Djouwez dèl guitåre
tot tchantant d'vosse pus bèle vwès!
6. Avou lès trompètes,
avou l'vwès dè cor,
rèsdondihez po d'vant li rwè,
po d'vant li Rwè vosse Signeûr!
7. Qui l'mér rudjîh ès tote si ètîr'té,
Qui l'tére ètîre rudjîh,
qui tot qui d'meûre dissus rudjîh avou lèye!
8. Qui lès fleûves batèsse dès mins,
qui lès hôteûrs tchantèsse totes èssonne!
9. Et tot çoula po d'vant l'Signeûr,
ca il arive po djudjî l'tére:
I djudje li tére ès s'djustice,
I djudje lès nåcions ès s'dreûteûr!
85-86-87-88-89-90-91-92-93-94-95-96-97-98-99-100-101-102-103-104-105-106-107-108-109-110
1à22 - 23à52 - 53à85 - 110à131 - 132à150
Psaume 99 (Vulgate 98) Diu, rwè djuste èt sint.
1. C'èst Diu qu'èst Rwè:
èt lès peûpes tron.nèt!
I sîdje, pwèrté par lès andjes:
li tére ènnè halcotèye!
2. Jahvé èst grand ès Sion
bråmint å-dzeûr di totes lès nåcions.
3. Turtos fêt fièsse a s'nom grand èt tèribe,
ca c'èst Lu l'Sint!
4. Lu, li pus fwért dès rwès
inme li djustice.
5. Li dreût,
c'èst Lu qu'l'a mètou so pîd!
C'èst co Lu, qu'a stu mète è plèce
li dreûteûr èl djustice è Djåcob!
6. Moïse èt Aaron qu'èstît s'sès prétes,
èt Samuel on pwèrteû d'sès ôrdes,
houkît Jahvé,
èt Lu, èlzî rèspondéve!
7. Elzî djåza èl colone di nûlèyes;
zèls wårdît sès tèmwègnèdjes,
Lu èlzî d'na 'ne lwè!
8. Jahvé nosse Diu
vos 'lzî avez rèspondou!
Vos èstîz on Diu plin d'mizèricôr,
mins vindjeû d'leûs lêdès keûres.
9. Tchantez l'glwère d'a Jahvé nosse Diu!
Mètez-v' a gngnos so s'hôteûr di sint'té:
ca il èst sint, Lu, Jahvé!
version2
Psaume 99 (Vulgate 98) Li bon Diu èst-st-on Rwè sint èt djusse.
1. Li Signeûr ringne:
les nåcions ènnè sont d'vins lès doleûrs.
I trône, so lès andjes:
li tére halcotêye tote.
2. Li Signeûr èst grand ès Sion,
li Signeûr èst sins parèy
å-dzeûr di totes lès nåcions.
3. Avou bêcôp d'oneûrs
èles louwanjèt vosse nom
qu'èst-st-on nom grand èt tèribe:
Vos èstez Sint!
4. Li pwissance dè Rwès inme li djustice:
c'èst Vos qu'a crèyé l'dreûteûr,
èt c'èst co vos qui, ès Djåcob
a mètou è plèce li djudjmint èt l' djustice.
5. Di tot vosse coûr,
louwez l'Signeûr nosse Diu,
adjènihez-v' po d'vant l'passète di sès pîds:
Il èst sint!
6. Moïse èt Aaron, qu'èstît d's'sès prétes,
avou Samuel,on mèssèdjî di s'Nom,
ont brêt après l'Signeûr,
èlzî a rèspondou,
7. èlzî djåzéve èl colone di nûlèyes;
Is wårdît sès tèmwègnèdjes,
èlzî fat don d'ine lwè.
8. Signeûr nosse Diu
vos avez fêt çou qu'is v'dimandît,
por zèls vos avez stu:
on Diu qui pardone åhèy'mint,
on Diu qui s' vindje di leûs lêdès keûres.
9. Di tot vosse coûr louwez l'Signeûr nosse Diu!
Adjènihez-v' so l'hôteûr di s'sint'té,
ca il èst sint, l'Signeûr nosse Diu!
85-86-87-88-89-90-91-92-93-94-95-96-97-98-99-100-101-102-103-104-105-106-107-108-109-110
1à22 - 23à52 - 53à85 - 110à131 - 132à150
Psaume 100 (Vulgate 99) Deux version. Vosse peûpe!
1. Tchant po rinde gråce.
Fez rèsdondi vos cris d'djôye
d'ine cwène à l'ôte dèl tére!
2. Adôrer Jahvé èl djôye!
Vinez å d'vant Lu tot fant fièsse!
3. Vos d'vez l'saveûr:
Jahvé èst nosse Diu!
C'èst Lu qu'nos a fêt,
èt n's èstans a Lu!
Nos-èstans s'peûpe
èt lès bèrbis di s'bèrdjirèye!
4. Vinez vè sès pwètes
tot rindant gråce,
moussîz d'vins sès parvis
li louwanje al boke,
Tchantez Jahvé,
bènihez s'nom!
5. Ca Jahvé èst bon,
i nos a d'né s'amoûr po tofér!
Po lès sièkes a jamåy,
i nos sèrè todi fidèle!
version2
Psaume 100 (Vulgate 99) Tchant d'intrèye.
1. Tchant po rinde gråce:
Brêyez vosse djôye å Signeûr,
vos l' tére ètîre!
2. El djôye, chèrvez l'Signeûr,
vinez d'vant Lu li fièsse å coûr!
3. Sèpez-l':
Lu l'Signeûr èst Diu,
c'èst Lu qu'nos fat,
nos èstans-st-a Lu,
nos-èstans s'peûpe,
nos èstans lès bèrbis di s'pahis!
4. Vinez a sès pwètes
avou l'rik'nohance å coûr!
Vinez d'vins sès parvis
avou l'louwanje so lès lèpes!
Tchantez-l',
bènihez s'Nom!
5. Ca l'Signeûr èst bon,
nos avans s'gråce a jamåy!
Nos avans s'vrêye
po lès sièkes sins fin!
85-86-87-88-89-90-91-92-93-94-95-96-97-98-99-100-101-102-103-104-105-106-107-108-109-110
1à22 - 23à52 - 53à85 - 110à131 - 132à150
Psaume 101 (Vulgate 100) Deux versions. Sondje!
1. D'a Dåvid. On tchant.
Dji tchant'rè l'amoûr èl djustice,
por vos Jahvé, dji vou djouwer!
2. Dji sûrè l'vôye di l'ènocinse,
qui l'fidélité m'rafûlèye!
Dji vik'rè avou on coûr todi peûr
å mitan di s'mohone.
3. I n'a pont d'plèce po d'vant mès oûys
po tot çou qu'èst måva!
Dji n'sé oder lès calin'rèyes,
èles prindrît co bin rècènes ès mi!
4. Lon èri d'mi l'coûr twèrdou,
li må, dji nèl vou k'noh!
5. Li ci qui s'catche po k'djåzer s'fré,
djèl rèsoûdrè a rin!
Des grandiveûs oûys,
on coûr qu'fêt l'inflé,
dji n'lès supwèrt'rè pus!
6. Mès oûys loukèt lès binamés d'so l'tére,
cès-la, qui d'monèsse avou mi!
Li ci qui rote so l'vôye di l'ènocinse,
ci-la awè, i m'chèrvirè.
7. Li toûrsiveûs ni wèz'reût
s'tini d'vant mès oûys.
8. Tos lès djoûs, tot timpe:
dji rèzoû a rin lès sins-lwè dè payîs,
po råyî tot quî fêt l'må
foû dèl vôye d'a Jahvé.
version2
Psaume 101 (Vulgate 100) Li mureû dès princes.
1. D'a Dåvid. On tchant:
Dji tchante li gråce èt l'djudj'mint,
dji v'lowe tot v'fant fièsse, Signeûr!
2. Et dji tûze al vôye di l'inocinse,
å tins wice qui vos vinrez vèr mi.
Dji tchèrèye ès l'inocince di m' coûr
tot-avå m'mohone.
3. Dji n'sû nin minme dès oûys
lès djåzèdjes dè distrûheûs,
dji hé l'måle condwite:
èle ni prind nin rècène sor mi!
4. Li coûr disbåtchî passe å lon d'mi,
i n'sét m'oder!
