(Traductions wallonnes)
Ce texte précieux et rare est l'oeuvre de "On P'tit Monne" ("Un Petit Moine"). Ce "monne" en question, un enfant spirituel du père Hubert, est un moine trappiste de pure souche wallonne. Comme exercice spirituel, le père Hubert lui avait demandé de s'atteler à cette longue et la délicate tâche de traduire tous les psaumes en wallon à partir de quatre traductions françaises différentes. Le "P'tit Monne", sur sa lancée, a aussi traduit l'Évangile de Marc (cf. infra) et les trois lettres de Jean.
Je présente ici une version bénévolement dactylographiée et corrigée selon les dernières conventions orthographiques par monsieur Jean Hamblenne à partir des photos prises aux archives de l'abbaye de Rochefort. Merci M. Hamblenne pour ce travail long et exigeant.
53-54-55-56-57-58-59-60-61-62-63-64-65-66-67-68-69-70-71-72-73-74-75-76-77-78-79-80-81-82-83-84-85
1à22 - 23à52 - 85à110 - 110à131 - 132à150
Psaume 53 (Vulgate 52) L'ome qui n'vout noû Diu!
1. A mêsse dè tchant, po-z-ac'sègnî, d'a Dåvid.
2. Li reû-sot s’dihéve ès lu-minme :
« Diu n'èst nin! »
Is s’sont turtos lèyîs aler
d'vins totès sôrs di lêtès manîres.
Is s'sont disbåtchîs,
nouk ni fêt l'bin.
3. Li Diu dès cîrs louke lès fis d'l'ome,
i våreût tant èsse sûr,
qu'avår-zèls i-n-a co on sûti
qui qwîre li Bon Diu!
3. Mins turtos s’ distoûrnèt,
èssonne is s’ disbåtchèt,
nouk ni fêt l’bin,
ni minme onk!
4. Nèl savèt-is don nin :
zèls qui fêt l'må?
Po poleûr si bôkî d'pan,
is t'nèt m'peûpe a gogne,
is n'priyêt måy li Signeûr.
6. Nosse Diu k'sèm'rè lès ohês
dè ci qui wès'rè t'ataker;
Ti lès rabet'rès å silince
ca nosse Diu s'ènn'a d'halé!
7. Di Sion,
quî don'rè l' dilîvrance a Israël ?
Nosse Diu va ranimer tos lès-cis di s' peûpe.
qu'avît-stu fêt prîzonîr;
adon Djåcob frè fièsse,
èt Israël vik’rèt-st-èl djôye.
53-54-55-56-57-58-59-60-61-62-63-64-65-66-67-68-69-70-71-72-73-74-75-76-77-78-79-80-81-82-83-84-85
1à22 - 23à52 - 85à110 - 110à131 - 132à150
Psaume 54 (Vulgate 53) Priyîre å Diu dèl djustice.
1. A mêsse dè tchant. So lès instrumints à cwèdes.
Po-z-ac'sègnî. D'a Dåvid.
2. Qwand lès Zéphéens s'ènnè vinre po d'mander a Saül:
"Dåvid ni s'catche ti nin ad'lé nos-ôtes?"
3. Nosse Diu ,
såvez-m' par vosse nom,
djudjez-m' par vosse pwissance!
4. Nosse Diu,
oyez m'priyîre,
prustez l'orèye a m'mèssèdje!
5. Ca dès såvadjes si drèssèt conte di mi,
cès rudès omes riqwèrèt mi-åme,
èt is n'ont nin d'tins a piède
avou nosse Diu!
6. Mins vochal li Signeûr
qu'avole a m'sécours,
vola nosse Diu qu'arive
avou lès tuteûrs di mi-åme.
7. Il a rindou l'må a mès innemis;
ès vosse vrêye,
vos alez lès rézoûde a rin.
8. En-ofrande: dji sacrifiyèye por vos,
dji tchante vosse nom: ca il èst l'bin!
9. I m'a sètchî foû d'totes mès transes,
mès oûys ont polou d'coviért mès innemis.
53-54-55-56-57-58-59-60-61-62-63-64-65-66-67-68-69-70-71-72-73-74-75-76-77-78-79-80-81-82-83-84-85
1à22 - 23à52 - 85à110 - 110à131 - 132à150
Psaume 55 (Vulgate 54) Priyîre dè-ci qu'on toûrmète cruwél'mint.
1. A mêsse dè tchant - so lès instrumints a cwèdes -
po-z-ac'sègnî - d'a Dåvid.
2. Signeûr,
oyez m'priyîre!
Ni v'rissètchîz nin
qwand dji sospire!
3. Hoûtez-m' Signeûr,
djan, rèspondez-m'
ca dji so rafûlé d'zos lès transes
èt dj'ènnè d'vin tot grigneûs.
4. D'ji n'pou pus hope:
dj'ènna m'sô dèl gueûy'rèye di l'innemi,
di todi d'veûr tini tièsse åx afronts
qu'cès vårins la m'fêt-st-èdurer;
ca is ont låké l'måleûr a mès guètes,
ès leû fureûr, is m'hèyèt-st-a mwért!
5. Dj'a l'coûr qui s'twède ès m'pwètrine,
lès transes dèl mwért toumèt sor mi,
6. sognes èt tronnèdjes m'ont-st-apicî,
dj'ènnè fruzih dès pîds al tièsse.
7. Et dj'a dit:
"Qui n'a-dj'bin dès éles come lès colons?
Adon dj'm'èvol'reûs,
èt dj'sèreûs ès påye".
8. Vochal:
dji m'ènn'ireûs bin lon,
dji biz'reûs èvôye li pus lon possibe,
dj'ireûs d'moni ès dèzèrt.
9. La, dji m'dispètch'reûs di m'mète a houte
po-z-èsse foû dè vint d'orèdje,
di ç'vint la qu'roufèle tot djus.
10. Signeûr, fez lès disparèt',
k'mahîz leû lingèdje!
Ca dji n'veûs avå l'vèye
qui guére èt rudeûr,
11. djoû èt nut'
èles fêt l'toûr dès murayes,
måleûr èt mizére
d'monèt å-d'vins d'sès meûrs.
12. Lès rwènes si stårèt todi pus,
l'acåblèmint èt l'rûse
ni cwitèt nin sès plèces.
13. Si mi-innemi m'måltrètéve,
djèl supwèt'reûs co bin!
Si l'ci qui m'hè, håssîve sor mi,
dji m'catch'reûs d'lu!
14. Mins twè:
twè qu'èst mi-égål,
twè m'camaråde,
twè qui m'kinohe!
15. Awè, twè,
twè avou qui dj'èsteûs loyî,
nos avîs portant gosté èssonne
lès doûceûrs dèl camaradrèye,
tot rotant nosse vôye avou lès djins
vè l'mohone dè bon Diu.
16. Qu'ine tèribe mwért èlzî tome so lès rins!
qu'is d'hindèsse tot-è vike åx inférs!
ca la wice qui d'monèt
c'èst l'må qu'èst mêsse ès leû mohone!
17. Mins mi dji brê après l'Signeûr,
èt nosse Diu vint po m'såver.
18. L'al nut' èt l'å matin,
èco minme so l'côp d'doze eures,
dji mûzèye, dji djèmih:
adon, i hoûte mi vwès.
19. Mi-åme è-st-ès påye
ca i l'a ratch'té,
i l'a sètchî foû dèl guére,
is èstît tél'mint a lî ènnè voleûr!
20. Nosse Diu sîdje dispôy tofér:
èlz'a hoûté, èlz'a rabatou,
ca is n'volît nin candjî,
is n'avît nole sogne dè bon Diu!
21. I bouhe avou sès mins so lès påhûles
èt i profanèye l'aliyance.
22. Si boke èst pus doûce qui dèl crinme
adon qui l'guére è-st-ès fond di s'coûr;
sès mèssèdjes sont pus tinres qui dès boûre
tot-z-èstant pus mètchant qu'dès rèzeûs.
23. Distchèrdjîz-v' di vosse fårdè so l'Signeûr,
c'èst lu-minme qui v'donrè a magnî:
i n'pout må d'abann'ner l'djusse,
dès lèyî toumer po tofér.
24. Mins vos, nosse Signeûr èt nosse Diu,
vos alez lès fé d'hinde èl fosse dès pièrdous
tos cès rûsés pindårds qui rispårdît l'song
n'arivront nin å mitan d'leûs djoûs:
mins mi, c'è-st-ès vos
qui dj'so tot abann'né!
53-54-55-56-57-58-59-60-61-62-63-64-65-66-67-68-69-70-71-72-73-74-75-76-77-78-79-80-81-82-83-84-85
1à22 - 23à52 - 85à110 - 110à131 - 132à150
Psaume 56 (Vulgate 55) Li pwissance favoråbe dè bon Diu.
1. A mêsse dè tchant - so l'êr: "li colon s'a têhou la å lon." Tchant doré d'a Dåvid.- Qwand a
Gath, lès Philistins l'avît-st-apicî.
2. Signeûr,
dinez-m' vosse gråce,
ca l'ome m'a-st-apicî,
chasconk dès djoûs c'èst guére,
èt i m'mète al torteûre.
3. L'immemi m'apice tos lès djoûs,
ènn'a tot plin a m'fé l'guére.
4. Qwand dji so d'vins mès p'tits solés
c'èst-st-ès vos qu'dji m'abann'nèye!
5. Qwand dj'so-st-ès bon Diu,
dji lowe si parole,
dji m'î abann'nèye,
dji n'a sogne di rin!
Li tchår!
Quî pout-èle mi fé?
6. Tote djoû,
is r'toûrnèt mès paroles,
tot leûs tûzèdjes sont conte di mi,
is n'tûzèt qu'po fé l'må!
7. Is sont-st-a l'awète,
is n'mi cwitèt nin dès oûys,
is loukèt mès talons:
is comptèt aveû mi-åme!
8. Es vosse fureûr,
r'tchoûkîz lès ès leû vude,
vos, nosse Diu,
rouflez djus tos lès peûpes!
9. Vos qui t'nez compte
qui dj'a stu tchèssî foû di m'payis,
mètez bin mès låmes di costé;
ni sont-èles nin scrites è vosse lîve?
10. Adon mès innemis bizèt èvôye,
is ont riscoulé l'djoû qu'dj'a brê,
ca çoula djèl sé,
li bon Diu èst por mi!
11. Es bon Diu dji lowe li "parole"
ès Signeûr dji lowe li "parole".
12. Dji m'abann'nèye ès Signeûr,
adon dj'n'a sogne di rin!
L'ome!
Quî poreût-i m'fé?
13. Signeûr,
vos d'zîrs sont lès-meunes,
c'èst por vos, nosse Diu,
qui dj'acwite tote mès ofrandes.
14. Ca v's avez disgadjî mi-åme dèl mwért,
dèl pèrtinne, vos avez rat'nou mès pîds,
po m'fé mî roter d'vant vos,
d'vins l'loumîre dès vikants.
53-54-55-56-57-58-59-60-61-62-63-64-65-66-67-68-69-70-71-72-73-74-75-76-77-78-79-80-81-82-83-84-85
1à22 - 23à52 - 85à110 - 110à131 - 132à150
Psaume 57 (Vulgate 56) Å mitan dès liyons!
1. A mêsse dè tchant - so l'êr: "ni distrûs nin". Tchant diré d'a Dåvid - Qwand èl grote, i coréve èvôye po d'vant Saül.
2. Fez-m' gråce, Signeûr,
fez-m' gråce, dji v's è prèye!
C'è-st-ad'lé vos
qui mi-åme cwîre 'ne a houte,
dji m'a catchî ès l'ombe di vos éles
disqu'a tant qu'lès transes sèyèsse oute!
3. Dji brê-st-après l'bon Diu,
lu qu'èst l'fwért hôt,
po qu'i continouwe por mi
çou qu'il a si bon ataké!
4. Dè cîr, i m'èvôye di l'êde
èt i m'såve,
blåmant-st-insi
ci-la qui m'porsûvéve.
D'å-d'zeûr dè cîr,
il èvôye li gråce èt l'vrêye!
5. Mi-åme è-st-avå lès liyons!
Dji so coûkî la,
dji n'pou bodjî,
livré åx blames dès fis d'l'ome:
leûs dints sont-st-ine lance èt dès flèches,
leû linwe è-st-ine èpèye bin r'ssinmèye.
6. Aspitez ès cîr, Signeûr,
rispårdez vosse glwère so l'tére ètîre.
7. Is apontèt-st-ine atrape so m'vôye -
mi-åme èst cåsî mwète -
is d'foncèt-st-ine fosse po d'vant mi -
is î toumèt zèls-minme.
8. Mi coûr èst bin a vos, Signeûr,
mi coûr èst bin à vos,
dji brê m'djôye,
dji tchante.
9. Dispètches-tu m'glwère,
dispètchîz-v' instrumints a cwèdes,
dj'a îdèye dè dispièrter l'solo!
10. Signeûr,
dji v'lowe avå tos lès peûpes,
dji v'tchante avå lès nåcions,
11. ca vosse gråce èst grande,
èle si s'tint disqu'å cîr,
vosse vrêye èst grande,
èle si s'tint disqu'ås nûlêyes.
12. Aspitez ès cîr, Signeûr,
rispårdez vosse glère so l'tére ètîre.
53-54-55-56-57-58-59-60-61-62-63-64-65-66-67-68-69-70-71-72-73-74-75-76-77-78-79-80-81-82-83-84-85
1à22 - 23à52 - 85à110 - 110à131 - 132à150
Psaume 58 (Vulgate 57) Li djudje dès djudjes dèl tére.
1. A mêsse dè tchant - so l'êr: "ni distrûs nin"
Tchant doré d'a Dåvid.
2. Å vrêye,
vos lès djudjes,
dihez-v' tofér li djustice,
djudjez-v' èl dreûteûr lès fis d'l'ome?
3. Vos apontez l'fås'té
disqu'a minme è vosse coûr,
vos pèzez so l'payîs
avou l'måle fwèce di vos mins.
4. Lès vårins s'distoûrnèt dèdja d'vos
adon qu'sont co al tète,
dês l'hô d'leû mame is s'trompèt d'dja
zèls qui n'savèt fé qu'mintî!
5. Leû vènin èst tot fî parèy
qui l'vènin d'on sièrpint,
is r'ssonnèt a l'aspic deûr d'orèye
èt qu'fêt co pôr li soûrdo,
6. po n'nin ètinde li vwès dès andoûleûs,
ni l'cisse d'in' èstchanteû
adrèt' a v'mète d'vins l'èstchantemint.
7. Vos nosse Diu,
spiyîz leûs dints ès leû boke,
vos Signeûr,
råyîz l'gueûye dès liyons!
8. Qu'ènnè vonse come di l'êwe rispårdowe!
Qu'is s'fènèsse come lès jèbes qu'on tripèle!
9. Qui sèyèsse come li lum'çon
qui fond tot 'nn'alant s'vôye,
come li p'tit crawé dèl feume,
qui n'a nin minme vèyou l'solo.
10. Divant qu'is n'crèhèsse
come lès spènes d'on ronhis,
fris' ou r'ssouwés,
qu'on måva vint èls èpwète!