Dji n'kinoh nin l'må!
5. Tot qui djåze lès-ôtes covièt'mint
djèl rèsoûdrè a rin,
dji n'supwèt'rè pus ni l'coûr inflé,
ni lès fîrès oûys dè grandiveûs.
6. Dj'a tapé mès oûys so lès fidéles dèl tére
po qu'is d'morèsse avou mi;
Ci qui rote so l'vôye di l'inocinse,
mi chèv'.
7. Li toûrsiveûs ni d'mone nin ès m'mohone,
li minteûs ni si stampe nin d'zos m'narène!
8. Tot timpe å matin,
dji rèzoûd a rin tos lès sins-lwès dèl tére,
po råyî tot foû dèl vèye d'å Signeûr
tos lès ovrîs dè må!
85-86-87-88-89-90-91-92-93-94-95-96-97-98-99-100-101-102-103-104-105-106-107-108-109-110
1à22 - 23à52 - 53à85 - 110à131 - 132à150
Psaume 102 (Vulgate 101) Deux versions. Jahvé, èspwér di tos lès målèreûs.
1. Priyîre d'on målèreûs qui s'sint flåwî èt qui ståre si plinte divant Jahvé.
Suplicåcion.
2. Jahvé, ètindez m'priyîre,
qui m'èclameûre parvinse disqu'a vos!
3. Ni v'catchîz pus por mi
lès djoûs qu'dji sos pièrdou,
å contrêre,
tindez voste orèye di m'costé!
Qwand dji brê après vos,
dispètchîz-v' d'èsse favoråbe!
(plintes)
4. Ca mès djoûs ènnè vont à foumîre,
mès ohês broûlèt come dès vîs bwès.
5. Parèy åx crèsses mi coûr èst tot souwé,
dj'ènnè roûvèye dè magnî m'pan.
6. A fwèce dè djèmi,
d'èsse tot k'magnî par li doleûr,
dji n'a pus qu'li pê so lès ohês!
7. Dji ravize lès tchåwes dè clokî,
dji sos come li houlote dès rwènes.
8. Dji n'sé dwèrmi,
dji sos come l'oûhê disseûlé
qu'èst so l'bwèrd d'on teût!
9. Tote djoû mès innemis m'måltrêtèt;
zèls, qui m'lès d'hît dèdja totes
mådihèt co pôr avou m'nom!
10. Awè, po dè pan dji magne dèl cindrèye
èt mès låmes corèt ès m'bwèsson!
11. Tout çoula a cåse di vosse colère,
pace qui v's èstîz è fureûr:
ca vos m'avîz èlèvé,
pwis, vos m'avez r'tapé èrî d'vos!
12. Mès djoûs ènnè vont come 'ne ombe,
parèy åx jèbes, dji sowe tot!
13. Mins vos Jahvé, v's èstez po tofér;
d'in-adje a l'ôte on dirè vos mèrvèyes.
(li salut qu'Jahvé vout d'né a Sion)
14. Vos v'drèssîz!
vos avez pîtché d'Sion?
C'èst l'moumint d'lî fé gråce,
awè, li tins a v'nou.
15. Vèyez-v', vos chèrviteûs:
is sont-st-atachés åx pîres di Sion,
lès lames åx oûys
ènnè r'loukèt sès rwènes.
16. Adon lès payins hap'ront sogne da Jahvé,
èt lès rwès dèl tére, zèls,
åront sogne di s'glwère,
17. ca Jahvé r'batirè Sion,
i s'î mosturrè ès tote si glwère!
18. I s'toûnrè vè lès povès djins qu'èl priyèt,
i n'ritchouk'rè nin leûs priyîres.
19. Qui çoula seûye sicrit
po lès djènèråcions di d'min,
èt lès peûpes di cès tins la,
tchant'ront l'glwère d'a Jahvé.
20. Di tote si sint'té Jahvé nos r'louke,
dè cîr, Jahvé louke li tére,
21. po-z-ètinde li rôkêt dè rèssèré,
po libèrer lès fis dèl mwért,
22. po qu'ès Sion
on fièstéye li nom d'a Jahvé,
po qu'a Jéruzalèm
on î tchante sès louwanjes,
23 qwand lès peûpes èt lès rwèyômes
s'mètront-st-èssonne po chèrvî Jahvé.
(novèlès suplicåcions, novèlès louwanjes)
24. Avå lès vôyes
vos m'fez piède mès fwèces,
vos m'diminouwez l'nombe
dès djoûs a viker!
25. Et dji v's a dit:
Jahvé, ni m'riprindez nin å mitan d'mès djoûs,
ca por vos, vos annèyes vont sins r'låke,
d'ine djènèråcion al sûvante!
26. D'vins l'tins v's avez fêt l'tére,
lès cîrs ont stu fêt avou vos mins!
27. Zèls sèront-st-alouwés
qui vos, v'sèrez todi la!
Tot come dès mous'mints
is toûn'ront a rin!
Come on candje di tch'mîhe
vos lès candjîz,
28. mins vos, vos d'monez todi parèy,
vos annèyes n'ont nole fin!
29. Lès fis d'vos chèrviteûs åront plèce å solo,
leû lignèdje si rafwèrcirè po d'vant vos!
version2
Psaume 102 (Vulgate 101) Nosse Diu èst l' èspwér di tos lès målèreûs.
1. Priyîre d'on p'tit qui tome cåzî flåwe èt qu'disbale sès mizéres po d'vant l'Signeûr
2. Signeûr, oyez m'priyîre,
qui mi-èclameûre parvinse ad'lé vos!
3. Ni m'catchîz pus vosse vizèdje
lès djoûs qu'dji so må pris!
Tindez don voste-orèye di m'costé!
lès djoûs qu' dji brê après vos!
Abèye, dispètchîz-v',
fez don çou qu'dji v'dimande!
4. Tél dèl foumîre, mes djoûs flåwihèt tot èvôye,
mès ohês broûlèt tot parèy ås tchêm'nis!.
5. Tot fî parèy qui dès jèbes,
mi coûr èst sètch èt tot flouwi:
dji roûvèye dè magnî m'pan!
6. As rèdondih'mints di m'doleûr
mès ohês moussèt d'vins mès tchårs.
7. Dji ravize lès tchåwes dè clokî,
dji so parèy al houlote dès rwènes.
8. Dji m'ratin dè dwèrmi,
dji so parèy a l'oûhê disseûlé
la-hôt so l'teût!
9. Mès innemis m'kihiyèt tos lès djoûs,
lès drouk'tés djurèt conte di mi.
10. Dji magne dès cindes al plèce dè pan,
mès låmes si mahèt a çou qu'dji beû,
11. qwand dji veû l'colère so vosse vizèdje,,
qwand dji veû qu'vos tronlez d'fureûr,
ca vos m'avez r'lèvé
po m' ritaper å lon!
12. Mès djoûs discrèhèt tél ine ombe,
èt mi, parèy åx jèbes, dji sowe tot.
13. Mins vos Signeûr, vos èstez po tofér,
vosse mémwére èst po tos lès adjes.
14. Vos v's astampez,
vos v'fez må d'Sion:
ca c'èst l'moumint d'lî fé gråce,
li tins a m'nou!
15. Vos chèrviteûs sont bleûs d'sès pîres,
disqu'a sès poussîres qu'is vèyèt voltî!
16. Lès peûpes sèront tot plin d'rèspèt
po l'nom d'å Signeûr,
tos lès rwès dèl tére si fant tot p'tit,
rik'noh'ront vosse glwère,
17. ca l'Signeûr ribatih Sion,
I s'î mosteûre ès tote si glwère.
18. Il aconte li priyîre dès minåbes,
I n'rigrègne nin so leûs priyîres.
19. Qui çoula seûye sicrît po l'dièrin tins,
wice qui l' peûpe qui deût co èsse fêt
tchant'rè l'glwère d'å Signeûr.
20. Ca di tote li hôteûr di s' sint'té
li bon Diu contimple,
di la-d'zeûr divins lès cîrs,
nosse Diu louke so l' tére:
21. po mî ôre li rôkê d'l'èlahî,
po disgadjî lès fis dès mins dèl mwért.
22. Po qu'ès Sion i polèsse fé fièsse
è l'oneûr di s'Nom
po qu'i tchantèsse sès louwanjes
a Jèruzalèm:
23 qwand lès nåcions î sèront totes èssonne,
qu'avou lès rwès èlles chèrviront l'Signeûr
24. So l' vôye Il a-st-alouwé totes mès fwèces,
Il a racoûrcit mès djoûs.
25. Adon, a nosse Diu, d'ja d'mandé:
" Ni m'riprindez nin è plin mitan d'mès djoûs,
qwand por Vos,
vos annêyes corèt d'on siéke a l'ôte."
26. D'vins l'tins v's avez fondé l'tére,
èt c'èst d'vos prôpès mins
qui v's avez fêt lès cîrs!
27. Is pèrihèt èt vos d'morez!
Turtos s'alouw'ront come on mous'mint;
vos 'lzès candjîz come on candje di bijous,
ca zèls ni d'mor'ront nin!
28. Et Vos, v's èstez l'minme,
vos annèyes n'ont nole fin!
29. Lès fis d'vos chèrviteûs åront leû mohone;,
leû race si rafèrmirè po d'vant vosse vizèdje!
85-86-87-88-89-90-91-92-93-94-95-96-97-98-99-100-101-102-103-104-105-106-107-108-109-110
1à22 - 23à52 - 53à85 - 110à131 - 132à150
Psaume 103 (Vulgate 102) Deux versions. L'amoûr d'a nosse Diu!
1. D'a Dåvid.
Bènih Jahvé, twè m'åme!
Qui s'sint nom seûye bèni
d'å pus parfond di m'cwér.
2. Bènih Jahvé, twè m'åme,
èt n'rouvèye nole di sès faveûrs!
3. I t'a r'mètou totes tès calin'rèyes,
i r'wèrih totes tès aflicsions.
4. I ratch'têye ti vèye
èl såvant insi d'l'abîme.
Jahvé t'èwalpèye di s'amoûr
come dèdja i t'aveût èwalpé di s'mizèricôr.
5. Ti åme a stu r'pahowe di boneûr
po qu'ti djonnèsse si r'novèle come l'êgue.
6. Jahvé fôrdjèye lès djustices,
i fôrdjèye ossi lès djudjmints
èt çoula po tos lès acåblés.
7. Jahvé a fêt k'noh sès vôyes a Moïse,
il a fêt k'noh sès hôts fêts
åx èfants d'Israël.
8. Jahvé a stu fêt èl mizèricôr,
èt i pardone åhèyemint.
Il èst londjin a s'mète è colére,
mins s'coûr èst ritche d'amoûr.
9. I n'vout nin todi avou s'vîr,
ni sins r'låke,
nos porsûre po nos calin'rèyes.
10. Ca ci n'èst nin sorlon nos pètchîs
qu'il adjih avou nos-ôtes,
i n'nos rind nin lès måvas toûrs
qui n'lî avans djouwés.
11. Ot'tant lès cîrs s'èlèvèt
al copète dèl tére,
ot'tant s'amoûr èst fwért
po lès cis qu'l'adôrèt,
12. ot'tant l'ès' èst lon èrî d'l'ouwès',
ot'tant i tchèsse èvôye nos rèvoles.
13. Come on pére èst tinre po sès èfants,
insi Jahvé èwalpèye di s'amoûr
lès cis quèl riknohèt!
14. Ca Lu,
i sé avou qwè nos èstans fêt;
i s'sovint
qui n'n'èstans qu'dèl poûssîre!
15. Tot parèy åx jèbes
l'ome a sès djoûs qu'sont comptés,
come li fleûr dès tchamps,
i florih.
16. Mins qu'on sofla passe sor lu:
i n'èst pus!
Wice qui d'monéve,
on nèl kinoh dèdja pus!
17. Mins l'amoûr d'a Jahvé
ripwèze po tofér so sès adôrateûrs,
si djustice, lèye,
r'pwèz'rè so lès èfants dès fis,
18. ossi so lès wårdeûs d'l'aliyance,
so lès cis qui s'sov'nèt d'sès ôrdes
èt qui lès sûvèt!
19. Jahvé a bati s'trône divins lès cîrs,
si rwèyôme gouvèrnêye tote li tére.
20. Bènihez Jahvé tos sès andjes,
vos lès prumîs po l'pwissance,
vos lès ovrîs di s'Fi,
vos qui hoûtes todi s'vwès!
21. Bènihez Jahvé vos totes sès årmèyes,
vos sès chèrviteûs
qui fez todi s'bon voulwér!
22. Bènihez Jahvé,
vos totes sès crèyåcions,
bènihez-l'
d'vins totes lès cwènes di s'rwèyôme!
Awè, mi åme
bènih Jahvé!
version2
Psaume 103 (Vulgate 102) Nosse Diu è-st-amoûr!
1. D'a Dåvid.
Qui mi-åme bènih li Signeûr!
Qui m'cwér ètîr disqu'ås tripes
bènih li nom di s'sint'té!
2. Qui mi-åme bènih li Signeûr,
quèl ni rouvèye måy totes sès faveûrs!
3. I pardone tote ti calin'rèye,
I r'wèrih tos tès mèhins.
4. I ratch'têye ti vèye å abîmes,
I t'èwalpèye di gråces èt d'pardon.
5. Ti bêté sins parèye a stu r'pahowe
di tos sès bins,
ti djonnèsse si r'mète a noû
come po l'êgue.
6. Li Signeûr fôrdjèye lès djustices,
I fôrdjèye lès djudjmints po tos lès acåblés.
7. Il a fêt k'noh sès vôyes a Moïse,
Il a fêt k'nohe sès hôts fêts åx èfants d'Israël.
8. Nosse Diu nos comprind si bin:
I pardonèye åhèy'mint,
Il èst londjin po lèyî s'èmonter s'colére,
èt c'èst-st-a make qui done sès gråces.
9. I n'virêye nin al dilongue dè djoû,
èt minme si nos pûnih po nos lêdès keûres
si rankeune ni dur'rè nin tofér!
10. I n' adjih nin avou nos-ôtes
come nos avans fêt tot pètchant conte di Lu,
I n'nos rind nin côp po côp
sorlon lès afronts qu'nos lî avans fêt!
11. Ca ot'tant lès cîrs sont hôts å-d'zeûr dèl tére,
ot'tant s'gråce èst pwissante po l' cis qu'l'adôre!
12. Ot'tant l'lèvant è-st-å lon dè coûkant,
ot'tant i tchèsse totes nos rèvoles èrî d'nos-ôtes!
13. Ot'tant on pére èst tinre po sès fis,
ot'tant è-st-i tinre po sès adôrateûrs!
14. Ca i k'nohe di qwè nos èstans fêts,
i rapinse qui n's èstans poûssîre!
15. Tot parèy åx jèbes
l'ome a sès djoûs,
tél ine fleûr dè tchamp,
i florih.
16. Mins qu'on sofla lî passe dissus:
i n'èst pus,
èt wice qui d'monéve,
on nèl rik'nohe pus!
17. Po tofér èst a jamåy:
li gråce d'å Signeûr ripwèzève so sès adôrateûrs,
si djustice ripwèze so lès èfants d'sès fis,
18. si justice rispwèze
so lès-cis qu'wårdèt si-aliyance,
zèls qu'ont bone sov'nance di sès ôrdes,
èt qui fêt tot çou qu'i d'mande!
19. C'èst d'vins lès cîrs
qui l'Signeûr mète è plèce si trône,
si rwèyôté gouvèrnêye tot!
20. Bènihez l'Signeûr, vos sès andjes,
vos, lès prumîs po l'pwissance,
vos, lès ovrîs di s' "verbe",
vos qu'oyez l'vwès di s' "verbe"!
21. Bènihez l'Signeûr,
vos totes sès årmèyes,
vos sès chèrviteûs
vos lès ovrîs di s'voulwér!
22. Bènihez l'Signeûr vos totes sès oûves,
I v's a fêtes tot-avå ès s'rwèyôme!
Bènih li Signeûr,
twè, mi åme!
85-86-87-88-89-90-91-92-93-94-95-96-97-98-99-100-101-102-103-104-105-106-107-108-109-110
1à22 - 23à52 - 53à85 - 110à131 - 132à150
Psaume 104 (Vulgate 103) Deux versions. Grandeûr èt mèrvèyes dèl crèyåcion!