11. Li djusse si rafèye tot,
ca d'vant sès oûys i veût l'vindjince,
i f'rè-st-on bagn' di pîs
avou l'song' dès vårins!
12. L'ome dit:
" å vrêye,
i-n-a-st-ine rèscompinse po l'djusse,
i-n-a-st-on Diu qui djudje li tére!"
53-54-55-56-57-58-59-60-61-62-63-64-65-66-67-68-69-70-71-72-73-74-75-76-77-78-79-80-81-82-83-84-85
1à22 - 23à52 - 85à110 - 110à131 - 132à150
Psaume 59 (Vulgate 58) Disconte lès impîyes!
1. A mêsse di tchant - so l'êr: "ni distrûs nin".
Tchant doré d'a Dåvid: qwand Saül féve wårder s'mohone po poleûr li touwer pus åhèy'mint.
2. Signeûr nosse Diu,
disgadjîz-m' di mès innemis,
mètez-m' a houte
dè cis qu'm'atakèt!
3. Disgadjîz-m' di tos cès-la
qui n'fêt qu'dès calin'rèyes!
Såvez-m' dès omes rafårés d'song'!
4 . Ca vos-lès-chal:
is volèt-st-apicî mi-åme,
dès såvadjes si rapoûlèt-st-åtou d'mi;
èt portant Signeûr:
dji n'a pont fêt d'pètchî,
dji n'mi rapinse nou forfêt!
5. Disconte di mi, qu'so sins pètchî
i-z-abrokèt, is s'aprèstèt!
Aspitez a m'rèsconte, Signeûr,
abèye, vinez veûy!
6. Vos, l'Signeûr dès armêyes,
li Diu d'Israël,
aspitez po pûni tos lès peûpes,
nole pitché po cès trêtes qui fêt l'må!
7. Is rim'nèt l'al nut',
is hoûlèt come dès tchins,
is corèt tot avå l'vêye,
8. vochal:
li same èlzî vint al boke,
dès èpèyes sont so leûs lèpes,
quî don pou lès ètinde?
9. Mins is v'fêt bin rire, Signeûr,
vos v'mokez d'tos lès payins!
10. Disconte si fwèce,
c'è-st-ès vos qu'dji m'wåde,
Nosse Diu,
c'èst vos mi ç'tadèle.
11. Li Diu di mi-amoûr rote po d'vant mi,
i m'fêt-st-aporçûre lès cis qui m'awêtèt!
12. Ni lès marcåssez nin, Signeûr,
mi peupe èl roûvèy'reût so l'côp!
Al plèce, kitchèssîz lès avå l'tére,
qui vosse pwissance lès acåble,
Vos nosse prôtecsion
èt nosse Diu.
13. Lès mèssèdjes qu'èlzî m'nèt åx lèpes
sont l'pètchî d'leû boke
is s'f'ront-st-apicî par leûs grandès êrs,
adon is k'fèss'ront leûs djuras, leûs trêtise.
14. Signeûr,
distrûhez lès avou fureûr,
distrûhez lès qu'is s'sèyèsse pus!
adon is såront-st-insi
qui Diu èst mêsse so Djåcob,
disqu'å coron dèl tére.
15. Is rim'nèt l'al nut',
is hoûlèt come dès tchins,
is corèt tot avå l'vêye.
16. Ennè vont hår èt hote,
cwèrant-st-on bokè a magnî,
mins sins èsse ripahou
is s'èfincèt d'vins l'neûristé.
17. Adon dji tchante vosse fwèce,
dês l'å matin dji tchante vosse gråce:
ca c'èst vos mi ç'tadèle,
mi rèfûdje qwand dj'a sogne!
18. Adon dji v'tchante
vos qu'èstez m'fwèce,
Vos signeûr qu'èstez mi ç'tadèle,
vos l'Diu di mi-amoûr!
Dji so véci.
53-54-55-56-57-58-59-60-61-62-63-64-65-66-67-68-69-70-71-72-73-74-75-76-77-78-79-80-81-82-83-84-85
1à22 - 23à52 - 85à110 - 110à131 - 132à150
Psaume 60 (Vulgate 59) Priyîre d'on peûpe qui vint d'èsse batou!
1. A mêsse di tchant -tèmwègnèdje po-z-ac'sègnî -
Tchant doré d'a Dåvid.
2. Qwand i moussîve foû po 'nn'aller disconte lès Syriens dès Deûs-Fleûves, disconte lès Syriens d'a Koba, èt qwand Joab s'ènnè r'vint bate Edom ès vå dè Sé, èlzî marcåssant doze mèyes omes.
3. Signeûr:
vos nos avez-st-abann'né,
vos nos avez batou a plate costeûre,
vos v's avez måvlé;
djan rim'nez vè nos-ôtes!
4. Signeûr:
vos avez k'tapé tote li tére,
vos l'avez minme findowe,
abèye, r'wèrihez sès plåyes
ca èle halcotèye tote!
5. Vos fez d'coviért a vosse peûpe
li ci "qu'on n'pout fé ployî".
Vos nos d'nez on vin po l'beûre,
mins ç'vin la nos rind toûrnisse!
6. Mins a vos fruzihants
vos d'nez 'ne banîre,
po qu'is s'rassonnèsse èl loukeûre
dè ci qu'èst l'vrêye.
7. Po qu'vos binamés sèyèsse dilîvrés,
såvez lès par vosse dreûte,
rèspondez-nos!
8. Nosse Diu djåze ès s'sint'té:
"C'èst mi qui gangne,
dji m'va pårtèdjî Sichem,
dji m'va mèz'rer l'vå d'Souccoth,
9. "Galaad èst por mi,
Manassé l'è-st-ossi,
Ephraïm è-st-on casse po m'tièsse,
Djudas èst m'baston di k'mand'mint,
10. "Moab èst l'bassin wice qui dji m'lave,
dji hine mi solé so l'tére d'Edom,
èt twè Philistie,
por mi, brês don victwère. "
11. Quî m'min'rè-st-èl fwète vêye?
Quî m'amin'rè vè Edom?
12. N'èst-ce nin Vos Signeûr
qui nos aveût-st-abann'né,
N'èst-ce nin Vos Signeûr
qui n'sortéve pus avou nos årmêyes?
13. Acorez a nosse sécoûrs
ca nos innemis nos acåblèt:
èt l'dilîvrance par l'ome
è-st-ine promèsse al vûde...
14. C'è-st-ès Diu qu'nos fordjans l'pwissance,
lu-minme, i vint spater
tot qui nos acåble!
53-54-55-56-57-58-59-60-61-62-63-64-65-66-67-68-69-70-71-72-73-74-75-76-77-78-79-80-81-82-83-84-85
1à22 - 23à52 - 85à110 - 110à131 - 132à150
Psaume 61 (Vulgate 60) Priyîre d'onk qu'a stu tchèssî foû di s'payîs.
1. A mêsse dè tchant - so in' instrumint a cwèdes -
D'a Dåvid.
2. Hoûtez m'plinte, Signeûr,
fez bone aconte a m'priyîre!
3. D'å coron dèl tére dji brê-st-après vos,
ca dj'a m'coûr qui s'èneûrih;
i-n-a qu'vos po m'kidûre so l'rotche
qui dj'so trop p'tit po-z-ac'sûre!
4. Por mi v's èstez in'a houte,
mî qu'ine fwète toûr po d'vant l'innemi!
5. Dji d'meûre ès vosse tinte po todi,
dji so si bon a houte ès mistére di vos éles,
6. Ca vos Signeûr, vos hoûtez mès veûs,
vos d'nez l'èritèdje a quî fruzih po vosse nom!
7. R'mètez saqwantès djoûs åx djoûs dè rwè,
qui sès annêyes si stindèsse
di jènèråcion an jènèråcion!
8. Qui li rwè d'meûre po tofér po d'vant vosse vizèdje,
k'mandez a vosse gråce èt vosse vrêye
d'èsse todi ad'lé lu po l'wårder!
9. Awè, dji tchant'rè vosse Nom a jamåy,
po rimpli mès veûs al dilongue dès djoûs.
53-54-55-56-57-58-59-60-61-62-63-64-65-66-67-68-69-70-71-72-73-74-75-76-77-78-79-80-81-82-83-84-85
1à22 - 23à52 - 85à110 - 110à131 - 132à150
Psaume 62 (Vulgate 61) Nosse Diu èst l'seûl èspwér.
1. A mêsse di tchant, a Iduthun, tchant d'a Dåvid.
2. Awè, i-n-a qu'ès bon Diu
qui mi-åme èst tote påhûle,
ca c'èst d'Lu
qu'vint mi d'lîvrance.
3. Lu seûl èst m'rotche,
awè, i m'dilîvrêye,
il è-st-ossi mi ç'tadèle,
avou Lu dji n'såreûs halcoter.
4. Disqu'a qwand alez-v' abrokî so l'ome?
Vos èstez turtos dès moudreûs,
come on meûr qu'ènnè va tot,
ou come 'ne cloteûre qui tome djus!
5. Awè, is cwèrèt po l'bouhî djus d'tote si hôteûr,
tot leû plêzîr è-st-èl mint'rèyes;
avou leû boke is d'net l'bènèdicsion
adon qu'ès leû coûr is mådihèt.
6. Awè mi-åme,
seûye påhûle ès nosse Diu,
ca mi-èspwér vint d'Lu,
7. Lu seûl èst m'rotche,
awè, i m'dilîvrêye,
il è-st-ossi mi ç'tadèle,
avou Lu dji n'såreûs halcoter.
8. Mi glwère èt m'dilîvrance
rispwèzèt so l'bon Diu;
li rotche di m'fwèce èt m'rèfûdje:
c'èst Diu.
9. Vos-ôtes, totes lès nåcions,
a tot moumint, abann'nez-v' ès bon Diu,
droviez vosse coûr divant Lu,
ca po nos-ôtes il è-st-ine fameûse a houte.
10. Lès fis d'l'ome ni sont qu'on sofla,
lès fis d'l'ome ni sont qu'ine îdèye,
is montrît avou l'platê dèl balance
ca èssonne is sont pus lèdjîr qu'on sofla!
11. Ni v'fiyîz nin al fwèce ni al rapine,
ni sèyîz' don nin dès bwègnes vês;
si minme vosse magot s'infèle,
ni lèyîz nin s'î atèler vosse coûr!
12. Ine fèye nosse Diu a djåzé,
èt dj'a-st-ètindou dob'mint:
c'èst qu'tote li fwèce è-st-ès Signeûr!
13. Signeûr, li gråce èst d'a vos,
ca vos rindez a l'ome sorlon sès oûves!
53-54-55-56-57-58-59-60-61-62-63-64-65-66-67-68-69-70-71-72-73-74-75-76-77-78-79-80-81-82-83-84-85
1à22 - 23à52 - 85à110 - 110à131 - 132à150
Psaume 63 (Vulgate 62) Deux versions. Es Jahvé, nosse seûl Diu.
1. Tchant d'a Dåvid, qwand il èsteût ès dézêrt.
2. Jahvé, c'èst vos qu'èst m'Diu,
dji v'qwîre dispoy tot timpe!
Mi åme a tél'mint seû d'vos
qui tot m'cwér ènnè lanwih,
so 'ne sètche tére,
rissouwêye, sins êwe!
3. Insi, dji n'arèstêye ni di v'loukî
èl mohone di v'sint'té
dji vôreûs tant veûy
vosse fwèce èt vosse glwère!
4. Ca voste amoûr våt mî qu'li vèye:
mi boke tchant'rè vos mèrvèyes.
5. Awè, dji v'bènirè tot-oute di m'vèye,
dj'èlîve lès mins ès vosse nom!
6. Mi åme si r'pah d'vos
come si v's èstît 'ne cråsse eûrêye,
mès lèpes vis tchantèt
èt m'boke f'rè sèpi vosse glwère.
7. Coûkî so m'lét
dji m'sovins d'vos;
ès vos, åx vidjîles,
dji tûze èt ratûze.
8. Ca v's èstez m'sécoûrs,
dji potche di djôye
ès l'ombe di vos éles.
9. Mi åme s'a r'loyî avou vos,
vosse dreûte mi prind po d'zos l'brès'!
10 Zèls, is sont po distrûre,
is volèt avu m'åme,
is aspitèt dès abîmes dèl tére.
11. Mins tchoûkî so l'tèyant d'l'èpèye,
is sèront-st-ine bone prôye po lès leûs.
12. Li rwè s'rafèye ès Jahvé,
èt tot quî djeûre ès nosse Diu
porè dim'ni plin d'glwère,
ca èlle a-stu cozowe
li boke dès conteûs d'boûdes.
53-54-55-56-57-58-59-60-61-62-63-64-65-66-67-68-69-70-71-72-73-74-75-76-77-78-79-80-81-82-83-84-85
1à22 - 23à52 - 85à110 - 110à131 - 132à150
Psaume 63 (Vulgate 62) Li d'zîr dè bon Diu.
1. On tchant d'a Dåvid: ès dèzêrt di Judée.
2. Signeûr, vos èstez m'Diu,
dji v'qwîre dispôye tot timpe!
Mi-åme a seû d'vos,
tot m'cwér lanwih après vos,
so 'ne tére tote sètche,
tote rissouwêye, sins êwe!
3. C'è-st-insi qu'èl mohone di v'sint'té
dji v'louke di tos mès oûys,
dji vôreûs tant veûy
vosse pwissance èt vosse glwère!
4. Ca i våt mî piède li vèye
qui d'piède vosse gråce!
Mès lèpes f'ront sèpi vos mèrvèyes.
5. Awè,
dji v'bènirè al dilongue di m'vèye,
dês qu'dj'ètind vosse nom
i fåt qu'dj'èlîve mès mins!
6. Mi åme s'a r'pahou d'vos
come si v's èstît 'ne cråsse eûrêye,
mès lèpes vis tchantèt
mi boke f'rè sèpi vos mèrvèyes.
7. Si, coûkî so m'lét,
dji m'sovins d'vos;
qwand dj'so-st-åx vidjîles,
c'èst co a vos qu'dji tûze!
8. Ca v's èstez m'sécoûrs,
dji brê d' djôye
d'èsse l'ombe di vos éles.
9. Mi åme s'ûnih avou vos,
vosse dreûte m'soutint po d'zos l'brès'.
10 Is sont po distrûre,
is r'cwèrèt mi-åme,
is aspitèt dèl parfondeûr dèl tére;
11. on lès tchoûk'rè so l'tèyant d'l'èpèye;
ine prôye po lès leûs,
vola çou qu'is sèront!
12. Li rwè s'rafèye ès bon Diu!
Tot qui djeûre ès nosse Diu
porè dim'ni plin d'glwère,
ca l' boke dès minteûs sèrè cozowe!
53-54-55-56-57-58-59-60-61-62-63-64-65-66-67-68-69-70-71-72-73-74-75-76-77-78-79-80-81-82-83-84-85
1à22 - 23à52 - 85à110 - 110à131 - 132à150
Psaume 64 (Vulgate 63) Chatumint po l'ci qu'frêt cori dès brûts so lès-ôtes.