1. Bènih Jahvé, twè mi-åme!
Jahvé nosse Diu,
vosse grandeûr èst foû mèzeûre!
Vos èstez gåyemint mètou,
cint fèyes bråmint mî
qui l'pus ritche di vos rwès!
2. Vos v's èwalpez d'loumîre
come d'on mous'mint,
vos disployîz lès cîrs
come ine banîre;
3. vos vôssiz d'êwe vos hôteûrs
èt come tchår vos prindez lès nûlèyes;
vos 'nn'alez so lès éles dè vint,
4. dès èsprits vos fez vos mèssèdjîs
èt lès blames di feû v'chèrvèt!
5. Vos avez ancré l'tére
so sès fond'mints:
èle ni hoss'rè måy
disqu'al fin dès sièkes.
6. Come d'on mous'mint,
avou l'abîme vos r'covrez l'tére:
lès èwes si t'nèt so lès d'zeûrs,
7. vos lès man'cîz,
adon èles corèt èvôye,
èles potchèt d'sogne
al vwès d'vosse tonîre!
8. Lès hôteûrs s'èlèvèt,
lès valèyes d'hindèt al plèce
qui vos l'zî avîz tchûzi!
9. Vos tracez 'ne frontîre
a n'jamåy dèpasser:
insi lès êwes ni r'vinront pus
covri tote li tére.
10. Vos fez spritchî lès surdons,
vos lès èvoyîz d'vins lès valêyes,
is corèt inte lès hôteûrs,
11. di tot åtou, lès bièsses î v'nèt beûre,
lès såvadjès ågnes s'î disseûlèt!
12. Lès oûhês dè cîr
si mètront so leûs bwérds,
d'å mitan dès grands bwès
is f'ront ètinde leû vwès.
13. Di vosse dimeûre di d'zeûr,
vos ramouyîz lès hôteûrs,
li tére si rimplih dès frûts
qui vos lî d'nez.
14. Po lès bièsses
vos fez flori lès prêrèyes,
vos fez ossi crèhe lès bonès jèbes
po l'chèrvice di l'ome,
po qui sètche si pan
foû dèl tére!
15. Li vin, lu:
rèdjouwih li coûr di l'ome,
i fêt r'lûre si vizèdje
bråmint pus qu'totes lès ôles!
Tandis qu'li pan, lu,
i rind dès fwèces a s'coûr!
16. Jahvé aveût planté dès cêdes dè Liban:
les åbes d'a Jahvé sont r'pahous,
17. sor zèls lès oûhês fêt leû nid.
Al bètchète dè neûr sapin d'mone li hêron.
18. Lès boucs dès monts sont rwès
so lès fîrès hôteûrs,
èt d'vans lès rotches
lès rondjeûs sont-st-a houte!
19. Vos fez l'leune po marker lès sêzons,
èt vos fez ossi l'solo,
èt i sé a l'avance, lu,
wice qu'i couk'rè l'al nut'!
20. Vos stindez l'neûristé,
èt i fêt nut':
ès neûr toûrniket
tote sôr di såvadjès bièsses.
21. Al rawåde,
lès liyons rudjihèt al prôye,
is r'cwèrèt d'a Jahvé
li don d'l'amagnî!
22. Mins qui l'solo s'èlîve
èt is s'riployèt,
so l'côp ènnè r'vont
po s'ricoûkî ès leû trô.
23. Adon l'ome ènnè va gangnî s'crosse,
i va a s'ovrèdje disqu'al nut'.
24. Jahvé,
qui v's avez bråmint fêt d'afêres!
Vos èstîz bin sûti po fé tot çoula!
Li tére èst plinte di tos vos trèzôrs!
25. Vochal li mér:
stindowe d'ine seûle pèce
èle n'èst qu'on mahèdje di pèhons,
ènn'a bråmint d'tote sôr,
grands èt p'tits, tos-z-èssonne!
26. Lès batês s'porminèt d'ssus,
li Léviathan s'î bagn,
lu qu'vos avoz fêt
po-z-î djouwer!
27. Turtos ratindèt d'vos
d'poleur magnî a l'eûre!
28. Vos 'lzî d'né,
adon èl rascoyèt;
Vos droviez vosse min,
èt is sont r'pahous d'vos bins!
29. Vos v'catchîz,
ènnè sont tot pièrdous;
vos rat'nez vosse sofla,
is morèt ènnè ralant ès poussîre!
30 Vos èvoyîz voste Esprit,
èt is ravikèt,
li vizèdje dèl tére
ènnè tot r'nov'lé!
31. Li glwère d'a Jahvé è-st-a jamåy,
Jahvé si rèdjouwih di sès ovrèdjes!
32. I r'louke li tére
èle ènnè tronne tote,
Il aduzèye lès hôteûrs
so l'côp èles foumèt!
33. Dji tchant'rè Jahvé tote mi vèye,
mi tchant rèsdondirè por Lu
tote mi vicårèye!
34. Qui m'muzèdje seûye a s'gos'
ca tote mi djôye è-st-ès Jahvé!
35. Qui lès pècheûrs disparètèt dèl tére,
rad'mint qu'lès rèprovés n'seûyèsse pus!
Bènih Jahvé twè mi-åme!
Alèluyå!
version2
Psaume 104 (Vulgate 103) Grandeûr èt mèrvèye dèl crèyåcion.
1. Bènih li Signeûr, twè, mi-åme!
Signeûr nosse Diu v's èstez foû grand!
Vos v'drapez ès l'èsblanwihante loumîre
dèl glwère èt d'l'oneûr di vosse Nom!
2. Vos v'moussîz d'clårté
come di mèt' vosse frake,
vos disployîz lès cîrs
tél ine banîre qu'on displôye!
3. I vôssêye d'êwe totes sès hôteûrs,
èt come tchår i prind lès nûlèyes,
ènnè va so lès éles dè vint!
4. Dès èsprits, ènnè fêt ses mèssèdjîs,
èt sès chèrviteûs sont dès blames di feû!
5. Il a mètou l'tére so sès fond'mints,
insi disqu'al fin dès sièkes
èle ni såreût halcoter!
6. I l'èwalpêye di l'abîme
tot parèy qui d'on mous'mint:
lès èwes si t'nèt so lès hôteûrs,
7. èlzès man'cèye adon èles bizèt èvôye,
èles fêt dès hopes al vwès d'vosse tonîre!
8. Lès hôteûrs s'èlèvèt,
lès valèyes d'hindèt vè l' plèce
qui vos l'zî avîz tchûzi!
9. Li frontîre qui v's avîz tracé
ni sèrè nin d'fwèrcèye,
lès êwes ni vinront pus
si stårer so tote li tére.
10. I fêt spritchî lès sûrdons,
èlz' èvoye vè lès valêyes,
is corèt inte lès hôteûrs,
11. totes lès bièsses dès tchamps î m'nèt beûre,
lès såvatchès ågnes s'î disseûlèt!
12. La dzeûr dimonèt lès oûhês dè cîr,
ès fouyèdje dès åbes is d'nèt dèl vwès.
13. Di tot la-hôt vos ramouyîz lès hôteûrs,
li tére èst r'pahowe di tot çou qu'vos fez!
14. Po lès bièsses,
vos fez flori lès prèrèyes,
vos fez ossi crèhe lès bonès jèbes
po-z-ècorèdjî l'ovrèdje di l'ome,
po qu'i sètche si pan
foû dèl tére!
15. Vos d'nez l'vin:
li coûr di l'ome s'ènnè rafèye,
çoula lî fêt r'lûre li vizèdje
bêcôp pus qu'avou d'l' ôle.
Vos d'nez ossi l' pan:
i soutint l'coûr di l'ome.
16. Les åbes d'å Signeûr sont r'pahous a plêzîr,
awè, lès cêdes dè Liban qu'aveût planté,
17. c'èst sor zèls
qui lès oûhês fêt leû nid,
mins l'hêron, lu, fêt l'sonk
al bètchète d'on neûr sapin.
18. Lès fîrès hôteûrs sont li rwèyôme dès bikes,
adon qu'lès rondjeûs sont-st-a houte d'vins lès rotches.
19. I fat l'leune po marker lès sêzons,
li solo sé wice qu'i couk'rè.