1. A mêsse dè tchant, tchant d'a Dåvid.
2, Signeûr, hoûtez l'cri di m'plinte!
èspêtchîz-m' d'aveûr sogne di l'innemi!
3. Hapez-m' foû d'cisse bande di mètchants,
rissètchîz-m' di l'arèdje dès fordjeûs d'vûs!
4. Ca is r'ssinmèt leû linwe
co pé qu'in' èpèye,
èt adon come flèche
is v'hinèt-st-ine amére parole.
5. Is sètchèt-st-è catchète so l'inocint,
awè, d'on côp is sètchèt sor lu
n'åyant sogne di rin...
6. Is s'rafwèrcihèt d'vins leûs målès îdèyes,
is djåzèt minme d'ètèrer quéquès trapes,
si d'hant onk a l'ôte:
"quî don poreût nos veûy?"
7. Is èmantchèt dès indjustices,
mètant l'djèrinne min a leû plan;
å-d'vins d'chaskeun' di zèls,
li coûr è-st-on trô sins fond!
8. Mins tot d'on côp,
nosse Diu èlzî hène 'ne flèche,
Vo-l'-zès-la-st-ac'sû,
èt leûs blèsseûres sonnèt!
9. Leû linwe èlz'a fêt trèbouhî so zèls-minme;
tot qui lès veût coûrt èvôye!
10. Tos lès-omes ènnè fruziront d'sogne,
is f'ront sèpi l'oûve d'a nosse Diu,
adon is veûront clér
èl manîre dè fé d'å Signeûr.
11. Li djusse si rafèye ès Signeûr,
i s'fêt tot p'tit d'vins sès brès;
Tos lès francs coûrs s'èlèvèt-st-èl glwère.
53-54-55-56-57-58-59-60-61-62-63-64-65-66-67-68-69-70-71-72-73-74-75-76-77-78-79-80-81-82-83-84-85
1à22 - 23à52 - 85à110 - 110à131 - 132à150
Psaume 65 (Vulgate 64) Îme po rinde gråce å bon Diu.
1. A mêsse dè tchant - îme - tchant d'a Dåvid.
2. Por vos Signeûr,
è Sion, li silince èst louwanje;
por vos Signeûr,
li veû sèrè rimpli!
3. Vos, qui hoûtez l'priyîre,
tote tchår vint disqu'a Vos.
4. Le vrêye so mès pètchîs
èst por mi trop pèzante a pwèrter,
mins vos,
vos nos d'nez vosse pardon.
5. Qu'il è-st-ureûs
li ci qu'vos avez tchûzi,
qu'il è-st-ureûs
li ci qu'vos v'nez ad'lé lu:
i håbit'rè vos parvis;
Nos sèrans r'pahous dès bins d'vosse mohone,
dèl sint'té d'vosse palå!...
6. Hôts fêts d'vosse djustice!
vos nos acontez,
vos, li Diu d'nosse dilîvrance,
èspwér d'a turtos disqu'å coron dèl tére,
disqu'ås mérs bin lon èrî d'chal!
7. Vos afèrmihez lès hôteûrs è vosse fwèce,
Vos avez l'pwissance åtou d'vos rins!
8. Vos akeûhez l'fracas dès mérs,
èt l'fracas dès vågues,
èt tot l'arèdje dès peûpes dèl tére.
9. Lès djins qui d'monèt å coron dèl tére
ont sogne dè vèyî tos vos sègnes.
Vos fez tchanter lès pwètes
di l'å matin èt d'l'al nut'.
10. Vos v'nez viziter l'tére,
èt vos l'rindez sôle,
vos l'fez d'bwèrder d'ritchèsses;
li rèw dè bon Diu s'rimplih d'êwe;
vos 'lzî aprèstez dè frumint,
c'è-st-insi qu'vos apontez l'tére,
11. vos ramouyîz lès rôyes,
vos rabatez sès crèsses,
vos l'ramolihez d'ine fène plêve,
vos bènihez tos sès botons...
12. Vos èwalpez l'annêye d'vins vos bontés,
vos pazêz sont r'lûhants d'cråhe.
13. Lès pahis dè dèzêrt apihèt l'êwe,
totes lès hôteûrs sont-st-è fièsse.
14. Lès prêrèyes si drapèt d'bèrbis,
lès fonds si r'covrèt d'grin;
is n'savèt rat'nî leûs cris d'djôye,
awè, is sont sôs tél'mint is tchantèt...
53-54-55-56-57-58-59-60-61-62-63-64-65-66-67-68-69-70-71-72-73-74-75-76-77-78-79-80-81-82-83-84-85
1à22 - 23à52 - 85à110 - 110à131 - 132à150
Psaume 66 (Vulgate 65) Po rinde gråce tos èssonne.
1 A mêsse dè tchant - on tchant- ine îme:
Brêyez vosse djôye å Signeûr,
vos, tos lès djins dèl tére!
2. Louwez l'glwère di s'nom,
glôrifiyîz-l' ès s'louwanje,
3. dihez-st-å bon Diu:
"quénès hôts fêts qu'totes vos oûves!"
A cåse dèl grandeûr di vosse pwissance,
vos innemis platch'tèt-st-åtou d'vos.
4. Tote li tére si mète a gngnos d'vant vos,
èle tchante por vos,
èle tchante vosse nom!
5. Vinez veûy lès hôts fêts d'å bon Diu,
tèribe èst si-ovrèje ad'lé lès omes:
6. i candje li mér,
èle divint ine tére bin solide,
is passèt minme so l'fleûve a pîds!
Rafiyans nos don ès nosse Diu!
7. Par si pwissance,
po tofér, il a mêstri l'tins;
sès oûys awêtèt lès peûpes,
lès rèbèles ni s'ridrèssèt pus conte di Lu!
8. Ô! Vos tos lès peûpes, bènihez nosse Diu,
hoûtez l'vwès di s'louwanje!
9. C'èst lu qu'mète li vêye ès noste-åme,
is èspètche nos pîds d'trèbouhî;
10. ca vos nos èsprovez, Signeûr,
vos nos broûlez
come l'årdjint qu'on purifiyêye.
11. Vos nos avez-st-apicî èl trape,
vos nos avez strindou lès rins
come divins on vis'.
12. Vos èscorèdjîz l'galop dès omes so nosse tièsse,
nos avans d'vou passer ès feû, ès l'êwe;
adon vos nos avez r'sètchî foû d'tot ça,
èt v's avez droviou noste-åme!
13. Dj'ènn'irè ès vosse mohone
avou mès ofrandes,
por vos,
dji rimplirè mès veûs.
14. Ca po 'lzès dire
mès lèpes sont si droviètes,
mi boke èlz'a d'bités
adon qu'dj'èsteûs strindou!
15. Dji v's ofrirè dès bonès cråssès bièsses,
avou come incinse dèl foumîre di bassîs;
dj'apont'rè totes mès ofrandes
avou dès boûfs èt dès boucs.
16. Vinez ad'lé mi èt prustez l'orèye,
qui dji v'raconte a turtos,
vos lès fruzihants po l'bon Diu,
tot çou qu'l'a fêt po mi-åme.
17. Mi boke brêt-st-après Lu,
dèdja l'complumint èst so m'linwe.
18. Si å fond di m'coûr,
dj'èsteûs plin d'indjustice,
nosse Diu n'm'åreût nin aconté!
19. Mins l'bon Diu a hoûté,
il a stu tot akeûy po m'priyîre.
20. Qui l'bon Diu seûye bèni!
I n'a nin r'tchoûkî m'priyîre,
i m'èwalpèye di s'gråce.
53-54-55-56-57-58-59-60-61-62-63-64-65-66-67-68-69-70-71-72-73-74-75-76-77-78-79-80-81-82-83-84-85
1à22 - 23à52 - 85à110 - 110à131 - 132à150
Psaume 67 (Vulgate 66) Nos r'mèrcihans l'bon Diu po tos lès frûts dèl tére.
1. A mêsse dè tchant - so lès instrumints a cwèdes. On tchant - ine-îme.
2. Qui l'Bon Diu nos fêsse gråce!
Qui l'bon Diu nos bènihe!
Qu'amon nos-ôtes
i fêsse rilûre si vizèdje!
3. Po nos fé k'nohe si vôye so l'tére,
po fé k'nohe si d'lîvrance a chaskeun' dès peûpes!
4. Qui lès nåcions vis louwèsse, Signeûr,
qui tos lès peûpes vis louwèsse!
5. Qui lès nåcions s'rafiyèsse,
qu'èles sèyèsse-st-èl djôye:
ca vos djudjîz lès peûpes èl dreuteûr,
ca vos minez lès nåcions dèl tére.
6. Qui lès peûpes vis louwèsse, Signeûr,
qui tos lès peûpes vis louwèsse!
7. C'è-st-a make
qui l'tére done sès frûts!
Li Signeûr nosse Diu nos bènih.
8. Qui l'Signeûr nos bènihe,
qui disqu'å coron dèl tére
on fruzihe por Lu.
53-54-55-56-57-58-59-60-61-62-63-64-65-66-67-68-69-70-71-72-73-74-75-76-77-78-79-80-81-82-83-84-85
1à22 - 23à52 - 85à110 - 110à131 - 132à150
Psaume 68 (Vulgate 67) Po fé l'sov'nance dè sôr privilédjî d'Israël.
1. A mêsse dè tchant. D'a Dåvid. On tchant. Ine îme.
2. A ponne nosse Diu si r'lîve-t-i 'ne miète,
qui sès innemis spitèt èvôye come dès diâles,
adon is bizèt bin lon èrî d'Lu,
ca zèls qui n'polît l'veûy, ni l'sinti,
ni sårît vor'mint nin sout'ni
l'aveûglante loumîre di s'vizèdje.
3. Sins r'lå vos 'lzès trak'nez,
is ont disparètou come flåwih li foumîre,
is fondèt come dèl cîre mètowe so l'feû;
lès rèprovés pèrihèt po d'vant l'bon Diu.
4. Lès djusses, zèls, bagnèt ès leû cråhe,
is potchèt d'djôye po d'vant l'Signeûr,
li coûr disbwèrdant d'boneûr
ènnè vont tot potch'tant!
5. Tchantez-l', vos tos sès andjes,
batez dès mins tos sès sints,
damez-st-ine tchåssèye po l'Ci
qui s'chèv dès nulèyes po fé sès tchårs!
Rafiyî-v' ès vosse Diu,
sèyîz'ès fièsse po d'vant s'vizèdje!
6. Vochal li pôrtrêt d'nosse Diu
ès li r'pêre di s'sint'té:
il è-st-on pére po lès ôfulins,
èt on d'findeû po lès vèves.
7. C'èst Lu qu'ramonne lès d'sseulés
so leû påtrimwinne,
c'èst co Lu qu'a fêt m'ni foû tot tchantant
lès-cis qu'èstît èlahîs d'vins lès tchinnes,
mins cès la qu'n'ont nin volou l'sûre
håbitèt asteûre 'ne sitårêye broûlèye a crahês.
8. Signeûr, sov'nez-v' don dè djoû:
qwand vos avez m'nou foû so li d'vant d'tot vosse peûpe,
èt qu'vos fîz porcèssion tot avå lès dèzêrts;
tote sèfokèye, li tére ènnè tronna,
minme lès cîrs ènnè sûni,
9. tot vèyant l'Signeûr d'moni so l'Sinaï,
tot vèyant l'Signeûr, li Diu d'Israël.
10. Signeûr,
fez nos l'årdjèsse d'on clapant lavasse,
ravigurez vosse prôpe tére,
c'èst l'cisse qui v's avez gangnî
so tos vos innemis!
11. Fez-î rimni l'vêye,
insi nos sårans î d'moni!
Fez-î toumer dès bonès plêves
po fé raviker tot çou qui s'lêt aler!
12. Signeûr,
dinez don l'ôrde qui turtos ratindèt,
voste årmêye s'ènnè rafèy'rè,
13. lès princes dès milices vont s'clintchî,
èles f'ront todi pus,
èt tos lès prés dè payis
vont s'pårtèdjî 'ne parèye ôbinne!
14. Si l'êwe poléve tot l'minme toumer
inte lès bayes di nos cotièdjes,
lès éles dè colon sèrît r'coviètes d'årdjint,
èt leûs grandès pènes sèrît mayetêyes d'ôr!
15. Qui l' "Tot Pwissant" lêt fé lès princes
adon l'nîvaye toum'rè so l'cô so l'Salmon.
16. C'è-st-ine tèribe hôteûr
qui l'hôteûr di Bashan!
C'è-st-ine grandiveûse hôteûr
qui l'hôteûr di Bashan!
17. Vos l'grandiveûse,
poqwè don cisse måle djaloz'rèye
so l'hôteûr qui nosse Diu s'a tchuzî
po-z-î mète si sîdje?
Awè, l'bon Diu î a drèssé s'tinte,
i lî a mètou po tofér.
18. Nosse Diu a co pus d'cint mèyes
tchårs di guére di totes sôrs,
il a-st-ossi dès mèyes d'andjes
po sètchî dès flèches,
èt tot çoula arive dè Sinaï
ès li k'pagnèye di tos lès sints.
19. Vos montez, vos l'pus nôbe,
tot-z-èhèrtchant lès èlahîs podrî vos,
èt v's avez minme riçû dès dons d'leûs mins,
is v'lès fît d'on bon coûr!
Mins lès-cis qui v's ont r'noyî
ont disparètou, rafûlé,
ca c'èst vos
li Signeûr nosse Diu!
20. Qui nosse Diu seûye bèni
al dilongue dès djoûs,
ca i nos a d'halé
d'on tèribe horkê!
Awè crèyez-m',
c'èst Diu qu'nos såve!
21. Po nos-ôtes,
li bon Diu èst l'Diu dèl dilîvrance,
gråce å Signeûr nosse Diu,
nos polans hiper foû dès mins dèl mwért!
22. Awè sins r'proche,
nosse Diu a broyî l'tièsse di sès innemis,
c'èst tot potchant d'å-d'zeûr dès cîrs
qu'èlzî a d'foncé leû cråne!
23. L'bon Diu a dit:
"Dj'a sèfokè l'sièrpint,
èt dj'a minme muz'lé
tos lès gofes dèl mér "
24. Tos lès k'djåzeûs ont stu k'hoyous ès leû song,
tot come si on batéve li boûre,
lès rèsses qu'ènn'a toumé,
lès tchins s'ènn'ont r'pahou!
25. An'mirez don l'fôrmidåbe convwè,
él fåt veûy po-z-ariver a l'creûre!
C'èst l'convwè d'å Signeûr nosse Diu,
qui monte å mitan d'tos sès sints.
26. Droviant l'marche,
lès tchanteûs sont so li d'vant,
qwand ås muzichins,
is v'nèt tot a fêt podrî,
èt so l'å mitan,
dès djonnès fèyes djouwèt so l'tamboûrin.
27. D'on seûl coûr èt tos-èssonne,
bènihez l'Signeûr!
C'èst Lu l'bon Diu
qu'èst l'fontinne po Israël!
28. Loukîz on pô la qui vo-chal,
la, l'pus p'tit,
c'èst Benjamin l'pus djonne
qu'èst leû capitinne!
Loukîz la ossi lès princes di Djuda
avou totes leûs djins!
Minme lès princes di Zabulon
avou lès-cis d'Nephtali!
29. Signeûr,
dinez l'ôrde a vosse pwissance,
al vosse,
dè m'ni ad'lé nos-ôtes!
Rafwèrcihez don Signeûr,
tot çou qu'vos avez fêt po vosse peûpe!
30. Vosse palå, vos qu'èst l'pus hôt,
è-st-a Djèruzalèm!
Lès rwès î tchèrèt dèdja dès cadôs
po s'fé vin veûy!
31. Man'cîz don l'monse
qu'èst la catchî d'vins lès djoncs,
man'ciz l'bande di torês
avou tos leûs djonnes,
ca, ès leû coûse po fé crèhe
leû hopê d'pèces d'årdjint:
is trop'lèt so lès peûpes,
èlzès bazårdèt on pô tot-avå,
tant leû complêhance
a cwèrî mizére ås-ôtes.
32. Qui lès ècråhîs fêsse vini lès impôts
dè payîs dèl dobe transe!
Qui l'Ethiopie si dispètche
d'aminer sès trèzôrs å Signeûr!
33. Tchantez vos lès rwès dèl tére!
Vos lès dius, batez dès mins,
tot tchantant po l'Signeûr!
34. Lu qu'va-st-a dj'vå so lès cîrs,
so lès pus hotès hôteûrs dès cîrs!
Oyez: I done dèl vwès,
èt s'vwès rèsdondih!
35. Rindez lî glwère vos lès dius!
Ca li glwère èt l'oneûr di s'nom,
li r'glatihèdje dè fwért hôt d'Israël
fêt craqué lès nûlèyes.
36. Dispôy si palå,
nosse Diu nos fêt frûzî d'sogne.
Il èst l'Diu d'Israël,
Lu, èt Lu tot seû!
I nos fêt aveûr pårt
a s'glwère, a s'fwèce!
Twè l'peûpe qu'i s'a tchûzi, bènih ti Signeûr!
53-54-55-56-57-58-59-60-61-62-63-64-65-66-67-68-69-70-71-72-73-74-75-76-77-78-79-80-81-82-83-84-85
1à22 - 23à52 - 85à110 - 110à131 - 132à150
Psaume 69 (Vulgate 68) Lamèn'tåcions!
1. A mêsse dè tchant. D'a Dåvid.
2. Såvez-m' Signeûr:
ca lès êwes montèt disqu'a mi-åme!
3. Sins r'lå dji m'èfonce ès broûlî d'l'abîme,
èt nin 'ne saqwè po m'î rat'nî;
dji so-st-èhèrtchî å pus parfond dès êwes:
lès grantès-êwes mi m'nèt al copète dèl tièsse!
4. Dji n'pou pus hope tél'mint dj'a dèdja brê,
dj'ènn'a l'feû ès gozî!
Mès oûys si k'magnèt tot
d'èsse al rawåde di nosse Diu!
5. Zèls, is m'hayèt sins cåse,
èt tot èssonne is sont bêcôp pus
qui lès dj'vès qu'dj'a so m'tièsse;
tos cès innemis qui vikèt-st-èl mint'rèye
sont tél'mint fwért, tél'mint sûr di zèls,
qu'is vårît bin m'touwer;
çou qu'dji n'a nin hapé,
divreûs-dj' èlzî rinde?
6. Signeûr, vos k'nohez mès soterèyes,
èt mès lèdès keûres ni v's ont nin vwèlèyes!
7. Signeûr dès årmèyes,
qui lès cis qu'èspérèt tot d'vos
n'ayèsse nin honte a cåse di mi!
Vos l'Diu d'israël,
qui tos lès cis qui v'ricwèrèt
ni rodjihèsse nin a cåse di mi!
8. Ca por vos dji m'lê trêtî d'tos lès noms,
li rodje dèl honte mi maskêye li vizèdje.
9. Dji so-st-ine ètrindjîr po mès frés,
lès fis di m'mame ni volèt ni m'riknohe!
10. Po vosse mohone,
dji m'sin k'picî d'djaloz'rèye;
on v's èlz'a dit totes,
èt leû bassèsse a r'toumé sor mi!
11. Mi-åme dimone a djon-coûr,
èt dj'ènnè r'souwe tot,
c'èst minme ine ocåzion d'pus
di m'fé trêtê d'tos lès noms!
12. Dji m'mousse di teûle di sètch,
èt dj'a dim'nou l'fåve d'a turtos!
13. Chal so l'ouf,
lès balzineûs ram'tèt so m'compte,
èt po s'moker d'mi,
lès buveûs d'likeûr fêt des tchansonètes!
14. Min mi Signeûr,
c'èst vos qu'dji prèye,
èl grandeûr di vosse tinre amoûr,
qwand l'tins d'vosse gråce èst la;
rèspondez-m', vos nosse Diu,
po m'mostrer l'vrêye di vosse dilîvrance.
15. Råyîz-m'foû dè broûlî,
qu'adon dj'n'î èfonce pus!
Dji sèrè disgadjî d'tos lès hayåves
èt dès êwes sins fond!
16. Qui lès grantès-êwes ni m'nèyèsse nin!
Qui dji n'seûye nin hapé ès l'abîme!
Qui l'fosse ni r'clape nin s'geûye sor mi!
17. Rèspondez-m' Signeûr,
vosse gråce fêt tant d'bin!
Tapez vos oûys sor mi Signeûr,
vos qu'èstez tote mizèricôr!
18. Ni catchî nin vosse vizèdje po vosse chèrviteû:
dji sèfoke, dispètchîz-v' di m'rèsponde!
19. Vinez don ad'lé mi po payî m'ratchetèdje,
ratch'tez-m' a cåse di mès innemis!
20. Vos k'nohez lès tètches qui maculèt mo-oneûr,
vos k'nohez m'honte èt mès êrs po plach'ter;
tos lès cis qui m'tinèt a gogne
sont la po d'vant vos oûys!
21. Mi bassèsse mi brôye li coûr,
dji m'sins 'nn'aller;
dji supliyèye qu'on åye pitché;
rin! ènn'a nouk po m'rapåfter!
22. Is ont mètou dè pwèzon ès mi-amagnî,
dj'aveûs seû èt dj'a-st-avu dè vinêgue!
23. D'vant zèls, leû tåve è-st-ine trape,
èlle è-st-on cèp po tos lès florihants.
24. Qui foû d'leûs oûys,
is n'vèyèsse pus qu'dèl neûristé!
Qui leûs rins tronnèsse
sins måy poleûr si r'haper!
25. D'vièrsez sor zèls tote vosse fureûr,
li feû d'vosse colére lès ac'sûrè!
26. Leû camp'mint sèrè ravadjî,
ènn'årè pus nouk po d'moni d'zos lès tintes!
27. Is porsûvèt l'ci qui v's avez bouhî,
is djåspinèt so lès plåyes di vos blèssîs.
28. Po leûs forfêts, rindez 'lzî l'fôrfêt!
Qu'is n'åyèsse nole pårt a vosse djustice!
29. Qu'is sèyèsse rabatou djus dè rédjisse dès vikants,
qu'is n'sèyèsse nin rachou so l'lisse dès djusses!
30. Et por mi,
qui so minåbe, qu'èst blèssî,
Signeûr,
vosse dilîvrance mi r'mète so pîds!
31. Avou dès tchants,
dj'aclamèye li nom dè Signeûr,
djèl f'rè k'nohe
par totes mès louwanjes.
32. Nosse Diu inme mi çoula qu'on torê,
il inme mî lès tchants èt lès louwanjes
qui lès bièsses avou dès cwènes èt dès sabots!
33. Lès pôves èt lès p'tits loukèt d'tos leûs oûys,
is s'ènnè rafiyèt tot!
Vos qui cwèrez nosse Diu,
qui vosse coûr vike a jamåy!
34. Ca nosse Diu aconte lès pôves,
i n'louke nin d'hôt lès èlahîs.
35. Lès cîrs èt l'tére fêt sèpi sès mèrvèyes,
lès mèrs avou lès bièsses qu'î vikèt èl fêt-st-ossi!
36. Ca nosse Diu såv'rè Sion,
i r'batirè totes lès vêyes d'a Djudas,
on î d'mon'rè,
is poront lès aveûr totes!
37. Li lignèdje di sès chèrviteûs enn'èrirèy'rè,
lès fruzihants po s'nom î d'mon'ront!
53-54-55-56-57-58-59-60-61-62-63-64-65-66-67-68-69-70-71-72-73-74-75-76-77-78-79-80-81-82-83-84-85
1à22 - 23à52 - 85à110 - 110à131 - 132à150
Psaume 70 (Vulgate 69) Priyîre d'onk qu'èst må pris!
1. A mêsse dè tchant - d'a Dåvid- po 'nnè fé l'sov'nance.
2. Si vos l'volîz Signeûr
vos m'disgadj'rîz d'mès loyens!
Dispètchîz-v' Signeûr,
dè m'ni a m'sécours!
3. Is sèront tot d'frankis,
minme qu'ènnè rodjiront d'honte,
zèls qu'èstît a l'awête di mi-åme,
vos alez lès sètchî èn-èrî,
èt ènnè sèront tot èstoumakés,
zels qui volît m'måleûr!
4. Is vont 'nnè raler l'cowe è cou
tot lèyant pinde leû narène,
zèls qu'èstît si fwért
po brêre après mi: "hê la hê!"
5. Mins lès-ôtes,
lès ci qui v'ricwèrèt,
is vont s'rafiyî tot,
is f'ront fièsse avou vos;
ca lès arèdjîs po vosse dilîvrance,
sins r'lå fêt sèpi po tot avå
"Nosse Diu èst l'pus grand".
6. Et mi, dji so minåbe, mizèråbe,
Nosse Diu, por mi, dispètchîz-v';
vos èstez m'sécoûrs, mi d'lîvrance,
Nosse Diu, ni tårdjez pus!
53-54-55-56-57-58-59-60-61-62-63-64-65-66-67-68-69-70-71-72-73-74-75-76-77-78-79-80-81-82-83-84-85
1à22 - 23à52 - 85à110 - 110à131 - 132à150
Psaume 71 (Vulgate 70) Deux versions. Priyîre d'ine vêye djint.
1. Signeûr,
si dji m'fêt tot p'tit d'vins vos brès,
po tofér, mi vêye ènnè wård'rèt tot s'feû!
2. Es vosse djustice,
vos m'rindez lîbe, vos m'distchèrdjîz,
tindez don voste-orèye di m'costé,
abèye, såvez-m'!
3. Por mi, sèyîz l'rotche qui m'ahouwe,
qui dji pou r'djonde a tos moumints;
djan, dinez l'ôrde di m'såver,
ca c'èst vos qu'èst m'rotche, mi ç'tadèle.
4. Nosse Diu,
sètchîz-m' foû dès mins dè rèprové,
mins disgadjîz-m' ossi
di l'apougneûre dè rude èt dè mavå.
5. C'è-st-ès Vos Signeûr,
qui dj'a mètou mi-èspwér,
Nosse Diu c'èst Vos m'rèfûdje
èt dispôy mès prumîs pas.
6. Dês l'vinte di m'mame
ès Vos dj'a trové a m'aspoyî,
dês qu'dj'a stu so s'hô,
c'èst co Vos qui m'a d'né l'ènondêye,
ossi c'èst sins r'lå
qui m'louwanje è-st-avou Vos!
7. A cåse di mi, bêcôp s'dimandèt qwè;
c'èst Vos mi rèfûdje di pwissance.
8. Dj'a l'boke tote plinte di vos louwanjes,
tote djoû, i fåt qu'èle dèye vosse glwère.
9. Dji so dim'nou vî,
ni mi r'tapez nin!
Dji n'a pus nole fwèce,
ni m'abann'nez nin!
10. Ca mès innemis man'cèt,
zèls qui sont-st-a l'awête di mi-åme,
si mètèt d'acwérd èssonne,
11. po dire: "S'bon Diu l'a-st-abann'né,
porsûvez-l', apougnîz-l' bin,
nouk ni vinrè l'ricwèrî!".
12. Signeûr,
n'ènn'alez nin lon èrî d'mi!
Nosse Diu,
abèye, å sécoûrs, dispètchîs-v'!
13. Insi, lès racuzètes di mi-åme sèront r'fêts,
ènnè pièd'ront l'vêye;
lès-cis qu'awêtît m'måleûr sèront rabahîs,
is sèront coviérts di honte!
14. Sins r'lå, mi, dj'èspère,
d'ènnè radjoute a totes vous louwanjes!
15. Mi boke fêt sèpi vosse djustice,
tote djoû èle proclamèye qui vos rindez lîbe:
sins portant poleûr ènnè fé l'compte!
16. Dji mousse èl pwissance dè Signeûr nosse Diu,
dji rapinse a s'djustice,
dji r'tûze a Lu tot seû!
17. Nosse Diu,
vos m'avez ac'sègnî dispôy mi djonne tins,
èt disqu'asteûr,
dj'a proclamé totes vos mèrvèyes.
18. Qwand vinrè l'al-nut' di m'vêye,
dè tins qui dj'sèrè bin vî,
Nosse Diu,
ni m'abann'nez nin,
divant qu'dji n'åye anoncî vosse brès'
al djonne djèrmèye qui lîve!
Lèyîz-m' fé sèpi vosse pwissance
a tos lès-cis qu'Vos avez fêt,
19. sins tot ot'tant rouvî vosse djustice,
ni vosse grandeûr po fé dès mèrvèyes.
Signeûr nosse Diu,
quî èst come Vos?
20. Vos qu'm'avez fêt-st-èdurer totes sôrs di mizéres,
on pout dire qu'ènn'aveût bråmint dès bin pènibes,
Vos rim'nez,
Vos m'fez raspiter foû dès abîmes dèl tére!
21. Fez crèhe mi grandeûr,
rim'nez co m'rapåfter!
22. Mi ossi dj'vou louwer vosse vrêye
so lès instrumints a cwèdes,
dji vou v'tchanter avou m'guitåre,
Vos Nosse Diu li Sint d'Israël!
23. Mès lèpes brêyèt ca dji v'tchante,
èt vos ratch'tez mi-åme.
24. Minme mi linwe
mûzèye tofér vosse djustice,
ca lès awêteûs di m'måleûr ènnè rodjiront,
qwand vos årez pris leû oneûr!
53-54-55-56-57-58-59-60-61-62-63-64-65-66-67-68-69-70-71-72-73-74-75-76-77-78-79-80-81-82-83-84-85
1à22 - 23à52 - 85à110 - 110à131 - 132à150
Psaume 71 (Vulgate 70)
1. C'è-st-è vos nosse Diu
qui dj'so-st-a houte:
qu'å grand jamåy
dji n'deûsse ènn'avu honte.
2. E vosse bon dreût,
supwèrtez-m',
dèlivrez-m'.
Tindez voste-orèye après mi
èt såvez-m'.
3. Sèyîz' li rotche dè bon-akeûy
tofér accèssibe por mi;
Vos v's avez rézolou a m'såver:
vos èstez m'rotche, mi ç'tadèle.