20. Vos stårez l'neûristé: èt c'èst l'neûr nut'
ès lisquéle si r'mouwèt totès såvatchès bièsses.
21. Lès liyons rudjihèt al prôye,
is r'cwèrèt l'amagnî
qui l'Signeûr èlzî done,
22. mins qui l'solo aspite
adon is s'riployèt,
ènnè r'vont s'coûkî ès leû trô.
23. L'ome sôrtèye po-z-aller gangnî s'crosse,
i s'ènnè va ovrer disqu'al nut'.
24. Signeûr,
vos avez fêt pus d'trinte-sî sôrs d'ovrèjes,
vos 'lz' avez turtos fêt avou sûtisté,
li tére èst rimplèye di vos ritchèsses.
25. Ci-chal:
ine mér foû mèzeûre, ås låtchès mins,
sor lèye ridèt totes sôrs di pèhons,
lès p'tits èt grands mahîs èssonne,
ènn'a d'trop po 'lzès compter!
26. Lès batês rotèt d'ssus,
li Léviathan s'î bagn',
li-ci qui v's avoz fêt
po s'î djouwer!
27. Turtos ratindèt d'Vos
qui Vos 'lzî d'néze a magnî a tins!
28. Vos 'lzî d'né a magnî:
èl riçûvèt;
vos droviez vosse min:
is s' ripahèt d'vos bins.
29. Vos catchîz vosse vizèdje:
is sont tot foû d'zèls;
vos 'lzî r'sètchîz l' sofla:
is toumèt djus, ènnè ralant ès leû poussîre!
30 Vos èvoyîz voste-Esprit:
adon is ravikèt,
li vizèdje dèl tére si r'tape a noû!
31. Li glwère d'å Signeûr èst po tofér,
li bon Diu èst tot binåhe
di tot çou qu'a fêt!
32. I tape sès oûys so l'tére:
èle tron.ne tote;
il aduze lès hôteûrs:
èles foumèt!
33. Tote mi vèye,
dji tchant'rè l'Signeûr
tote mi vicårèye,
mi tchant rèsdondirè po m'Diu!
34. Qui m'muzèdje seûye tofér a s'gos'
ca mi,
dji m'ra tot ès bon Diu!
35. Qu'ine fèye po totes s'ènnè seûye fini
avou tos lès pècheûrs dèl tére!
D'vins pô d'tins,
lès måvas n'sèront pus!
Bènih li Signeûr,
twè mi-åme!
Alèluyå!
85-86-87-88-89-90-91-92-93-94-95-96-97-98-99-100-101-102-103-104-105-106-107-108-109-110
1à22 - 23à52 - 53à85 - 110à131 - 132à150
Psaume 105 (Vulgate 104) Li mèrvèyeûse istwère d'a Israël.
1. Glorifiyîz l'Signeûr,
tot l'noumant po s'Nom,
houkîz-l' a l'assistince!
Fez k'nohe tos sès hôts fêts
avå lès nåcions.
2. Tchantez-l',
por Lu rècitez vos påtêrs!
Fez sèpi totes sès mèrvèyes!
3. Fruzihez tot-z-oyant l'nom di s'sint'té!
Qui tot quî cwîre li Signeûr
åye li djôye ès s'cour!
4. Sèyîz' a cwèri l'Signeûr,
dimonez a l'awète di s'fwèce!
Cwèrez sis r'lå a vèyî s'vizèdje!
5. Rapinsez sès miråkes,
rapinsez çou qu'I fat,
a tos sès hôts fêts,
å djudj'mints qui s'boke a d'bités!
6. Lignèdje di s'cherviteûs Abraham,
vos-ôtes fis d'a Djåcob,
vos-èstez s'tchûze!
7. Il èst l'Signeûr nosse Diu,
èt so tote li tére
sès djudj'mints potchèt ås oûys!
8. I s'sovint di si-aliyance a jamåy,
I r'tûze a s'parole
qi'I k'mandat po mèye jènèråcions,
9. qu'aveût-st-arindjî avou Abraham,
qu'aveût promètou a Isaac.
10. Ennè fat li lwè d'a Djåcob
èt po tofér l'aliyance avou Israël,
11. Tot volant dire por la:
"dji t'done li tére di Canaan,
c'èst l'pårt di ti-èritèdje."
12. Is èstît si pô
qu'on poléve co 'lzès compter,
is d'monît dèdja la
tot-z-èstant ètrindjîrs å payîs.
13. Is alît d'on peûpe a l'ôte,
d'on rwèyôme a ine ôte nåcion.
14. I n'lèyat måy nouk èlz'acåbler,
a cåse di-zèls I pûnihat dès rwès.
15. "N'aduzez nin a mès mèssîyes,
ni cwèrez nin mizére a mès profètes!"
16. I houkat l'famène so l'tére,
èlzî spiyat leûs forneûses a pan!
17. Po d'vant zèls
Il èvoyat in ome,
ine èsclåve qu'aveût stu vindou,
c'èsteût Djôzèf!
18. Is lî ont mètou des tchin.nes ås pîds,
å pont qu'ènnont stu tot moudri,
is lî ont rèssèré s'hâtrê
d'vins on carcan d'fiér!
19. Disqu'å moumint
qu'tot çou qu'aveût prédi-z-arivat,
disqu'å moumint
qui l'voulwér dè bon Diu èl blankihat.
20 Li rwè volou qu'on èl dislôye,
li souvèrin èl rindat lîbe.
21. Ennè fat l'mêsse di s'mohone,
i lî confiyat l'goviène di sès bins,
22. po fêt roter lès princes a s'môde,
po-z-ac'sègnî lès anchins.
23. Adon Israël vint-st-èn-Egypte,
Djåcob sédjoûrnat so l'tére d'a Cham.
24. I fat bin racrèhe si peûpe:
å pont quèl rindat pu pwissant
qui tos lès-cis qu'èlz'acåblît.
25. Elzî ristoûrnat l'coûr
po 'lzès fé hére si peûpe:
adon is machinît disconte sès chèrviteûs.
26. I dèlègat si chèrviteûs Moïse
avou Aaron qu'I tchûzihat,
27. is tapèrent sor zèls tos lès sègnes promètous,
èlzî mostrèrent sès miråkes å payîs d'a Cham.
28. Il èvoyat l'neûristé èt l'neûr nut',
èles n'ont nin d'fwèrcî sès ôrdes.
29. Di totes leûs êwes ènnè fat dès song',
tot fant pèri tos leûs pèhons.
30. Lès rin.nes richèhît a make avå tot l'payîs,
on 'lzès r'trovat minme ès lét d'a leûs rwès!
31. I djåzat èt lès wasses aspitît,
is èstît plin d'pious å-d'vins d'leûs frontîres.
32. Po dèl plève èlzî èvoya dès gruzês,
li feû broûlat tote leû tére.
33. Il ac'sûhat leûs vègnes èt leûs åbes a fikes,
i royat foû d'tére lès åbes di leûs domin.nes.
34. I djåzat èt dès potch'tås s'aminît
avou dès åbalowes a n'poleûr fé l'compte!
35. Is ont lof'té totes lès jèbes di leû tére,
ni lèyant vor'mint rin dès frûts dès tchamps.
36. Il ac'sûhat po l'bon
tos lès prumîs m'nous å monde dè payîs,
lès tos prumîs frûts
di leû fwèce d'ome.
37. I fat 'nn'aller totes lès familes
bin tchèrdjèyes d'ôr èt d'årdjint:
èt nouk avår-zèls ni trèbouhat!
38. L'Egypte si rafiyat
d'èlzès vèyî cwiter l'payîs,
ca ènn'avît ine bèle pawe!
39. Po leû prôtècsion
èlzî disployat on ridô d'nûlêyes,
èt Il aloumat on feû
po 'lz'illuminer dèl nut'.
40. On l'pîléve,
èt I fat aveûr dès cwayes;
is èstît r'pahous avou l'pan dè cîr.
41. I findat l'rotche,
èt lès êwes apihît,
on fleûve coréve ès dèzêrt.
42. I rapinsat å "verbe" di s'sint'té,
I r'tûzat a s'chèrviteûs Abarham.
43. I fat 'nn'aller s'peûpe d'vins ine grande djôye,
sès tchûzis m'nît foû d'la l'coûr ès fièsse.
44. Elzî d'nat l'tére dès peûpes,
is èritèrent di l'ovrèdje dès nåcions.
45. Et çoula:
po qu'is sûvèsse todi sès lwès,
po qu'is wårdèsse sès mèssèdjes.
Alèlûyå!
85-86-87-88-89-90-91-92-93-94-95-96-97-98-99-100-101-102-103-104-105-106-107-108-109-110
1à22 - 23à52 - 53à85 - 110à131 - 132à150
Psaume 106 (Vulgate 105) Tot on peûpe si k'fèsse...
1. Aléluyå!
Rindez glwère å Signeûr ca il èst bon!
Si gråce nos èst n'née a jamåy!
2. Quî dirè lès hôts fêts d'å Signeûr?
Quî f'rè rèsdondi tote si glwére?
3. Qu'il è-st-ûreûs l'ci qui wåde li djudj'mint,
li-ci qu'èst djusse a tos moumints!
4. Signeûr,
sov'nez-v' di mi!
Es voste-amoûr po vosse peûpe
apwèrtez-m' vosse dilîvrance!
5. Po poleûr loukî d'tos mès oûys
li boneûr dès-cis qu'vos tchûzihez,
po m'rafiyî dèl djôye di vosse peûpe,
po-z-avu l'glwère d'èsse voste èritîr.
6. Avou nos péres
nos avans fêt çou qu'èst må,
nos v's avans måké, Signeûr,
nos nos avans tapé al disbåtche!
7. En-Egypte
nos anchins ni comprindît nin vos hôts fêts:
ni ratûzant nin ås lårdjèsses di vosse gråce
al mér dès djoncs
is s'sont minme astampés conte di vos!
8. Mins vos 'lz'avez såvé:
a cåse di vosse nom,
po fé k'nohe vosse pwissance.
9. Vos avez man'cî li mér dès djoncs,
èlle 'nnè souwa tote;
adon vos 'lz'avez minés oute dès abîmes
ossi åhèy'mint qu's'is rotît ès dèzêrt!
10. Vos 'lz' avez r'sètchîs dès mins dè hayåves,
vos 'lz' avez ratch'tés dès grawes di l'innemi.
11. Et lès êwes ont rascouvièrt
tos cès-la qu'èlz'acåblît:
nouk n'a polou rèchapé,
ènnè d'mone nin onk!
12. Adon is ont-st-avou fwè ès s'parole,
Is tchantît s'glwère èt sès mèrites.
13. Mins is s'dispètchît d'roûvî tot çoula,
is n'rawårdît minme pus s'consèy !
14. Es dèzêrt,
is djêrît so tot!
El disseûlance
Is ont wèzou sayî leû Diu !
15. Elzî acwèrdat tot çou qu'is volît
mins ‘lzî tchoûkat l'fîve èl l'åme.
16. Å camp
is d'dimèsfiyît d'Moïse èt Aaron,
èlzès djalozît
zèls lès sints d'å Signeûr.
17. Adon l'tére si tapat a-ladje,
ravalat Dathan,
èt d'on plin côp
rafûlat l'clike d'a Abiram.
18. Li feû ‘lzès broûlat turtos,
li blame distrûhat lès måvas.
19. En-Horeb,
di zèls minme is fît on vè,
adon is s'mètît a gngnos
d'vant ciste-îdole di crou-fiér.
20. Is trouk'lît leû glwére
disconte li posteûre d'on boûf,
ine bièsse qui roumèy lès jébes,
21. is roûvît leû Diu, leû Såveûr,
Lu qu'fat tos lès miråkes èn-Egypte,
22. is roûvît sès hôts fêts so l'tére d'a Cham,
li pawe qu'is avît-st-avu a l'mér dès djoncs !
23. Adon I s'mètat èl tièsse d'èlzès ravadjî :
si po leû tchance,
Moïse n'aveût rad'mint dåré so l'hård
djusse po d'vant Lu,
èt n'aveût parvinou a rat'ni s'brès
qu'aveût håsse dè tot distrûre !
24. Is r'grignît conte li tére dès mèrvèyes,
is n'avît nole fwè ès s'parole !
25. Is groûlît d'zos leû tinte,
tot fant l'soûrdô al vwès d'å Signeûr.
26. Is håssat l'min sor zèls,
I voléve èlzès rabate ès dèzêrt,
27. kitchèssî leû lignèdje avå lès peûpes,
èlzès k'sèmer d'vins tos lès payîs.
28. Is s'acoplît a Belphégor
èt magnît å sacrifice po lès mwérts.
29. Leûs lêdès keûres èl fat måvler
adon l'floyê èlzès k'hiyat.
30. Pinhas si stampat, s'ènnè mèlat,
adon l'floyê èlzès lèyat påhûle.
31. On lî ènnè sårè gré,
èt c'èst djustice,
d'ine adje a l'ôte,
po tofér èt a jamåy.
32. El mètît tot foû d'Lu åx êwes di Mèriba,
èt a cåse di zèls Moïse ènnè påtihat,
33. ca is lî avît tél'mint toûrné l'tièsse,
qu'i n'saveût pus bin çou qu'i d'héve!
34. Is n'ont måy fêt pèri lès peûpes disqu'å dièrin,
portant l'Signeûr èlzî aveût k'mandé!
35. Qui dè contrère:
is s'mahît avou zèls,
ènn'aprindît leûs manîres di fé,
36. ènnè chèrvît lès îdoles;
adon por zèls c'a stu leû piète!
37. Is sacrifiyît å diâle
leûs valèts èt leûs båcèles,
38. is dispårdît l'song inoçant,
li-ci d'leûs valèts, d'leûs båcèles,
qu'is sacrifiyît åx îdoles di Canaan.
Li tére ènnè fourit tote flouwèye!
39. Is s'prôfanît d'vins leûs måssis ovrèdjes,
is s'disbåtchît ès leûs lêdès manîres.
40. Li colére d'å Signeûr s'èblamat conte di zèls,
I n'poléve pus vèy si-èritèdje!
41. Elzès tchoûkat d'vins lès mins dès ôtès-peûpes,
lès hayåves èlzès t'nît a gogne!
42. Leûs innemis èlz'acåblît,
is ployît d'zos l'pwès dè hårkê!
43. Bin sovint,
èlzès sètchat foû di spèheûr,
mins tièstous rowes qu'is èstît
is n'savît èsse d'acwèr avou Lu!
44. Portant i vèyat totes leûs transes,
Il oyat leûs djèmihèdjes.
45. I s'sovint di si-aliyance avou zèls,
èlzî pardonat
tot 'lzî d'nant s'gråce sins compter!
46. A tos lès-cis qu'èlzès t'nît èlahî
I candjat lès îdèyes:
adon is s'fît må d'zèls!
47. Såvez-nos Signeûr nosse Diu,
rassonez nos d'avå tos lès peûpes,
po rinde insi tot l'oneûr
qui nos d'vans å nom di v'sint'té,
po nos rafiyî d'vosse glwère!
48. Qui l'Signeûr, Diu d'a Israël, seûye bèni
po tofér èt à jamåy!
Qui tot l'peûpe dèye:
Åmèn, aléluyå!
85-86-87-88-89-90-91-92-93-94-95-96-97-98-99-100-101-102-103-104-105-106-107-108-109-110
1à22 - 23à52 - 53à85 - 110à131 - 132à150
Psaume 107 (Vulgate 106) Nos rindans gråce å Diu qui nos såve.
1. Pwèrtez disqu'å steûlî li nom d'å Signeûr,
ca Il èst tot fêt d'bonté!
Si gråce nos èst n'née a jamåy!
2. Qui lès ratch'tés d'å Signeûr nèl têhèsse nin,
ca èlzès ratch'tèye ås mins d'l'innemi,
3. èlzès rassonne di totes lès téres:
di l'ès tot parèy qui d'l'ouwès,
dè nôrd come so l'mér.
4. Is s'avît pièrdou ès dèzêrt,
is s'avît pièrdou èl disseûlance dèl vôye,
sins poleûr ariver a trover ine vèye
po-z-î fé ahote.
5. Is assotihît d'fin, is s'påmît d'seû,
leû-z-åme n'ènnè poléve pus.
6. Es leû måleûr is brèyît après l'Signeûr
po-z-èsse disgadjî d'totes leûs transes.