4. Sègneûr nosse Diu,
disgadjîz-m' dès mins dè måva,
dès loyens dè fås tchin
come dès cis dè moudreû.
5. Sègneûr nosse Diu,
vos èstez m'seûl èspwér.
Dji m'a-st-aspoyî sor vos
dispôy mi djonne tins.
6. Vos m'sout'nîz dèdja
bin avant m'nêssance,
vos m'avez tchûzî
dès l'vinte di m'mame.
Vos sèrez todi m'louwandje.
7. Tot plin s'èwarît so m'compte;
vos avez stu m'sécoûrs èt m'fwèce.
8. Vosse nom a todi stu so mès lèpes,
tote-djoû dji r'di vosse grandeûr.
9. Ni m'lèyîz nin å réz
asteûre qui dji d'vins vî;
ni m'abann'nez nin
adon qui m'fwèce flåwih.
10. Mès innemis complotèt sor mi,
is m'awêtèt,
is t'nèt essonne
èt is s'dihèt:
11. "Gn'a s'Diu qui l'abann'nêye,
trak'nez-l',
apougnîz-l',
n'a pus nouk po l'disfinde."
12. Nosse Diu,
dimonez don chal, ad'lé mi;
abèye nosse Diu,
dinez-m' on côp d'min.
13. Sacwant' s'astampèt disconte mi:
qu'on 'lzî rabate leû caquèt,
qu'on 'lz'èstèrminêye.
Qwant ås cis qu'ont bon di m'måleûr:
qu'on 'lzî hufèle leûs vrêyes,
qu'is sèyèsse racoviérts di honte.
14. Qwant a mi,
dji n'piède nol èspwér,
dji pèrzistêye a tchanter vos louwandjes.
15. Tot-oute dè djoû
dj'årè vos trêts d'dreûteûr so mès lèpes.
I fåt qu'dji dèye sins r'lache
kimin vos nos d'livrez;
portant dji n'såreûs fé l'compte
di totes vos bèlès keûres.
16. Awè nosse Diu,
dji r'vik'rè vos bês djèsses
tot fant r'sov'ni åtou d'mi
qu'i-n-a qu'vos qu'èst dreûteûr.
17. Dispôye mi djonne tins
vous m'avez ac'sègnî,
èt disqu'asteûre
dj'a prôclamé vos mèrvèyes.
18. Ni m'abann'nez nin
qwand dj'sèrè dim'nou vî
èt qu'dj'årè dès blancs dj'vès;
dji frè k'nohe li fwèce di vosse brès'
ås omes di ç'tins la,
èt a tos lès cis qu'vinront-st-après
dji frè sèpi tos vos bês djèsses.
19. Nosse Diu,
kibin d'mèrvèyes n'av'nin fêt?
Vosse dreûteûr èst foû-mèzeûre:
quî v'raviz'reût bin?
20. Avou vos nosse Diu
dj'ènn'a vèyou dès lêdes,
dj'a magnî dès deûrs bokèts.
Mins a novê,
vos m'alez fé r'viker,
a novê vos m'alez rassètchî
dè fin fond dèl tére.
21. Vos m'frez crèh è l'oneûr,
vos m'vinrez rapåfter.
22. Adon nosse Diu,
so lès instrumints a cwèdes
dji vous tchanter l'bin qu'vos fez,
vis dîre mèrci a m'manîre.
Di tot m'coûr
dji vou djouwer por vos:
vos èstez l'Sint d'Israël.
23. Mins tot djowant por vos
mès lèpes tchant'ront leû djôye:
c'èst vos qui m'a ratch'té.
Tot-oute dè djoû,
dji r'dirè vosse dreûteûr.
Lès cis qui m'cwèrît mizére
ont stu tot èstoumakés,
ènn'ont pièrdou leû oneûr.
53-54-55-56-57-58-59-60-61-62-63-64-65-66-67-68-69-70-71-72-73-74-75-76-77-78-79-80-81-82-83-84-85
1à22 - 23à52 - 85à110 - 110à131 - 132à150
Psaume 72 (Vulgate 71) Nosse Diu èst li rwè dèl påye.
1. Po Salomon:
Signeûr,
lîvrez-st-å rwè vosse djudj'mint,
lîvrez-st-å fi dè rwè vosse djustice!
2. Qu'i djudje vosse peûpe èl dreûteûr,
qu'i djudje vos pôves sorlon l'bon dreût!
3. Quî lès hôteûrs apwèrtèsse li paye a peûpe,
qu'èlzî apwèrtèsse li djustice.
4. Adon i f'rè dreût åx pôves dè peûpe,
èt i såv'rè l'fi dè p'tit,
mins i brôy'rè ci qu'èlz'atake!
5. Is v'pwèt'ront amoûr èt rèspèt,
avou l'solo,
po d'vant l'leune,
èt d'on sièke a 'ôte.
6. Qu'i d'hinse:
come on lavasse toumant so l'wazon
come 'ne tchôde plêve ramouyant lès tchamps.
7. Quî dè tins d'sès djoûs
li djusse seûye florihant,
quî l'grande påye dimeûre
disqu'al fin dès leunes!
8. C'èst lu qu'sèrè mêsse dèl mér a l'ocèyan,
dè fleûve disqu'å coron dèl tére.
9. Po d'vant lu
lès fwérts dè dèzêrt si mèt'ront-st-a gngnos,
po d'vant lu
sès innemis ralètch'ront lès poûssîres.
10. Lès rwès d'Tarsis èt dès îles
lî apwèt'ront l'ofrande,
lès rwès d'Saba èt d'Schéba
lî ofriront lès vins.
11. Divant lu,
tos lès rwès s'kouk'ront-st-al tére,
por lu,
tos lès peûpes vinront chèrvi!
12. Ca i disgadje li pôve qui djèmih,
i d'hale li p'tit qui n'trûve nole êde.
13. I louke ås pôves, å minåbes,
i såve l'åme dès plin d'mizéres!
14. I ratch'tèye leû-z-åme
dèl rudeûr èt d'l'èsclavadje;
a sès oûys, leû song' n'a nou pris!
15. Qu'i vike!
On lî donrè l'ôr di Schéba,
sins r'lå on prèy'rè por lu,
tote djoû on l'bènirè!
16. Li tére donrè dè grin a make,
èt so lès d'zeûrs
lès pôtes di grin fruziront come li Liban;
D'vins lès vêyes, is sèront-st-è fleûr,
tot ot'tant qu'lès jèbes crèhèt so l'tére.
17. Po tofér si nom sèrè po d'vat l'solo,
si nom d'meûr'rè a jamåy.
Es lu tos lès peûpes sèront bènis,
èt is f'ront fièsse po s'bonheûr.
18 Li Signeûr nosse Diu èst bèni a jamåy,
si glwère rimplih tote li tére.
åmen, åmen.
20 Insi finihèt lès priyîres
di Dåvid li fi d'a Jessé.
53-54-55-56-57-58-59-60-61-62-63-64-65-66-67-68-69-70-71-72-73-74-75-76-77-78-79-80-81-82-83-84-85
1à22 - 23à52 - 85à110 - 110à131 - 132à150
Psaume 73 (Vulgate 72) Deux versions. Avou Jahvé, on veût pus clér. El dèstinêye dès omes.
1 Tchant d'a Asaph.
Awè, crèyez-m':
Jahvé èst bon po Israël,
èt po lès cis qu'rotèt l'dreûte vôye!
2. Co on pô dji m'trèbouhîve,
on rin èt dj'ridéve so m'cou.
3. Ca dj'èsteûs djalot so lès bwègnes,
dji loukîve ès cwènne so l'påye dès resprovés.
4. Por zèls,
i n'a pont d'toûrmints,
leû cwér plin d'cråhe
disbwèrdêye di vigreûsté.
5. Is sont foû pårt
dèl ponne dès môrtéls,
on n'bouhe nin sor-zèls
come so lès-ôtès-omes!
6. Is fêt tél'mint l'inflé
qu'is ont 'ne hanète di torê,
come d'on moussemint
is sont tot rafûlés d'måle fwèce.
7. Li cråhe èlzî infèle lès oûys,
leûs åmes disbwèrdèt d'sondj'rèyes.
8. Is s'mokèt èt djåzèt come dès canayes,
håtin is volèt acåbler.
9. Avou leû boke,
is s'hôssèt disqu'å cîr,
leû linwe balzinêye
tot avå l'tére.
10. Vola poqwè m'peûpe coûrt après zèls,
va beûre a make ès leû k'pagnèye.
11. Is dihèt inte di zèls:
"Jahvé nèl sårèt måy!
Jahvé n'a nole kinohance!"
12. Vèyez-v' lès vola don lès canayes!
Todi påhûle is mètèt d'costé!
13. Insi c'è-st-al vûde
qui dj'a purifiyî m'coûr,
qui dj'a nèti mès mins ès l'ènocince!
14. Ca po dès tchîtchêyes
dji so batou tot-oute dè djoû,
dji so todi pûni
dé tot timpe å matin.
15. Si dj'aveûs dit:
"Dji vou djåzer come zèls",
adon dj'åreûs r'noyî
li lignèdje di vos èfants.
16. C'èst poqwè dji m'a mètou a tûzer
po sayî d'î vèyî pus clér,
ca por mi, a mès oûys,
çoula dim'néve on toûrmint,
17. disqu'a ce qui dj'inteûre
ès l'sint'té d'a Jahvé
po poleur vèye tot dreût
leû dèstinèye finåle.
18. Awè, vos lès mètez so 'ne vôye tote ridante
adon pwis, vos lès tchoûkîz vè l'vûde.
19. Al vole, is ont disparètou d'vins 'ne fin tèribe.
Åtou d'zèls, ènn'ont-stu tot k'hoyou!
20. Come on sondje,
qu'on fêt tot s'dispièrtant,
foû dèl vèye, Jahvé,
v's èlzî rabatez leû imådje.
21. Qwand m'coûr surihéve
èt qu'mès rins m'kipicît,
22. adon, mi, d'mèye bouhale,
dji n'saveûs nin,
come 'ne bièsse
dj'èsteûs planté d'vant vos.
23. Mins dji sos tofér ad'lé vos,
vos m'prindez l'dreûte mins,
24. vos alez m'kidûre d'vos consèys
po m'prinde après ès vosse glwère.
25. Es cîr, quî èst por mi, sinon Vos!
Sol tére, dji n'a nou d'zîrs, såf Vos!
26. Mi tchår èt m'coûr si distrûhèt,
mins Jahvé d'meûre mi pårt a jamåy.
27. Is pèrihèt vormint, lès cis qu'ènnè vont èrî d'vos,
vos fez disparète ci qui v's abann'nèye,
qui r'nôye voste aliyance.
28. Mins por mi, èsse ad'lé Jahvé èst tot m'boneûr,
ès Jahvé l'Signeûr, ès lu, dji vou èsse a houte,
po fé sèpi totes sès oûves.
53-54-55-56-57-58-59-60-61-62-63-64-65-66-67-68-69-70-71-72-73-74-75-76-77-78-79-80-81-82-83-84-85
1à22 - 23à52 - 85à110 - 110à131 - 132à150
Psaume 73 (Vulgate 72) Avou l'bon Diu on-z-î veût pus clér èl dèstinêye dès omes.
1 Tchant d'a Asaph.
Awè, vos m'polez creure:
li Signeur èst bon po Israël,
li Signeur èst bon po lès francs coûrs!
2. Eco on pô dji m'trèbouhîve,
on rin èt dj'ridéve so m'cou.
3. Mins i fåt dire:
qui dj'djalozéve lès d'méy bouhîs,
qui dj'acontéve li påye dès rèprovés.
4. Zèls, n'ont nou må po morî,
leû vigreûsté èst florihante.
5. Is n'ont nole pårt åx ponnes dès môrtéls,
is n'sont nin bouhîs avou l'ome.
6. Li grandeûr èlzî infèle li hanète,
li rudeûr èlz'èwalpèye come on moussemint.
7. Li cråhe èlzî brotche dès oûys,
leû-z-åmes disbwèrdèye di sondj'rèyes.
8. Tot s'mokant is djåzèt d'må fé,
is djåzèt come dès grandiveûs.
9. Leû boke s'atake ås cîrs,
leû linwe balzinêye tot avå l'tére.
10. Et vola poqwè m'peûpe coûrt après zèls,
qui va s'fé sô è leû k'pagnèye!
11. Ca is s'dihèt:
"Kimint l'bon Diu poreût-i sèpi?
A-t-i seûlemint dèl siyince è fwért hôt?"
12. Vo-lès-chal,
cès rèprovés,
cès påhûles po tofér,
is strindèt l'pwissance!
13. Adon c'è-st-al vûde
qui dj'm'a purifiyî m'coûr,
qui dj'a r'nèti mès mins ès l'inocince!
14. Tote djoû on m'bate po dès tchîtchêyes,
dês l'å matin dji m'fê r'mète è plèce!
15. Si dj'aveûs dit:
"Dji m'va djåzer come zèls",
adon dj'åreûs r'noyî
li lignèdje di vos fis.
16. Dj'a tûzé po-z-î vèyî pus clér,
por mi ça dim'néve on toûrmint!
17. Adon dj'a-st-arivé èl l'sint'té d'a nosse Diu,
èt dj'a polou vèyî leû finåle dèstinèye.
18. Awè, vos 'lzès mètez so dès ridantès vôyes
d'on côp, vos 'lzès tchoûkîz d'vins lès rwènes.
19. Kimint ont-is stu si rade ravadjî,
touwè, rabatou d'vins lès transes!
20. Come on sondje fêt tot s'dispièrtant,
insi Signeûr,
vos rabatez leû-z-imådje foû dèl vèye.
21. Adon qwand m'coûr si k'magnîve,
èt qu'mès rins m'kipicît,
22. adon mi, d'mèye bouhale, dji n'saveûs nin,
dj'èsteûs come ine bièsse po d'vant vos!
23. Mins dji so todi avou vos,
èt vos m'prindez l'dreûte min,
24. vos m'minez pa vos consèys,
èt tot l'minme vos m'sitrindez èl glwère.
25. Quî d'vins lès cîrs èsteût por mi?
Såf Vos, dji n'a rin volou so l'tére.
26. Mi tchår èt m'coûr ènnè vont tot!
Li rotche di m'coûr, èt m'pårt:
c'èst nosse Diu po tofér!
27. Tot qui s'mète èrî d'Vos èst sûr dè pèri,
vos fez disparète tot qui v's abann'nèye!
28. Mins por mi,
èsse ad'lé l'bon Diu èst tot m'boneûr,
c'è-st-ès Lu qu' dji vou èsse a houte,
po fé sèpi totes sès mèrvèyes!
53-54-55-56-57-58-59-60-61-62-63-64-65-66-67-68-69-70-71-72-73-74-75-76-77-78-79-80-81-82-83-84-85
1à22 - 23à52 - 85à110 - 110à131 - 132à150
Psaume 74 (Vulgate 73) Lamèn'tåcions d'vant lès rwènes dè timpe.
1. Po-z-éduker, d'a Assaph.
Mins poqwè don nosse Diu?
Vos rabrouf'tez tofér,
èt vosse colère s'èmonte
so l'tropê d'vosse pahis'.
2. Sov'nez-v' di voste-assimblêye,
qui v's avez-st-avu d'vins l'tins,
li cisse qui v's avez ratch'té,
li peûpe di voste-èritèdje.
Sov'nez-v' dèl hôteûr di Sion,
la wice qui vos d'monîz.
3. Tot v'porminant,
vinez don î taper on côp d'oûy,
ci n'èst pus qu'dès rwènes,
l'innemi a tot ravadjî disqu'å coûr dè timpe.
4. Zèls, qui sont disconte di Vos,
ont stu rudjî wice qu'on vos fièstéve,
is ont minme drèssî leûs imådjes
al plèce dès nosses!
5. On 'lzès riknoh so l'côp,
al hèpe is distrûhèt ronhis èt bouhons.
6. C'è-st-å mårtê èt al mahote
qu'is spiyèt bwèz'rèyes èt sculteûres.
7. Is ont bouté l'feû tot avå vosse timpe,
is prôfanèt so l'tére li mohone di vosse nom.
8. Is d'hèt-st-ès leû coûr:
" Nos 'lzès språtch'rons turtos";
on pô tot-avå is broûlèt lès plèces
wice qui Diu nos houke!
9. Nos n'vèyans pus vos sègnes,
i-n-a pus nou profète,
èt nouk amon nos-ôtes
ni pout dire disqu'a qwand!
10. Disqu'a qwand Signeûr
l'innemi va-t-i måltrêtî?
Vont-is continouwer tofér
a 'lzès dire totes so vosse compte?
11. Poqwè avez-v' risètchî vosse min,
vosse dreûte?
Sètchîz-l' di d'zos vosse frake,
distrûhez!
13. Portant Signeûr
dês li k'mincemint v's èstez nosse Rwè,
vos avez fordjî nosse såv'tèdje
å mitan d'vosse pays!
13. Es vosse pwissance
vos avez findou l'mér è deûs,
vos avez broyî l'tièsse des monses
qui vikît so lès êwes.
14. C'èst co vos qu'a fêt tos bokèts
avou lès tièsses dè Léviathan,
adon vos l'avez d'né a magnî
ås peûpes dè dèzèrt.
15. Vos avez findou l'rotche èt l'tére
po lèyî spritchî l'surdon èt lès fwètès êwes.
Vos avez minme mètou à sètch'
dès fleûves qui n'l'avît måy situ.
16. Li djoû èst d'a vosse, awè,
mins minme li nut' qu'è-st-ossi d'a vosse!
Vos avez bin èmantchî
li leune èt l'solo.
17. C'èst vos qu'a tchuzî
totes lès frontîres dèl tére.
L'osté èt l'iviér sont d'voste-invancion.
18. Rapinsez don a tot çoula, Signeûr,
l'innemi nos fêt tos afronts.
Li peûpe toûne a reû-sot,
il insultêye vosse nom!
19. Ni lîvrez nin al bièsse
l'åme di vosse turturèle,
ni roûvîz nin po tofér
li vicårèye di vos pôves.
20. Tinez compte di l'aliyance,
ca lès neûristés dèl tére
si peûplèt di r'pêre di rudeûr.
21. Qui l'acåblé n'seûye nin r'tapé èl honte,
qui l'pôve èt l'pitit glôrifiyèsse vosse nom!
22. Aspitez Signeûr,
batez-v' ès vosse bataye,
sov'nez-v' di vosse honte,
li reû-sot v's insultêye tote djoû.
23. Ni rouvîz nin qu'vos innemis minèt-st-ine bèle arèdje,
èt qu'come li mouv'mint dèl mér,
sins r'lå is s'èlèvèt todi pus!
53-54-55-56-57-58-59-60-61-62-63-64-65-66-67-68-69-70-71-72-73-74-75-76-77-78-79-80-81-82-83-84-85
1à22 - 23à52 - 85à110 - 110à131 - 132à150
Psaume 75 (Vulgate 74) Li djèrinne èst tofér po l'bon Diu.
1. A mêsse dè tchent. "Ni distrût nin" tchant d'a Assaph. Ime.
2. Nos v'rindans gråce, Signeûr,
awè, nos rindans gråce.
Vosse nom èst la djondant:
on fêt sèpi vos hôts fêts.
3. Qwand dj'årè tchuzî l'eûre,
dji djudj'rè-st-èl dreûteûre!
4. Li tére tronne
avou tos lès-cis qu'sont d'ssus:
mi dj'rafwèrcih sès colones!
5. Dj'a prém'nou lès grandiveûs:
"Ni fez don nin tant d'vos êrs!"
èt ås rèprovés dj'èlzî a dit:
"Ni håssîz nin vosse cwène!"
6. Ni håssiz nin vosse cwène conte Diu,
Ni r'drèssîz vosse tièsse po lî djåzer!
7. Nèni,
ci n'èst nin dè costé dè lèvant,
non pus dè costé dè coûtchant,
ni vè l'dèsêrt, ni so lès hôteûrs, qui l'salut vérè.
8. Li bon Diu èst l'seûl djudje,
i rabah ci-chal,
i r'lîve ci-la!
9 Ca l'cålice è-st-èl min d'å Signeûr,
on vin plin di spécerèyes boût-st-å d'vins.
I vûde li mahèdje:
awè, ènnè houmèt l'fondris'!
Tos lès rèprovés dèl tére sont dès buveûs d'fondris'!
10. Et mi djèl fêt sèpi a l'étèrnité,
dji tchante li Diu d'a Djåcob.
11. Dji spèye nèt' totes lès cwènes dès rèprovés;
lès cwènes dè djusse s'èbalèt!
Psaume 76 (Vulgate 75)
Véci, i manque on bon bokèt. On l'ritrov'rè on djoû!
10. qwand l'bon Diu s'a stampé po djudjî,
po såver tos lès pôves dèl tére.
R'pwèzêye.
11. Ca l'fureûr di l'ome vout v'rinde glwère,
vos v'cinguèl'rez di çou qu'ènnè d'meûr'rè!
12. Fez dès veûs,
rimplihez 'lzès po l'Signeûr vosse Diu,
quî tos lès-cis qu'sont-st-åtou d'lu
lî èlèvèsse l'ofrande ca i nos èwarêye!
13. I fêt l'vindindje dè sofla dès princes,
il èst tèribe po lès rwès dèl tére.
53-54-55-56-57-58-59-60-61-62-63-64-65-66-67-68-69-70-71-72-73-74-75-76-77-78-79-80-81-82-83-84-85
1à22 - 23à52 - 85à110 - 110à131 - 132à150
Psaume 76 (Vulgate 75) On fel mèrci po l'dilîvrance di l'Eglîje.
1. A mêsse dè tchant. Su lès instrumints a cwèdes. Tchant d'a Assaph. Ime.
2. Li bon Dièu èst k’nohou èl Djudèye
D’vins Israël si No èst grand.
3. La wice qu’i d’mone, c’èst l’ pǻye
Èt s’ plèce èst d’vins Sion.
4. La, il a spiyi l’ fwèce di l’arc,
Li boucliyer, l’èpêye èt l’ guére.
5. I rispåde on mèrviyeûs sclat
Dispôye lès montagnes qui n’ont nol adje.
6. Il ont stu tot k’mahis
Tos lès cis qu’avît l’ coûr pô sûti.
Il ont dwèrmou tot leû sô
Èt s’n’ ont-i pus rin trové d’vins leûs mins
Tos lès-omes qui djêrît après l’ ritchèsse.
7. Å man’cèdje dè Dièu da Djåcob,
I s’ont èdwèrmou lès cis qu’alît a dj’vå.
8. On v’ crint, èt quî sèrè pus fwért qui vos ?
Dispôye li prumî djoû vosse colére èst pèzante.
9. Dè cîr on oya vosse djudjemint
Li tére a tronlé èt s’a apåh’t.
10. qwand l'bon Diu s'a stampé po djudjî,
po såver tos lès pôves dèl tére.
R'pwèzêye.
11. Ca l'fureûr di l'ome vout v'rinde glwère,
vos v'cinguèl'rez di çou qu'ènnè d'meûr'rè!
12. Fez dès veûs,
rimplihez 'lzès po l'Signeûr vosse Diu,
quî tos lès-cis qu'sont-st-åtou d'lu
lî èlèvèsse l'ofrande ca i nos èwarêye!
13. I fêt l'vindindje dè sofla dès princes,
il èst tèribe po lès rwès dèl tére.
53-54-55-56-57-58-59-60-61-62-63-64-65-66-67-68-69-70-71-72-73-74-75-76-77-78-79-80-81-82-83-84-85
1à22 - 23à52 - 85à110 - 110à131 - 132à150
Psaume 77 (Vulgate 76) Deux versions. Tûzèdje so tos lès hôts fêts qui l'bon Diu féve divins l'tins.
1. A mêsse dè tchant - A Iduthun - D'a Assaph - Tchant.
2. Mi vwès s'èlîve ad'lé l'bon Diu,
dji brê!
Mi vwès s'èlîve ad'lé l'bon Diu,
i m'a-st-oyou!
3. Li djoû qu'dji so strindou,
dji cwîre après nosse Diu,
dèl nut' dji tind m'min sins r'låke,
mi-åme n'èst nin a rapåfter.
4. Dji m'sovin dè bon Diu,
dji djèmih, dji tûze,
dji veû tot è neûr!
R'pwèzêye.
5. Vos avez pris lès påpîres di mès oûys;
abatou, dji m'rèssére ès silince.
6. Dji rapinse ås doûs di d'vins l'tins,
dji tûze bin lon so lès annêyes a m'ni!
7. Dèl nut',
dji såye dè vèyî m'mwért,
dji mûzèye ès m'coûr,
èt mi-èsprit tûzèye.
8. Nosse Diu,
nos a-t-i abann'né po tofér?
Est-ce a jamåy
qu'i n'si lêt pus apicî pa l'amoûr?
9. A-t-i dédja d'né totes sès gråces
disqu'a l'djérinne?
A-t-i clô s'parole po lès sièkes a m'ni?
10. Nosse Diu åreût-i roûvî d'pardonner?
Si colére mûz'lèye-t-èle sès mizèricôrs?
R'pwèzêye
11. Et dj'a dit:
"Vochal kimint dj'a stu ac'su".
Li dreûte dè Fwért Hôt èst tél'mint candjèye,
qu'èle n'èst pus a rik'nohe!
12. Dji såye dè r'viker lès hôts fêts d'å Signeûr,
dji såye dè r'vèyî vosse miråke di d'vins l'tins!
13. Di voû ratûzer so totes vos oûves,
dji voû tchanter tos vos hôts fêts,
14. ca nosse Diu,
vosse vôye è-st-èl sint'té.
Qué diu è-st-ossi grand qu'vos?
15. vos èstez-st-on Diu qu'fêt l'miråke,
vos fez sèpi vosse pwissance tot avå lès peûpes.
16. Par vosse brès,
vos avez ratch'té vosse peûpe,
mins vos avez ratch'té ossi
lès fis d'a Djåcob èt d'a Djôzèf.
R'pwèzéye.
17. Lès flots v's ont vèyou, Signeûr,
lès flots v's ont vèyou,
èt ils ènn'ont tronné!
Minme lès abîmes ènn'ont fruzih!
18. Lès nûlêyes fondit èvôye:
li plêve touma!
Li vwès dès cîrs rèsdondih,
vos flèches volît!
19. Li vwès dè tonîre groûléve,
lès côps d'amoumîre illuminît l'monde,
li tére ènnè tronna,
èle fourît tote kihoyowe!
20. Vosse vôye s'a droviou-st-èl mér,
vosse pazê tchèrîve so lès grantès-êwes;
mins nouk n'åreût polou rik'nohe vos traces!
21. Come on tropê vos minîz vosse peûpe,
avou lès mins d'a Moïse èt d'a Aaron.
53-54-55-56-57-58-59-60-61-62-63-64-65-66-67-68-69-70-71-72-73-74-75-76-77-78-79-80-81-82-83-84-85
1à22 - 23à52 - 85à110 - 110à131 - 132à150
Psaume 77 (Vulgate 76) Tûzèdje so l'passé d'Israël.
1. A mêsse dè tchant, a Iduthun, d' Assaph, Tchant.
2. Mi vwès s'èlîve ad'lé Jahvé,
awè, dji brê!
Mi vwès s'èlîve ad'lé Jahvé,
po qui m'ètinse!
3. Dè djoû, dji so d'vins lès transes
èt dj' qwîre li Signeûr,
dèl nut', mès mins s'tindèt sins r'låke,
mi-åme si rèfûzant totes consolåcions!
4. Qwand dji m'sovin d'Jahvé,
dji djèmih,
qwand dji m'tûze tot mwért,
mi èsprit s'trûbèle!
5. Dji n'sé sèrer mès oûys
ca v'm'avez pris lès påpîres;
Dja lès idèyes totes kimahèyes,
dji n'arive pus a m'parole!
6. Dji sondje a d'vins l'tins,
a tot çou qu'on-z-a passé,
dji m'sovin dès annêyes ècoulèyes.
7. Dèl nut', dji mûzèye,
ès m'coûr dji tûze,
mi èsprit qwîre!
8. Li Signeûr nos r'djète-t-i po todi?
Nos sèrè-t-i co favoråbe?
9. Si amoûr, è-st-i èpwîzé a jamåy?
A-t-i clô l'promèsse
qu'il aveût fêt po lès adjes a m'ni?
10. Jahvé, roûvèy'reût-i d'nos pardonner?
Ou mûz'lèye-t-i s' mizèricôr
ès feû di s'colére?
11. Adon, ès mi-minme, dji m'a dit:
"Mi toûrmint vo-l'-la:
C'èst qu'li dreûte da Jahvé
sonne tél'mint candjèye!
12. Dji m'risovin dès hôts fêts d'a Jahvé,
dji r'sondje a vos miråkes di d'vins l'tins!
13. Di voû tûzer a tote voste ovrèdje,
dji voû l'tchanter po tot l'monde,
14. Jahvé, sinte èst vosse vôye!
Wice è-st-i l'diu
qu' è-st-ossi grand qu'vos?
15. Vos èstez l' Diu qu'fêt dès mèrvèyes,
vos avez fez k'noh vosse pwissance
a tos lès peûpes,
16. al fwèce di v' brès,
vos avez ratch'té vosse peûpe,
lès fis d'a Djåcob,
èt lès cis d'a Djôzèf.
17. Lès êwes vis ont vèyou, Jahvé,
èt di v'vèyi, èles tronnît totes!
Awè, disqu'åx abîmes
qu'ont hapé sogne!
18. Lès nûlêyes d'vièrsît lès êwes,
li vwès dès cîrs rèsdondihéve,
vos flèches volît åtou d'la!
19. Li vwès d'vosse tonîre
crakève dès fameûs côps,
lès côps d'amoumîre
èsprindît tote li tére,
li tére tronnéve,
s'ènn'aléve tote!
20. Vosse vôye si droviéve èl mér,
vosse pazê èsteût so lès grantès-êwes
èt portant nouk ni vèyéve
wice qui v's avîz roté!