7. Elzès r'mèta so l'dreûte vôye:
po-z-aller al vèye d'ahote
po-z-î passer l'nut'.
8. Rindez glwère al gråce d'å Signeûr,
rindez glwère po tos lès miråkes
qu'I fat po lès fis dès omes.
9. Ca Il a r'pahou l'åme mwète di seû,
il a rafûlé d'bins l'åme flåwihant d'fin.
10. Enn'aveût qui d'monît èl neûristé,
qui d'monît ès l'ombe dèl mwért:
is èstît r'pahous d'mizéres,
is èstît èclawés d'vins lès fiérs.
11. Is r'noyît lès paroles d'å bon Diu,
is r'grignît tos lès consèys dè grand Mêsse.
12. I rabaha leû coûr d'vins lès doleûrs,
is s'trèbouhît sins qu'on vinsse èlz'êdî!
13. Es leû måleûr is brèyît après l'Signeûr,
po-z-èsse disgadjî d'totes leûs transes.
14. Il èsprinda èl neûristé,
èlzès r'sètcha foû d'l'ombe dèl mwért,
I roya leûs tchin.nes,
15. po qu'is rindèsse glwére al gråce d'å Signeûr,
po qu'is rindèsse glwére po tos lès miråkes
qu'I fat po lès fis dès omes.
16. Ca I spiya lès pwètes di keûves,
I tapa foû lès fèrous d'fiér.
17. Dès lwègnes payît po leû måle vôye,
is payît po totes leû calin'rèyes.
18. Leû-z-åme aveût dès hôss'mints d'coûr
so tos lès amagnis.
Is èstît dèdja a stok dès pwètes dè mwért.
19. Es leû måleûr is brèyît après l'Signeûr
po-z-èsse disgadjî d'totes leûs transes.
20. Elzî èvoya s'parole èt 'lzès r'wèriha,
èlzès mètant a houte po qu'is n'sèyèsse nin distrûts,
21. po qu'is rindèsse glwère al gråce d'å Signeûr,
po qu'is rindèsse glwère po tos lès miråkes
qu'i fat po lès fis dès omes,
22. po qu'po lî rinde gråce is ofrèsse dès sacrifices,
èt qu'tot tchantant
is fèsse sèpi lès mèrvèyes d'å Signeûr.
23. Lès bat'lis so leû batê nêvît po tos lès tins,
is fît botique so lès grantès-êwes.
24. Di leûs prôprès oûys,
is ont vèyou d'vins lès abîmes
tot çou qu'li Signeûr aveût fêt.
25. I k'manda:
adon s'èlèva on sofla d'tos lès diâles,
adon lès flots si d'lahît so tot!
26. Is montît è-hôt vè lès cîrs,
ritoumît è-bas vè lès abîmes:
d'vins lès toûrmints,
leû-z-åme ènn'aléve tote èvôye.
27. Is toûrnikît hapé po l'toûbion,
is halcotît pé qu'dès sôlêyes!
Tou leû saveûr aveût disparètou!
28. Es leû måleûr is brèyît après l'Signeûr
po-z-èsse disgadjît d'leûs transes.
29. Il èlèva l'tampète disqu'å silince,
so l'côp sès flots dim'nit påhûle.
30. Is s'ènnè rafiyît tot,
is èstît rapåftés;
adon èlzès mina rad'mint
disqu'å pôrt di tos leûs d'zîrs,
31. po qu'is rindèsse glwère al gråce d'å Signeûr,
po qu'is rindèsse glwère po tos lès miråkes
qu'I fat po lès fis dès omes,
32. po qu'is pwèrtèsse si nom disqu'å steûlî
ès l'assimblèye dès peûpes,
po qu'is lî rindèsse oneûr èt glwére
å consèy dès anchins.
33. D'on fleûve ènnè fêt on dèzêrt,
d'on payîs d'surdons ènnè fêt l'tére dèl seû,
34. li tére a frût' dim'na ine tére salerèce
a cåse dèl calin'rèye dès-cis qu'î d'monît.
35. I candja l'dèzêrt èn-on vîvî,
dèl souwèye tére abrotcha lès surdons,
36. Il î mèta è plèce lès moûrts-di-fin:
is î ont bati 'ne vèye po lès voyèdjeûs.
37. Is î ont sèmé lès tchamps,
is î ont planté dès vègnes,
èt l'moumint m'nou,
ènn'ont rascoyî lès frûts.
38. Elzès bènih,
leûs familes crèhêt å mî,
leûs bièsses n'ont nole maladèye!
39. Mins is s'apôvrihèt,
is ployèt acåblés,
is sont-st-ès måleûr,
is sont d'vins lès transes!
40. I d'vièrsa si r'grignèdje so leûs princes,
èlz'ala piède d'vins ine kimèlèye
a nn'nin poleûr ènnè r'sôrti!
41. I r'sètcha l'pôve foû di s'mizére,
I fat crèhe si famile tot parèy qu'on tropê!
42. Lès djusses èl vèyèt èt s'ènnè rafiyèt,
tos lès måvas d'vèt bin clôre leû gueûye!
43. Tot qui èst sûti wåde çouchal:
is åront l'comprinn'mint dès gråces d'å Signeûr.
85-86-87-88-89-90-91-92-93-94-95-96-97-98-99-100-101-102-103-104-105-106-107-108-109-110
1à22 - 23à52 - 53à85 - 110à131 - 132à150
Psaume 108 (Vulgate 107) Toûrnant nos avou fwè vè l'Diu qui såve.
1. Ime. Tchant d'a Dåvid.
2. Mi coûr tint l'côp, Signeûr,
dji brê, dji tchante, o m'glwère!
3. Dispièrtez-v' violons, guitåres...
dji f'rè lèver l'solo!
4. Avå lès peûpes
dji pwète vosse Nom disqu'å steûlî,
avå lès nåcions
i fåt qu'dji v'tchante,
5. ca vosse gråce si stint
disqu'å-d'zeûr dès cîrs,
vosse vrêye èst grande,
di d'chal ås steûles.
6. Aspitez d'vins lès cîrs, Signeûr,
dispårdez vosse glwére so tote li tére.
7. Po rinde lîbe tos vos binamés
qui vosse dreûte èlzès såve!
Acontez-m',
tinez avou mi!
8. Es s'sint'té, nosse Diu djåze:
"C'èst mi qui gangne,
dji fé dès pårts avou Sichem,
dji mèzeûre la valêye di Sukkot.
9. "Galaad tint avou mi,
Manassé èl fêt-st-ossi,
Ephraïm èst l'årmeûre di m'tièsse,
Djudas èst m'baston di k'mand'mint.
10. "Moab èst l'bassène po m'rinètî,
dji hine mi sandåle so l'tére d'Edom,
èt so l'Philistie
dji tchoûke mi cri d'victwère. "
11. Quî m'minrè-st-èl fwète vèye?
Quî m'aminrè ès payîs d'Edom?
12. N'èst-ce nin Vos Signeûr
qui nos avez lèyî la?
N'èst-ce nin Vos Signeûr
qui n'èstez pus al tièsse di nos årmêyes?
13. Apwèrtez nos don vosse sécoûrs
disconte tot qui nos acåblêye:
c'èst tûzer al vûde qui dè creûre
qui l'ome si rin lîbe di lu-minme!
14. Ca c'è-st-ès nosse Diu
qui nos fordjans l'pwissance:
Lu-minme sipråtch'rè
tos lès-cis qu'nos acåblèt!
85-86-87-88-89-90-91-92-93-94-95-96-97-98-99-100-101-102-103-104-105-106-107-108-109-110
1à22 - 23à52 - 53à85 - 110à131 - 132à150
Psaume 109 (Vulgate 108) Plintes d'onk qu'on acuze a twért.
1. A mêsse dè tchant. D'a Dåvid. On tchant.
Vos, l'Diu qu'dji chèv,
Vos qu'dji prèye,
Vos l'Diu qu'dji tchante,
ni d'monez nin l'boke cozowe!
2. Ca 'ne måle linwe,
on rûzé potince kidjåze so m'compte.
Is m'dinèt dès côps d'geûye
racontant totes sôrs di mint'rèyes.