21. Vos avez miné vosse peûpe,
come on tropê d'bèrbis.
Moïse èt Aaron ènn'èstît lès bèrdjîs.
53-54-55-56-57-58-59-60-61-62-63-64-65-66-67-68-69-70-71-72-73-74-75-76-77-78-79-80-81-82-83-84-85
1à22 - 23à52 - 85à110 - 110à131 - 132à150
Psaume 78 (Vulgate 77) L'istwére di l'aliyance avou l'bon Diu è-st-ine lèçon èt 'ne avèrtih'mint.
1 Po-z-aprinde, d'a Assaph:
Twè m'peûpe hoûte mi vwès,
prustêye mi l'orèye qwand dji t'djåze!
2. Dji droûve mi boke po t'conter dès fåves,
po fé d'filer d'vant twè
tos lès ad'vinas di d'vins l'tins.
3. Nos lz'avans d'dja bråmint-st-oyou,
nos 'zès k'nohans turtotes,
nos péres èlzès racontît co voltî.
4. D'vins lès dièrins tins:
nos n'lès catch'rans nin a leûs èfants,
nos f'rans sèpi lès louwanjes d'å Signeûr,
nos f'rans k'nohe si pwissance
pus totes lès mèrvèyes qui nos a fêtes.
5. I batihat-st-on tèmwègnèdje è Djåcob,
i mètat è plèce 'ne lwè po Israël,
adon i k'mandat a nos vîs
dèl fé sèpi a leûs èfants.
6. Lès èfants mètous å monde d'vins lès dièrins tins
åront li k'nohance di tos çoula,
is aspit'ront po m'ni l'ridire a leûs prôpès èfants.
7. C'è-st-ès bon Diu
qu'is mèt'ront tos leûs èspwérs,
is n'roûviront nin sès hôts fêts,
is wård'ront sès k'mand'mints.
8. Qu'is n'sèyèsse nin parèy a leûs péres,
ine race di tigneûs èt d'tchik'teûs,
ine race don l'coûr n'èst nin sûr
dont l'èsprit n'sê èsse fidéle å bon Diu.
9. Les fis d'Ephraïm
avît leûs êrtchîs prèt' a sètchî,
èt is toûrnît portant casake
li djoû dèl bataye,
10 is n'wårdît nin l'aliyance d'å Signeûr,
rèfuzant dè roter so l'vôye di sès lwès!
11. Por zèls,
totes sès mèrvèyes èt sès hôts fêts
èstît toumés èl roûviance,
èt portant Elzî aveût mostré!
12. Leûs péres ont tofér avu d'zos lès oûys
tos lès miråkes qu'I fat por zèls,
so l'tére d'Egypte
èt d'vins lès tchamps d'a Tanis.
13. I findat l'lér è deûs
po 'lzî fé on passèdje,
èdjalant lès êwes
tot fî parèy qu'on meûr.
14. Dè djoû,
c'èsteût 'ne nûlêye qu'èlzès minéve,
èt po dèl nut',
c'èsteût l'loumîre d'on feû.
15. I findat lè rotches dè dèzêrt,
èlzî d'na a beûre
come foû dè grant-abîme.
16. Foû dèl rotche,
i fat aspiter dès hopês d'êwe,
lès êwes corît a pihe
tot parèy å flots d'on fleûve.
17. Mins mågré tot,
is porsûvît a pètchî disconte Lu,
ès dèzèrt,
is l'ont disfiyî, Lu l'fwért Hôt.
18. Es leû coûr is tem'tît Diu
si d'hant inte di-zèls:
"Nosse Diu såreût-i capåbe
di nos drèssî l'tåve ès dèzèrt?"
19. Is djåspinît disconte leû Diu
rèclamant ad'lé Lu leû-z-a magnî,
èt volant ènn'aveûr a make.
20. Chète i bouhat so l'rotche,
l'êwe apiha, dès hopês d'êwe disbwèrdît!
Mins porè-t-i ossi d'né dè pan?
Porè-t-i aprûster dèl tchår po s'peûpe?
21. Adon l'Signeûr èlz'a-st-oyou
èt so l'côp i s'a måv'lé:
on feû broûlat disconte Djåcob,
si colére s'èmontat so Israël.
22. Is n'avît nole fwè ès bon Diu,
is s'dismèsfiyît di s'dilivrance.
23. I d'nat 'ne ôrde ås nûlêyes dè cîrs,
i droviat lès pwètes dès cîrs.
24. Li mane qui d'véve èlzès nourî
toumat d'la-d'zeûr come dèl plêve.
Elzî d'nat l'frumint dè cîrs.
25. L'ome magnat dè pan dès andjes,
èt chaskeun' ènn'aveût-st-on fameûs briquèt.
26. Dè fond dè cîrs,
i dèlègat l'vint d'ôriyant;
avou s'fwèce,
i minat l'vint dè sûd.
27. Sor zèls:
i fat ploûre dèl tchår
ossi fène qui dèl poûssîre;
i fat toumer dès djonnes d'oûhêts
tot ot'tant qu'li såvion dèl mér.
28. Elzès fat toumer ès plin mitan dè camp,
èt tot åtou d'leûs tintes.
29. Enn'ont magnî,
ènn'ont stu r'pahou;
is djèrît so tos çoula,
Il a fêt l'gos' d'a chaskeûn'.
30 Is n'èstît nin co m'nou foû
d'leûs prôpès d'zîrs,
is avît co d'l'a magnî plin leû boke,
31 qui l'colére dè Signeûr montat conte di-zèls,
i touwat tos leûs foû-ritches,
i mètat l'få èl fène fleûr d'Israël.
32. Et mågré çoula is pètchît co todis,
is n'avît nole fwè d'vins tos sès miråkes.
33. I fat fini leûs djoûs èl glôriole,
leûs annêyes ènn'alît d'vins lès transes.
34. S'ènnè touwéve,
adon èls ricwèrît,
is rim'nît tot cwèrant Diu!
35. Is rapinsît:
qui l'Signeûr èsteût leû rotche,
qui l'Diu Fwért-Hôt èlzès ratch'téve!
36. Por Lu, leû boke èsteût tote-amitieûse,
so l'tins qu'leû linwe lî mintihéve.
37. Leû coûr ni poléve s'atèler å Signeûr,
is n'avît nole fwè ès l'aliyance fête avou Lu!
38. Adon qu'Lu tot plin d'mizèricôr,
pardone li må èt n'distrût nin,
qui co traze côp i ratint s'colére,
po n'nin lèyî s'èmonter tote si fureûr.
39. I r'tûzat qu'èstît fêt d'tchår,
qui n'èstît qu'on sofla
qu'ènnè va sins måy rim'ni.
40. Es dèzêrt:
kibin d'côp n'l'ont-is ni fêt måvler?
Els chagrinèrent avå lès disseûlances.
41. Is rim'nît ad'lé Diu po l'tem'ter,
po l'mète, Lu, å dèfi!
42. Is n'avît nole sov'nance di s'min,
roûviant disqu'a minme qu'on djoû
c'èst portant lèy qu'èlz'aveût ratch'té,
ås-cis qu'èlzès t'ni a gogne!
43. Is avît d'dja pièrdou l'som'ni dès sègnes
qu'il aveût mètou so l'Egypte,
ni rapinsant vormint pus
as mèrvèyes fêtes å tchamp d'a Tanis.
43. Es portant:
l'êwe di tos leûs fleûves
èsteût dim'nowe dè song',
is n'polît pus beûre
di leûs corantès-êwes.
45. Il èmontat conte di zèls
li bièsse qui magne tofér,
èlzî-st-èvoyat lès rinnes
po ravadjî tot l'payîs.
46. I d'nat leûs d'vêres ås critchons,
tot l'frut' di leûs ovrèdjes
ènn'ala-st-ås coks d'awous'.
47. I touwat leûs vègnes
tot 'lzî èvoyant dès grûzês,
is èdjalat leûs plennes.
48. I d'nat leûs bièsses as grûzès,
èt leûs tropês ås blames di tonîre.
49. Sor zèls,
il a d'lahî li feû di s'colére
avou po l'rawète li dèzasse,
l'ènondèdje èt lès transes,
pus on samerou d'andjes
qu'apwèrtît l'måleûr.
50. I s'a froyî on pazê po s'colére,
èt, tot d'nant leû vêye al pèsse,
il a lèyî mori leû-z-åme
sins voleûr èl mète a houte!
51. I bouhat djus lès prumîrès-èfants
di chaskeun' dès familes d'Egypte,
ac'sûhant-st-insi d'vins lès tintes d'a Cham
lès prumîrès-frûts di leû fwèce d'ome.
52. Come on tropê,
i tchèssat s'peûpe èn-avant;
tot fî parèy åx bèrbis
èl minat-st-ès dèzêrt,
53. èlz'a guidé avou sûrté,
is n'avît nole sogne;
li mér a r'covrou leûs innemis,
is ont stu turtos néyî.
54. Elz'a-st-èminé
disqu'ås frontîres di s'sint'té,
so l'hôteûr
qui s'dreûte lî a-st-ofrou.
55. I k'tchèssat lès peûpes po-d'vant zèls,
èlzès pårtèdjat avou l'cwèrdê d'l'èritèdje,
èt totes lès familes d'Israël
èlzès fat d'moni d'zos leû tinte.
56. Rèvoltés, is tem'tît l'Signeûr le Fwért-Hôt,
is n'wårdît nin sès tèmwègnèdjes.
57. Is rèscoulît,
dim'nant trête come leû pére,
is s'ritoûrnît,
come ine arc qu'èst fåssé.
58. Els fît måvler avou leûs hôts andrwèts,
èls rindît djalot so totes leûs îdoles.
59. Li bon Diu oya tot çoula
èt s'mètat ès fureûr,
i n'saveût pus sinti Israël.
60. Is lèyat la li d'morance di Silo,
il abann'na disqu'a l'tinte
qu'il aveût drèssî amon lès omes.
61. Il èlahat s'fwèce
po l'rinde prîzonîre,
i lîvrat s'loumîre èt s'glwère
ås mins di l'innemi.
62 I lîvrat s'peûpe a l'èpèye,
s'èblamant disconte si-èritèdje.
63. Sès djônêts ont stu magnî par li feû,
sès vièrjes n'ont måy avou d'tchant d'nôce.
64. Sès prêtes ont stu touwés a côp d'èpèyes,
èt sès vèves n'ont måy polou plorer!
65 Li Signeûr si dispièrtat:
come on dwèrmå vint foû di s'prumî some
ou tél on guèri dissôlé di s'vin.
66. I bouhat so lès drîs dès innemis,
po sor zèls,
èlzî d'vièrser l'honte po tofér.
67. I loukat d'hôt li tinte d'a Djôzèf,
I n'tchûzîhat nin l'famile d'Ephraïm.
68. I noumat l'famile d'a Djuda,
i tchûzihat l'hôteûr di Sion
qu'il inméve.
69. Come li steûlî
i drèssat l'coûr di s'mohone,
a jamåy,
èl batihat come li tére.
70. I tchûzihat Dåvid po l'chèrvî,
tot l'bodjant d'å mitan dè tropê.
71 El rissètchat èrî dès bèrbis,
èl fat m'ni po pahe Djåcob, si peûpe,
po pache Israël, si-èritèdje.
72. Elzès minat pahe sorlon l'dreûteûr di s'coûr,
èlzès minat d'ine sûtèye min!
53-54-55-56-57-58-59-60-61-62-63-64-65-66-67-68-69-70-71-72-73-74-75-76-77-78-79-80-81-82-83-84-85
1à22 - 23à52 - 85à110 - 110à131 - 132à150
Psaume 79 (Vulgate 78) Tot on peûpe si låmèn'tèye!
1. Tchant, d'a Assaph.
Signeûr,
lès peûpes moussèt tot-avå ès voste-èritèdje,
i fåt 'lzès vèyî
ahèssî l'tchèstê di v'sint'té.
I n'dimone pus rin di Jèruzalèm,
èlz'ont touwés turtos!
2. Is lèyèt l'cadåve di vos chèrviteûs
come amagnî po lès oûhês dè cîr,
li tchår di tos vos sints
è-st-abann'nèye ås bièsses dèl tére.
3. Åtou d'Jèruzalèm
is rispårdèt leû song' come di l'êwe,
on n'trûve minme pus on fossî
po 'lzès mète è tére.
4. Nos èstans dim'nou 'ne honte
po nos vwèzins,
nos èstans l'rîyerèye dè vinåve
is s'mokèt turtos d'nos.
5. Disqu'a qwand Signeûr
vis måvèl'rève sins ahote?
Vosse djaloz'rèye broûle come on feû!
6. Rispårdez vosse fureûr
so lès peûpes qui n'vis k'nohèt nin,
so lès rwèyômes
qui n'vis houkèt nin po 'lz'assister,
7. ca is magnèt Djåcob
come dès galavales,
is ont minme ravadjî si ç'tadèle.
8. Ni nos mètez nin so lès rins
lès pètchîs dès prumîres omes,
mins abèye dispètchîz-v'!
qui vos mizèricôrs rotèsse po d'vant nos
ca nos n'polans pus hope!
9. Vinez a nosse sécours,
vos l'Diu d'nosse dilîvrance,
fez-l' po l'glwère di vosse Nom;
disgadjîz-nos,
rafûlez nos pètchîs,
fez-l' a cåse di vosse Nom!
10. Poqwè lès peûpes dirît-is:
"Wice pou bin èsse leû Diu?"
Qui l'song' di tès chèrviteûs qu'a stu rispårdou
ni d'mone nin sins vindjince,
qui d'zos nos oûys
cisse-chal seûye kinohowe avå lès peûpes!
11. Qui l'djèmihèdje dès prîzonîrs
s'èlîve disqu'a vosse vizèdje,
come vos avez l'brès' long,
dilîvrez lès fis dèl mwért.
12. Sèt' côps ot'tant
raminez so nos vwèzins
l'insûle qu'is v's ont fête, Signeûr,
quèl riçuvèsse è plin stoumac!
13. Et nos-ôtes vosse peûpe,
li tropê d'vosse pahis',
nos v'rindans gråce po tofér,
al dilongue dès sièkes
nos f'rans sèpi vosse glwère.
53-54-55-56-57-58-59-60-61-62-63-64-65-66-67-68-69-70-71-72-73-74-75-76-77-78-79-80-81-82-83-84-85
1à22 - 23à52 - 85à110 - 110à131 - 132à150
Psaume 80 (Vulgate 79) Priyîre å Signeûr, li bèrdjî d'a Israël.
1. A mêsse dè tchant- tèmwègnèdje- d'a Assaph - tchant.
2. Oyez vos l'bèrdjî d'a Israël,
vos qui minez Djôzèf come on tropê,
riglatihez,
achou so lès andjes!
3. Po d'zos lès oûys d'a Ephraïm,
d'a Benjamin èt Manassé,
dispièrtez vosse pwissance,
rotez po nosse dilîvrance.
4. Signeûr nosse Diu,
riprindez nos a novê,
qui vosse vizèdje s'illuminêye
èt nos n'sèrans såvés.
5. Signeûr,
li Diu dès årmêyes,
disqu'a qwand alez-v' co timpèster
disconte lès priyîres di vosse peûpe?
6. Come amagnî,
vos 'lzî d'néz l'pan dès låmes,
èt po beûre,
is ont-st-avou dès låmes a gogo!
7. Vos avez fêt d'nos-ôtes
ine cåse di carèle po nos vwèzins,
èt nos innemis ont bin bon
dè rire èt di s'moker!
8. Signeûr nosse Dieu,
riprindez nos a novê,
qui vosse vizèdje s'illuminêye
èt nos n'sèrans såvés.
9. Vosse vègne qui crèhez-v' ès l'Egypte,
vos avez stu èl planter ôte på,
èt poleûr li mète wice qui v's avîz tchûzî
vos avez d'vou tchèssî dès peûpes.
10. Vos avez r'nètî l'plèce:
adon èle fat prinde rècène a sès pîds,
èle si stårat so tote li tére.
11. Si-ombe a r'covièrt lès hôteûrs,
sès stoks ont dim'nou dès cêdes dè bon Diu.
12. Ele sitårat sès djônès djèts vè l'mér,
èle tchoûkat sès r'djètons vè l'fleûve.
13. Mins poqwè bouhîz-v' djus totes sès bayes?
Tot qui passe so l'vôye sét èl plok'ter!
14. Li singlé dès bwès èl kimagn'têye,
lès såvatchès bièsses èl brozdét!
15. Signeûr nosse Diu,
abèye, rim'nez!
D'al copète dès cîrs tapez-î vos oûys,
loukîz-l' come i fåt!
Fez don l'vizite
di cisse vègne chal,
16 c'èst li strouk
qui vosse dreûte a planté.
Radreûtihez don li r'djèton
qui v's avez rafwèrcî por vos!
17. Elle a stu broûlêye,
li feû la tote razêye.
Qwand vosse vizèdje man'cèye
tot çou qu'èst d'vant vos tome djus!
18. Qui vosse min seûye so l'ome
qu'è-st-a vosse dreûte,
so l'fi d'l'ome
qui v's avez rafwèrcî por vos!
19. Nos alans d'moni ad'lé vos,
vos nos fez raviker;
nos houk'rans vosse nom
po-z-èsse assisté!
20. Signeûr, binamé bon Diu,
riprindez nos a novê,
qui vosse vizèdje s'illuminêye
èt nos n'sèrans såvés!
53-54-55-56-57-58-59-60-61-62-63-64-65-66-67-68-69-70-71-72-73-74-75-76-77-78-79-80-81-82-83-84-85
1à22 - 23à52 - 85à110 - 110à131 - 132à150
Psaume 81 (Vulgate 80) Po l'fièsse dès tintes.
1. A mêsse dè tchant, d'a Assaph.
2. Potchîz d'djôye ès bon Diu,
c'èst Lu qu'èst nosse fwèce,
sèyîz' èl djôye ès Diu d'a Djåcob!
3. Spritche li tchant!
Djouwez l'tamboûr,
sûvez bin l'cadance
avou lès instrumints à cwèdes!
4. Sonez dèl trompète po l'noû meûs,
po ç'solanèl djoû qu'èst nosse fièsse!
5. Ca minme çoula èst lwè po Israël,
c'è-st-on djudj'mint dè Diu d'a Djåcob,
6. c'è-st-on tèmwègnèdje
qu'Il aveût mètou-st-ès Djôzef,
qu'Il aveût fêt sèpi
tot m'nant foû dè payîs d'Egypte;
D'ô dè lèpes qui dji n'kinohéve nin:
7. "D'a disgadjî si spale dè horkê,
sès mins ont stu lîbe di tote tchèdje.
8. Divins lès transes ti brèyéve après mi,
adon dji t'a sètchî foû d'la,
ès li s'crèt dè tonîre
dji t'a-st-acwèrdé çou qu'ti voléve,
D'a sayî l'deûrté di t'coûr
ås êwes di Mériba.
9. Hoûte on pô m'peûpe,
dji tèmwègne disconte twè!
Israël,
si t'voléve bin m'ôre 'ne miyète!
10. E fond di t'coûr,
i n'åreût noû såvadje Diu,
ti n'îreûs nin t'adjèni
po d'vant on diu ètrindjîr!
11. Mi, l'Signeûr, qu'èst t'Diu,
dji t'a fêt monter foû dèl tére d'Egypte,
tape don t'boke grant-å lådje
èt djèl rimplirè.
12. Mins m'peûpe n'a nin oyou m'vwès,
Israël n'a nin volou d'mi!
13. Dj'èlz'a r'tapés èl deûrté d'leû coûr,
ènn'alît sûvant leû prôpe consèy!
14. A-ha, si m'peûpe m'oyéve!
Israël! S'ènn'alît d'vins mès vôyes!
15. D'on côp dj'åreûs mêstri sès innemis,
mi min pèz'reût so tos cès-la
quèl tinèt a gogne!
16. Po d'vant l'Signeûr,
tos lès-cis quèl hayèt
si k'hèrtch'ront so leû vinte,
leû sôr sèrè dècîdé po tofér.
17. Po-z-amagnî il årè dèl fleûr di frumint,
i sèrè r'pahou avou dèl låme dè rotches!
53-54-55-56-57-58-59-60-61-62-63-64-65-66-67-68-69-70-71-72-73-74-75-76-77-78-79-80-81-82-83-84-85
1à22 - 23à52 - 85à110 - 110à131 - 132à150
Psaume 82 (Vulgate 81) Disconte lès måvas djudjes.
1. Tchant d'a Assaph:
Li Signeûr s'astampêye
a la coûr d'a Nosse Diu,
ca c'èst Lu qu'prézidêye
l'assimblêye dès djudjes.
2. Disqu'a qwand alez-v' co djudjî
avou totes vos fåssès manîres?
Disqu'a qwand l'vizèdje dè rèprové
sèrè-t-i co djustifiyî?
3. Djudjîz l'pôve, l'ôrfulin,
lèyîz' aller li p'tit èt l'minåbe.
4. Rindez lîbe li pôve,
èt l'ci qu'èst plin d'mèhins,
såvez- 'lzès dèl min dè rèprové.
5. Is n'î k'nohèt rin,
is n'î comprindèt rin,
is tchètèt hår èt hote
prizonîr dèl neûristé!
Tos lès fondemints dèl tére ènnè halcotèt!
6. Dji d'héve:
"Vos èstez dès dius,
vos èstez turtos
lès fis d'å Fwért Hôt".
7. Awè!
Tot come l'ome vos pèrirez,
vos toûm'rez djus
tot fî parèy ås princes!
8. Astampez-v' Signeûr
po djudjî l'tére,
ca v's èstez l'èritîr
di tos lès peûpes!
53-54-55-56-57-58-59-60-61-62-63-64-65-66-67-68-69-70-71-72-73-74-75-76-77-78-79-80-81-82-83-84-85
1à22 - 23à52 - 85à110 - 110à131 - 132à150
Psaume 83 (Vulgate 82) Disconte lès innemis d'a Israël.
1. Ime, on tchant d'a Assaph.
2. Signeûr, dihez don 'ne saqwè,
ni sèyîz' nin mouwê,
rimouwez-v' 'ne miyète,
Vos, nosse Diu!
3. Ca vochal:
vos innemis ni t'nèt pus è plèce,
èt lès-cis qui v'hayèt
ont wèzou r'drèssî l'tièsse.
4. Is machinèt-st-on måva côp
disconte vosse peûpe,
is complotèt èssonne
tot djèrant so vos trèzôrs.
5. Is s'dihèt ont a l'ôte:
"Abèye, vinez,
råyans 'lzès foû d'inte lès nåcions,
èt qu'po tofér
on piède li sov'nance d'Israël."
6. Ca d'on seûl coûr
is tûzèt èssonne po mî v's aveûr,
conte di vos
is ont minme fêt in-acwérd.
7. C'èst lès tintes d'Edom, lès Ismaèliens
èt ossi Moab èt Agrim,
8. Guebal, avou Amon, Amalèc èt lès Philistins,
pus tos lès-cis qui d'monèt a Tyr.
9. Assur fêt pårtèye dèl minme clique:
ca avou lu, lès fis d'a Lot si sintèt fwérts!
10. Arindjîz-'lzès come vos l'avîz fêt
po Madian, Sistra èt Yabin,
qui v's avîz-st-ahèssî
å corantès êwes di Kishon.
11. Vos 'lz'avîz distrûts a Aïn-Dôr,
is foûrît l'ansène dèl tére.
12. Vos avîz må årindjî Oreb èt Zéeb,
fez parèy po leûs princes;
i fåt-st-ossi trêtî leûs mêsses
come ont stu trêti Zébah èt Tsalmunah.
13. Ca c'èst tos zèls qui s'inflèt tot d'hant:
"Nos èritêy'rans dès mohones d'å Signeûr."
14. Nosse Diu,
rindez-'lzès parèy a on toûbion,
qui dim'nèsse come on fistou
qui l'vint djowe avou.
15. Tot parèy å feû
qui ravadje lès grands bwès,
ou come lès blames
qui boutèt l'feû åx hôteûrs,
16. Awè, tot parèy a çoula,
trak'nez-'lzès ès vosse tampète,
di sogne di vosse såvadje tin
fez-'lzî piède li tièsse!
17. Qui leû vizèdje seûye rimpli d'honte,
qu'is r'cwèrèsse vosse Nom, Signeûr!
18. Ahontî,
tot foû d'zèls,
rafûlés d'zos l'honte po tofér,
ènnè pièd'ront l'vèye!
19. Is k'noh'ront-st-insi
qui vos qu'on lome li Signeûr
vos èstez l'seûl Diu,
vos èstez l'Fwért-Hôt so tote li tére.
53-54-55-56-57-58-59-60-61-62-63-64-65-66-67-68-69-70-71-72-73-74-75-76-77-78-79-80-81-82-83-84-85
1à22 - 23à52 - 85à110 - 110à131 - 132à150
Psaume 84 (Vulgate 83) Tchant po l'vôye.
1 A mêsse dè tchant, so 'ne instrumint a cwèdes, dès fis d'a Corah, tchant.
2. Signeûr dès årmêyes,
qui n'vèyans vol'tî vos d'morances!
3. Mi-åme si lanwih,
èle flåwih minme
so lès parvis d'å Signeûr,
mi coûr èt minme mi tchår
tchantèt l'Diu bin vikant.
4. Minme l'oûhê
troûve tofér 'ne-a houte,
l'arontche, lèye, a-st-on nid
po-z-î as'lèver s'niyêye.
Vos åtés, Signeûr dès årmêyes,
nosse Rwè èt nosse Diu!
5. Qu'is sont-st-ureûs tos cès-la
qui d'monèt ès vosse mohone;
is v'low'ront co!
6. Qu'il è-st-ureûs l'ome
qui s'si fèye qu'a vosse fwèce,
qu'a vosse vôye è s'coûr!
7. Lès-cis qu'trivièrsèt l'sètche valèye
î fêt-st-abrotchî on surdon,
lès prumîrès plêves di l'arîre-sèzon
i fêt lårdjèsse di leûs bènèdicsions.
8. Is avancihèt,
pus pwissant d'ine fèye a l'ôte,
po-z-aparète
po d'vant Diu d'vins Sion.
9. Signeûr nosse Diu,
oyez nosse priyîre,
prustez-i l'orèye
vos l'Diu d'a Djåcob!
10. Signeûr,
tapez vos oûys so nosse prôtècsion,
loukîz l'vizèdje di vosse mèssîye!
11. Ca on djoû passé d'vins vos parvis
ènnè våt pus qui mèye,
dj'inme mî camper d'vant vosse mohone
qui di d'morer d'vins lès tintes dès hayåves!
12. Ca l'Signeûr nosse Diu è-st-on solo, 'ne prôtècsion,
i done li gråce èt l'glwère,
li Signeûr ni rèfûze måy d'êdî
lès-cis qu'tchèrièt dreût!
13. Signeûr nosse Diu,
vos èstez l'boneûr parfêt
po l'ome qui s'abann'nèye
ès voste amour!
53-54-55-56-57-58-59-60-61-62-63-64-65-66-67-68-69-70-71-72-73-74-75-76-77-78-79-80-81-82-83-84-85
1à22 - 23à52 - 85à110 - 110à131 - 132à150
Psaume 85 (Vulgate 84) Priyîre po-z-avu l'påye.
1. A mêsse dè tchant - dès fis d'a Corah - tchant.
2. Signeûr,
vos ahågnîz vosse tére,
vos fez rim'ni ès leû bin
tos lès prîzonîrs d'a Djåcob.
3. Vos supwèrtez l'måle goviène di vosse peûpe,
èt vos r'covrez tos leûs pètchîs.
4. Di leû vôye vos r'sètchîz vosse colére,
vos lèyîz r'toumer l'feû d'vosse fureûr.
5. R'mètez nos d'vins nos dreûts,
vos, l'Diu d'nosse dilîvrance,
rèbalez l'måle oumeûr
qui v's avez so nos-ôtes!
6. Alez-v' èsse tot foû d'vos disconte nos
disqu'å coron dès siékes?
Alez-v' kihèrtchî vosse colére
d'on siéke a l'ôte?
7. N'èst-ce nin vos qui d'vreût m'ni
po nos fé raviker?
N'èst-ce nin vos qui d'veût m'ni
po qu'vosse peûpe si rafèye ès voste-amoûr?
8. Signeûr,
fez qu'nos polans' loukî voste-amoûr!
Dinez nos vosse dilîvrance!
9. Avez-v' oyou
çou qu'nos dit l'Signeûr?
Ca nosse Diu djåze di påye
a s'peûpe èt a sès sints,
po qu'ènnè ralèsse nin
a leûs bwègnès èspwérs!
10. Awè,
si d'lîvrance èst tot près d'sès fruzihants,
èt çoula,
po qu'si glwère dimone chal so l'tére.
11. L'Amoûr èt l'fidélité si rèscontrèt,
li djustice èt l'påye si rabrèssèt,
12. li vrêye florih so l'tére,
èt d'al copète dès cîrs,
li djustice louke tot çoula!
13. Li Signeûr,
Lu-minme done li bin,
èt adon,
nosse tére done si frût'.
14. Li djustice rote po d'vant Lu.
I mète sès pas so l'vôye.
Retour à la table
Ce texte précieux et rare est l'oeuvre de "On P'tit Monne" ("Un Petit Moine"). Ce "monne" en question, un enfant spirituel du père Hubert, est un moine trappiste de pure souche wallonne. Comme exercice spirituel, le père Hubert lui avait demandé de s'atteler à cette longue et la délicate tâche de traduire tous les psaumes en wallon à partir de quatre traductions françaises différentes. Le "P'tit Monne", sur sa lancée, a aussi traduit l'Évangile de Marc (cf. infra) et les trois lettres de Jean.
Je présente ici une version bénévolement dactylographiée et corrigée selon les dernières conventions orthographiques par monsieur Jean Hamblenne à partir des photos prises aux archives de l'abbaye de Rochefort. Merci M. Hamblenne pour ce travail long et exigeant.
*********************
*********************