3. Is m'hayèt,
èt d'leûs målès paroles
is m'èwalpèt dès pîds al tièsse:
is m'fêt l'guére sins rêzon!
4. Is m'acuzèt a cåse di mi-amoûr;
dji n'so qu'priyîre.
5. Is m'rindèt l'må po l'bin,
is m'hayèt pace qui dj'inme!
6. Disconte lu féz houkî on måva,
qui l'acuzateûr si stampe a s'dreûte.
7. Qui l'djudj'mint li done tos lès twérts,
èt qui s'proyîre ènnè r'mète co d'ssus!
8. Sès djoûs sèront mwinde,
ine-ôte lî prinrè s'plèce!
9. Sès fis sèront ôrfulins,
si feume sèrè vève.
10. Tot pièrdou, parèy ås brubeûs,
sès èfants ènn'iront hår èt hot',
ènn'iront bruber d'vins lès mohones
ca is sont rèchapés dès rwènes.
11. Li sansowe lî sètch'rè tot s'magot,
lès såvadjes mèt'ront a rin tot si-ovrèdje.
12. Nouk po fé gråce,
nouk po-z-avu pitché d'sès ôrfulins.
13. Pus nole av'nîr por lu: on lî r'côp'rè,
l'adje qui sût rabat'rè minme si nom!
14. Qu'ès Signeûr on rapinse å pètchî d'sès péres,
qu'on n'roûvêye måy li fåte di s'mame,
15. qu'is sèyèsse todi po d'vant l'Signeûr,
qui leû mèmwére seûye råyèye djus dèl tére!
16. Ca i n'a måy avou l'idèye dè fé gråce,
sins r'lå i trak'néve li pôve ome,
ènn'aveût å minåbe, å coûr moudri,
il aveût bon d'èlzî d'né l'mwért!
17. Il inméve li malédicsion:
èle arive ad'lé lu!
I s'anoyîve èl bènèdicsion:
èle si r'sètche èrî d'lu!
18. I s'èwalpèye dèl malédicsion
come di mète si frake,
tot parèy a l'êwe
èle lî mousse a pus parfond d'lu-minme,
tot parèy a l'ôle
èle si ståre disqu'a d'vins sès ohês.
19. Quèl seûye por lu:
parèy a mous'mint qu'rafûle bin,
parèy al cingue qu'on pwète tofér.
20. Tèl seûye avou l'êde di Diu
li salêre di tos mès acuzateûrs,
di tos cès-la
qui djåzèt a twért conte di mi.
21. Mins Vos Signeûr qu'èstez m'Diu,
a cåse di vosse nom, tinez avou mi,
pwice qui vosse gråce èst foû bonne,
rindez-m' lîbe!
22. Ca dji so pôve èt målureû,
a s'ènnè fé, mi coûr èst tot moudri.
23. Dji sû m'vôye,
tot parèy a l'ombe qui discrèh,
a mwinde brut dji n'mi sé rat'ni,
dji potche è l'êr come on potch'tå.
24. A fwèce d'avu djuné,
mès gngnos ni m'tinèt pus,
sins cråhe
mi tchår èst tote moflas'.
25. Mi, dj'èlzî fêt honte
tot ot'tant qu'on sins oneûr.
Is m'loukèt,
is hossèt l'tièsse!
26. Signeûr,
Vos qu'èstez m'Diu,
vinez a m'sécoûrs,
såvez-m' sorlon vosse gråce!
27. Po qu'is comprindèsse:
qui c'èsteût vosse min qui m'féve çoula,
qui c'èsteût Vos qu'èsteût a l'ovrèdje!
28. Zèls mådihèt,
èt Vos, Vos bènihez;
qu'is s'lèvèsse,
qu'is sèyèsse racovièrt di honte;
vosse chèrviteû s'ènnè rafèy'rè tot!
29. Qui tos mès acuzateûrs
sèyèsse mètou å pîd dè meûr;
qu'is s'èwalpèsse ès leû honte
come divins 'ne cape!
30. A plinte boke
dji vou tchanter l'Signeûr,
å mitan d'tos lès djins
dji pwète si nom disqu'ås steûles,
31. ca I s'tint al dreûte dè pôve
po lî såver si-åme di sès djudjes!
85-86-87-88-89-90-91-92-93-94-95-96-97-98-99-100-101-102-103-104-105-106-107-108-109-110
1à22 - 23à52 - 53à85 - 110à131 - 132à150
Psaume 110 (Vulgate 109) Deux versions. Li sacèrdoce dè Mèssîye.
1. D'a Dåvid. On tchant.
Jahvé djåza-st-insi a m'Signeûr:
"Vins chal ad'lé mi,
ti sîdj'rès a m'dreûte,
avou tès innemis
dji f'rè 'ne passète po tès pîds!"
2. Dispôy Sion Jahvé disfind tès-intèrèts:
Tot fant crèhe tès fwèces,
tot ragrandihant ti rwèyôme,
tot t'dinant l'dôminåcion
so l'cour di tès innemis.
3. T'as stu mètou å monde so lès sintès-hôteûrs,
t'èsteûs dèdja prince dês ç'djoû la!
Dês l'å matin dèl crèyåcion
dji t'pwèrtéve ès m'coûr!
4. Jahvé l'a djuré,
èt i n'a may rimagnî s'parole:
"T'ès prête po tofér,
sorlon l'ôrde dè rwè Mèlchisédèc!"
5 Li Signeûr si tind a t'dreûte:
å djoû di s'colére,
lès rwès sèront språtchîs!
6. I rind l'djustice amon lès sins-lwès,
lès cadåves sont mètous onk so l'ôte!
I spèye lès deûrès tièsses tot avå l'tére.
7. I beût l'êwe a rèw qu'èst so s'vôye,
adon pwis, i r'lîve li tièsse.
version2
Psaume 110 (Vulgate 109) Li sacèrdoce dè Mèssîye.
1. Sintince d'a Jahvé po m'Signeûr:
" Sîdje chal a m'dreûte!
Dj'a fêt 'ne tchèyîre avou tès innemis
dj'ènnè f'rè 'ne passète po tès pîds!"
2. C'èst Lu qu'a fôrdjî l'maclote qui t'fêt gangnî,
awè, c'èst Jahvé d' Sion qui t'l'a fêt al min.
3. Divins lès batayes disconte lès innemis
c'èst Lu qu'èsteût t'fwèce,
å djoû d'tès victwères
c'èst Lu qu'èsteût t'glwère,
l'èclat di s'sint'té
t'as todis stu on rik'fwért,
por twè il èsteût l'fristé,
mins ossi l'rozêye di t'djon.nèsse.
4. Jahvé l'a djuré,
èt qwand èl fêt c'è-st-ine fèye po tote:
"T'ès minisse dè ci qui èst,
qui èsteût èt qu'sèrè a jamåy,
sûvant lès conv'nances di si-acwèrd,
t'ès si rwè lèdjitime, O m'Signeûr,
par li rèsponse di t'dreûte."
5 I språtchîve dès rwès a djoû di s'colére;
I l'a-st-èpwèrté so lès dius sès rivåls,
6. ènn'a fêt dès hopès d'cadåves,
i spèye lès tièsses tot-avå l'tére.
7. Li ci "qui èst" l'a mètou po ringner,
tot l'sacrant i lî fêt radrèssî l'tièsse.
85-86-87-88-89-90-91-92-93-94-95-96-97-98-99-100-101-102-103-104-105-106-107-108-109-110
1à22 - 23à52 - 53à85 - 110à131 - 132à150
Ce texte précieux et rare est l'oeuvre de "On P'tit Monne" ("Un Petit Moine"). Ce "monne" en question, un enfant spirituel du père Hubert, est un moine trappiste de pure souche wallonne. Comme exercice spirituel, le père Hubert lui avait demandé de s'atteler à cette longue et la délicate tâche de traduire tous les psaumes en wallon à partir de quatre traductions françaises différentes. Le "P'tit Monne", sur sa lancée, a aussi traduit l'Évangile de Marc (cf. infra) et les trois lettres de Jean.
Je présente ici une version bénévolement dactylographiée et corrigée selon les dernières conventions orthographiques par monsieur Jean Hamblenne à partir des photos prises aux archives de l'abbaye de Rochefort. Merci M. Hamblenne pour ce travail long et exigeant.
*********************
*********************